(ភ្នំពេញ)៖ លោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានថ្លែងថា ក្រសូងអប់រំបានប្តេជ្ញាចិត្តក្នុងការកសាងអនាគតកុមារកម្ពុជាឲ្យមានសុខភាពល្អ។ ជាមួយគ្នានេះក្រសួងក៏នឹងប្ដេជ្ញាចូលរួមកាត់បន្ថយអត្រាប្រេវ៉ាឡង់ នៃភាពស្លេកស្លាំង កង្វះជាតិដែកក្នុងចំណោមកុមារអាយុក្រោម៥ឆ្នាំ ដោយធានាថា ពួកគេមានការលូតលាស់ និងឱកាសដើម្បីរីកចម្រើន។
ការថ្លែងរបស់មន្ត្រីជាន់ខ្ពស់រូបនេះបានធ្វើឡើងខណៈដែលក្រុមហ៊ុន ដាណន់ កម្ពុជា បានប្រារឰទិវាកង្វះជាតិដែក ដោយចុះហត្ថលេខាលើអនុស្សរណៈនៃការយោគយល់គ្នា ជាមួយក្រសួងអប់រំ យុវជន និងកីឡា។ ក្រុមហ៊ុនដាណន់ ស្ពេសស៊លឡាយដ៏ នូទ្រីសិន ខេមបូឌា (ដាណន់កម្ពុជា) ជាបុត្រសម្ព័ន្ធរបស់ក្រុមហ៊ុនអាហារ និងភេសជ្ជៈ ផ្តោតលើសុខភាពដែលឈានមុខគេលើពិភពលោក បានចុះហត្ថលេខាលើអនុស្សរណៈនៃការយោគយល់គ្នា ជាមួយក្រសួងអប់រំ យុវជន និងកីឡាដើម្បីជួយកាត់បន្ថយភាពស្លេកស្លាំង កង្វះជាតិដែក និងកង្វះអាហារូបត្ថម្ភរបស់កុមារក្នុងប្រទេសកម្ពុជា។
អនុស្សរណៈនៃការយោគយល់គ្នា ដែលត្រូវបានចុះហត្ថលេខានេះ ប្រារព្ធធ្វើឡើងនៅ រ៉ូសវូដភ្នំពេញ នាថ្ងៃទី២៦ ខែវិច្ឆិកា ដែលមានការអញ្ជើញចូលរួមពីលោកជំទាវ គឹម សេដ្ឋានី រដ្ឋលេខាធិការប្រចាំការ ក្រសួងអប់រំ យុវជន និងកីឡា តំណាងដ៏ខ្ពង់ខ្ពស់ ឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និង លោក Maarten VAN LEEUWEN នាយកគ្រប់គ្រងក្រុមហ៊ុន ដាណន់ ប្រចាំប្រទេស។
កិច្ចព្រមព្រៀងនេះ ប្រារព្ធធ្វើឡើងក្នុងគោលបំណងធ្វើឱ្យប្រសើរឡើងនូវបញ្ហាកង្វះជាតិដែកដែលនាំឱ្យមានភាពស្លេកស្លាំងក្នុងចំណោមកុមារនៅប្រទេសកម្ពុជា។ ការចុះហត្ថលេខាលើអនុស្សរណៈយោគយល់គ្នានេះ ត្រូវបានរៀបចំឡើងនៅក្នុងទិវាកង្វះជាតិដែកអន្តរជាតិ ដែលគូសបញ្ជាក់ពីសារៈសំខាន់ៗនៃគំនិតផ្តួចផ្តើម។
លោកជំទាវ គឹម សេដ្ឋានី បានថ្លែងថា «ក្រសួងអប់រំ យុវជន និងកីឡា បានប្តេជ្ញាចិត្តក្នុងការកសាងអនាគតកុមារកម្ពុជាឲ្យមានសុខភាពល្អ។ ភាពជាដៃគូជាមួយ ក្រុមហ៊ុន ដាណន់ កម្ពុជា ឆ្លុះបញ្ចាំងពីចក្ខុវិស័យរួមគ្នារបស់យើង ក្នុងការលើកកម្ពស់ការយល់ដឹងអំពីកង្វះអាហារូបត្ថម្ភ និងជំងឺកង្វះជាតិដែក ចូលរួមកាត់បន្ថយអត្រាប្រេវ៉ាឡង់នៃភាពស្លេកស្លាំង កង្វះជាតិដែកក្នុងចំណោមកុមារអាយុក្រោម ៥ឆ្នាំ ដោយធានាថាពួកគេមានការលូតលាស់ និងឱកាសដើម្បីរីកចម្រើន សម្រេចបាននូវសក្តានុពលពេញលេញរបស់ពួកគេ»។
លោក Maarten VAN LEEUWEN ប្រធានគ្រប់គ្រងក្រុមហ៊ុន ដាណន់ កម្ពុជា ចាំប្រទេស បានថ្លែងថា «ក្រុមហ៊ុនដាណន់ កម្ពុជា បានគាំទ្រដោយមោទនភាពចំពោះកិច្ចខិតខំប្រឹងប្រែងកាត់បន្ថយកង្វះអាហារូបត្ថម្ភ និងភាពស្លេកស្លាំង កង្វះជាតិដែកអស់រយៈពេលជាច្រើនឆ្នាំ។ ខណៈដែលការធ្វើដំណើររបស់ពួកយើងមានការរីកចម្រើនគួរឱ្យកត់សម្គាល់ក្នុងទសវត្សរ៍កន្លមក បេសកកម្មរបស់យើង គឺនៅតែបន្តដំណើរដ៏វែងឆ្ងាយបន្តទៀត។ យើងទាំងអស់គ្នានឹងបន្តខិតខំដើម្បីអនាគតដ៏ប្រសើរសម្រាប់ប្រជាជនកម្ពុជាទាំងអស់គ្នា។
