(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា, អនុប្រធានគណបក្សប្រជាជនកម្ពុជា និងជាប្រធានមហាសន្និបាត ICAPP លើកទី១២ បានថ្លែងថា កិច្ចការពិភពលោក និងអភិបាលកិច្ចពិភពលោក មិនគួរពាក់ព័ន្ធតែនឹងមហាអំណាចនោះទេ ដោយត្រូវទទួលស្គាល់ពីសារសំខាន់របស់ប្រទេសអំណាចថ្នាក់កណ្តាល និងរដ្ឋតូចៗផងដែរ ព្រោះពួកគេក៏មានឯករាជ្យភាព និងមហិច្ឆតានៅក្នុងការដើរតួនាទីដ៏មានអត្ថន័យ ក្នុងការទូតភូមិសាស្ត្រនយោបាយ និងសេដ្ឋកិច្ចដើម្បីជំរុញសន្តិភាព នៅជុំវិញពិភពលោក​។

សម្តេចមហាបវរធិបតី ហ៊ុន ម៉ាណែត ថ្លែងបែបនេះក្នុងឱកាសដែលសម្តេចអញ្ជើញបើកមហាសន្និបាតសន្និសីទអន្តរជាតិ ​នៃបណ្តាគណបក្សនយោបាយនៅអាស៊ីលើកទី១២ និងកិច្ចប្រជុំពាក់ព័ន្ធការស្វែងរកសន្តិភាព និងការផ្សះផ្សា នៅវិមាន៧មករា នាព្រឹកថ្ងៃទី២២ ខែវិច្ឆិកា ឆ្នាំ២០២៤នេះ។

សម្តេចមហាបវរធិបតី មានប្រសាសន៍ថា «បច្ចុប្បន្ន​យើងកំពុងរស់នៅ ក្នុងបរិយាកាសនៃភាពមិនប្រាកដប្រជាខ្ពស់ ដោយមហាអំណាច កំពុងបំពានលើសណ្តាប់ធ្នាប់អន្តរជាតិដែលផ្អែកលើច្បាប់ ដែលយើងអាចមើលឃើញក្នុងចំណងជើងសារព័ត៌មាន ជារៀងរាល់ថ្ងៃ។ ទោះជាយ៉ាងនេះក្តី​ កិច្ចការពិភពលោក និងអភិបាលកិច្ចពិភពលោក មិនគួរពាក់ព័ន្ធតែនឹងមហាអំណាចនោះទេ។ យើងត្រូវទទួលស្គាល់ពីសារសំខាន់របស់ប្រទេស អំណាចថ្នាក់កណ្តាល និងរដ្ឋតូចៗផងដែរ ព្រោះពួកគេក៏មានឯករាជ្យភាព និងមហិច្ឆតា នៅក្នុងការដើរតួនាទីដ៏មានអត្ថន័យ ក្នុងការទូតភូមិសាស្ត្រនយោបាយ និងសេដ្ឋកិច្ច ដើម្បីជំរុញសន្តិភាព នៅជុំវិញពិភពលោកដែរ»។

សម្តេចបរធិបតីមានប្រសាសន៍ថា ប្រទេសកម្ពុជា​ក៏មានបំណងចង់ រួមចំណែកដល់ការកសាងសហគមន៍សកល ដែលចងភ្ជាប់គ្នាដោយសន្តិភាព, វិបុលភាព និងពហុ ភាគីនិយម ប្រកបដោយបរិយាប័ន្ន។

សម្តេចមហាបវរធិបតី បានលើកឡើងផងដែរថា ​សហគមន៍សកលរបស់យើង ស្ថិតនៅលើចំណុចរបត់មួយ។ មូលដ្ឋានគ្រឹះនៃសន្តិភាព ដែលត្រូវបានកសាងឡើងលើគោលការណ៍ដែលមានចែងក្នុងធម្មនុញ្ញអង្គការសហប្រជាជាតិ ចាប់តាំងពី ការបញ្ចប់សង្គ្រាមលោកលើកទី២ ត្រូវបាននិងកំពុងត្រូវបានសាកល្បងដល់ចំណុចមិនធ្លាប់មាន ដោយសារការប្រកួតប្រជែងដ៏តានតឹង ដែលនាំឱ្យមានសង្គ្រាម ទាំងត្រជាក់ និងក្តៅ៕