(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត សូមសម្តែងនូវអំណរសាទរប្រកបដោយមនោសញ្ចេតនាសោមនស្សរីករាយ និង ជ្រះថ្លាយ៉ាងក្រៃលែង ប្រគេនសម្តេចព្រះវនរ័ត ជាទីគោរពសក្ការៈដ៏ខ្ពង់ខ្ពស់ នៅក្នុងឱកាសដែល សម្តេច ត្រូវបានព្រះករុណាជាអម្ចាស់ជីវិតលើត្បូង ព្រះមហាក្សត្រ នៃព្រះរាជាណាចក្រកម្ពុជា ព្រះអង្គសព្វព្រះរាជហឫទ័យត្រាស់បង្គាប់តែងតាំងព្រះឋានៈ «សម្តេចព្រះវនរ័ត សម្តេចព្រះសង្ឃនាយករងទី២ គណៈមហា និកាយ នៃព្រះរាជាណាចក្រកម្ពុជា»។
ឆ្លៀតក្នុងឱកាសដ៏នក្ខត្តឫក្សវិសេសវិសាលថៃ្លថ្លានេះ ខ្ញុំព្រះករុណា និងភរិយា សូមព្រះអនុញ្ញាតដ៏ខ្ពង់ខ្ពស់ ថ្លែងនូវព្រះសក្ខីភាពជាវិជ្ជមានជាច្រើនរបស់សម្តេចព្រះវនរ័ត ដែលសម្តេច តែងតែបានចូលរួមចំណែក និងខិតខំ ប្រឹងប្រែងប្រកបដោយឆន្ទៈមោះមុត ការលះបង់ព្រះកាយពល និងព្រះបញ្ញាញាណមិនខ្លាចនឿយហត់ ក្នុងព្រះបុព្វហេតុបន្តកសាង និងលើកស្ទួយវិស័យព្រះពុទ្ធសាសនា ឱ្យបានរីកចម្រើនរុងរឿងតរៀងទៅ។
ខ្ញុំព្រះករុណា និងភរិយា សូមលំឱនកាយវន្ទាបួងសួងដល់គុណបុណ្យព្រះរតនត្រ័យ គុណកវទាំងបី តេជះ ព្រះបារមីនៃវត្ថុស័ក្តិសិទ្ធិនៅក្នុងលោក និងទេវតារក្សាព្រះមហាស្វេតច្ឆត្រ សូមអភិបាលគ្រងរក្សាប្រោះព្រំព្រះពរ សព្ទសាធុការប្រគេនចំពោះ សម្តេចព្រះវនរ័ត សូមមានព្រះសុខភាពល្អបរិបូរណ៍ ប្រកបដោយព្រះពុទ្ធពរទាំង បួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
សូមសម្តេចព្រះវ័នរ័ត សម្តេចព្រះសង្ឃនាយករងទី២ គណៈមហានិកាយ នៃព្រះរាជាណាចក្រកម្ពុជា ព្រះមេត្តាទទួលនូវសេចក្ដីគោរពសក្ការៈដ៏ខ្ពង់ខ្ពស់ពីខ្ញុំព្រះករុណា និងភរិយា៕