លោក Maarten បានបន្ថែមថា «កម្មវិធីចុះហត្ថលេខានេះគឺជាជំហានដ៏សំខាន់មួយឆ្ពោះទៅមុខក្នុងការប្តេជ្ញាចិត្តរបស់យើងចំពោះសុខភាព និងសុខុមាលភាពរបស់កុមារនៅប្រទេសកម្ពុជា។ ក្នុងនាមជាក្រុមហ៊ុនទទួលបានវិញ្ញាបនប័ត្រ B Corp™p យើងប្តេជ្ញារួមចំណែកជាវិជ្ជមានដល់សង្គម និងបរិស្ថាន ជាពិសេសយើងនឹងយកចិត្តទុកដាក់ចំពោះផ្នែកសុខភាព។ តាមរយៈការកែលម្អការអនុវត្តការពិនិត្យ និងបង្កើនការយល់ដឹងអំពីសារៈសំខាន់នៃអាហារូបត្ថម្ភ យើងមានគោលបំណងបង្កើតផលជះជាវិជ្ជមានដ៏យូរអង្វែងដល់ជីវិតរបស់កុមារតូចៗនៅទូទាំងប្រទេស»។
ក្រោមអនុស្សារណៈនេះ ក្រុមហ៊ុន ដាណន់ កម្ពុជា នឹងសហការជាមួយជាមួយ ក្រសួងអប់រំ យុវជន និងកីឡា ដើម្បីបង្កើនការអនុវត្ត ការពិនិត្យលើកុមារអាយុក្រោម៥ឆ្នាំ ក្នុងគោលបំណងបង្កើតប្រព័ន្ធត្រួតពិនិត្យភាពស្លេកស្លាំងដោយសារកង្វះជាតិដែក (IDA) ជូនដល់ពួកគេអោយបាននៅត្រឹមឆ្នាំ២០២៧នេះ។ ពិធីចុះហត្ថលេខានេះ ក៏សន្យាថានឹងបង្កើនការយល់ដឹងអំពីតួនាទីរបស់អាហារលើស្ថានភាពសុខភាពរបស់កូនៗយើង ដោយដាក់ចេញនូវ(១)លើកកម្ពស់ការយល់ដឹង និងភាពកាន់តែល្អប្រសើរឡើងនៃការអប់រំអំពីកង្វះអាហារូបត្ថម្ភ និង IDA សម្រាប់អ្នកទទួលផល (រួមមានមាតាបិតាអាណាព្យាបាល លោកគ្រូ អ្នកគ្រូ សិស្សានុសិស្ស និងភាគីពាក់ព័ន្ធផ្សេងទៀត)។
(២). ការបង្កើនចំណេះដឹងអំពីផលវិបាកនៃភាពស្លេកស្លាំង សម្រាប់កុមារដែលមានអាយុក្រោម ៥ ឆ្នាំ និងសារៈសំខាន់ នៃការទទួលទានអាហារដែលសម្បូរជាតិដែក តាមរយៈការអប់រំ និងការត្រួតពិនិត្យភាពស្លេកស្លាំង។
(៣). ការណែនាំដំបូង ឬការសាកល្បងលើការធ្វើត្រួតពិនិត្យ IDA សម្រាប់កុមារដែលមានអាយុក្រោម ៥ឆ្នាំ នៃការសិក្សា អប់រំថ្នាក់មត្តេយ្យ។
តាមការយល់ដឹងអំពីស្ថានភាពសុខភាពកុមារនៅកម្ពុជានាពេលបច្ចុប្បន្នបង្ហាញថា ភាពស្លេកស្លាំង គឺជាបញ្ហាសុខភាពសាធារណៈដ៏សំខាន់មួយ ជាពិសេសប៉ះពាល់ដល់ស្ត្រី និងកុមារ។ កង្វះជាតិដែកគឺជាមូលហេតុចំបង ដែលបណ្តាលឱ្យមានភាពស្លេកស្លាំង ហើយវាអាចត្រូវបានដោះស្រាយ បានតាមរយៈការកែតម្រូវរបបអាហារ។ យើងទាំងអស់គ្នា អាចធ្វើការកែតម្រូវដើម្បីឱ្យសុខភាពកុមារនៅប្រទេសកម្ពុជាប្រសើរឡើង តាមរយ:ការត្រួតពិនិត្យស្វែងរកភាពស្លេកស្លាំយ៉ាងសកម្ម និងព្យាបាលទាន់ពេលវេលា ដើម្បីបង្ការផលប៉ះពាល់សុខភាពរយៈពេលវែង វាអាចការពារផលវិបាកសុខភាពរយៈពេលវែង។ លើសពីនេះទៅទៀតយើងអាចផ្តល់ការគាំទ្រនូវអាហាររូបត្ថម្ភត្រឹមត្រូវ ក្នុងអំឡុងពេលសំខាន់នេះ ដើម្បីគាំទ្រជួយឱ្យកុមារតូចៗលូតលាស់បានពេញលេញ៕
