(ភ្នំពេញ)៖ នាវាចម្បាំងអាមេរិក ឈ្មោះ USS SAVANNAH (LCS 28) ជាមួយនាវិក១០៣នាក់ បានចូលមកដល់សមុទ្រកម្ពុជា និងចតនៅកំពង់ផែស្វយ័តក្រុងព្រះសីហនុ នាព្រឹកថ្ងៃចន្ទ ទី១៦ ខែធ្នូ ឆ្នាំ២០២៤នេះ។ វត្តមាននាវាចម្បាំងអាមេរិកលើដែនសមុទ្រកម្ពុជាជាថ្មី ក្រោយខកខានរយៈពេលប្រមាណជា៨ឆ្នាំ ត្រូវបានគេមើលឃើញថា ជាសញ្ញាណល្អនៃទំនាក់ទំនងផ្នែកយោធារវាងកម្ពុជា និងអាមេរិក។
លោកបណ្ឌិត យង់ ពៅ អគ្គលេខាធិការនៃរាជបណ្ឌិត្យសភាកម្ពុជា និងជាអ្នកតាមដានស្ថានការណ៍នយោបាយ បានមើលឃើញថា ការចូលចតរបស់នាវាចម្បាំងកងទ័ពជើងទឹកសហរដ្ឋអាមេរិក នៅកំពង់ផែស្វយ័តក្រុងព្រះសីហនុ បានបង្ហាញពីសុឆន្ទៈនៃកិច្ចសហប្រតិបត្តិការទៅវិញទៅមក ដែលផ្អាកកិច្ចសហប្រតិបត្តិការរយៈពេល៨ឆ្នាំមកហើយ។
លោកបណ្ឌិត យង់ ពៅ បានបន្តថា ការចូលចតនាវាចម្បាំងកងទ័ពជើងទឹកសហរដ្ឋអាមេរិកលើទឹកដីរបស់កម្ពុជា ក៏បានបញ្ជាក់ពីការវិវឌ្ឍន៍លើវិស័យយោធាកម្ពុជា និងអាមេរិក ក្រោយដំណើរទស្សនកិច្ចរបស់លោក ឡយ ជេម អូស្ទីន III (Lloyd James Austin III) រដ្ឋមន្ត្រីការពារជាតិអាមេរិក កាលពីខែមិថុនា ឆ្នាំ២០២៤កន្លងទៅ។
«តាមរយៈការអនុញ្ញាតឱ្យនាវាចម្បាំងកងទ័ពជើងទឹកសហរដ្ឋអាមេរិក ចូលចតនៅកំពង់ផែស្វយ័តក្រុងព្រះសីហនុនាពេលនេះ កម្ពុជា និងអាមេរិក នឹងមានកិច្ចសហប្រតិបត្តិការយោធាល្អប្រសើរឡើងវិញ ព្រមទាំងវិស័យផ្សេងៗទៀតផងដែរ»។ នេះជាការគូសបញ្ជាក់របស់លោកបណ្ឌិត យង់ ពៅ។
លោក យង់ ពៅ បានអំពាវនាវថ្នាក់ដឹកនាំប្រទេសកម្ពុជា និងសហរដ្ឋអាមេរិក បន្តពង្រឹងកិច្ចសហប្រតិបត្តិការល្អៗលើវិស័យដទៃទៀត ឱ្យបានស៊ីជម្រៅ ដើម្បីស្វែងយល់គ្នា តម្កល់ផលប្រយោជន៍ និងសណ្តាប់ធ្នាប់សកលជាមួយគ្នា។
លោកបណ្ឌិត យង់ ពៅ បានបន្ថែមថា សម្រាប់កិច្ចសហប្រតិបត្តិការយោធារវាងប្រទេសកម្ពុជា និងសហរដ្ឋអាមេរិក គឺជាការរួមចំណែកមួយដ៏សំខាន់សម្រាប់សន្តិសុខ សណ្តាប់ធ្នាប់ក្នុងតំបន់ ឬសកលលោក បើទោះបីជាប្រទេសកម្ពុជា ជាប្រទេសតូចក៏ដោយ ក៏កម្ពុជា គឺជាផ្នែកមួយនៃសណ្តាប់ធ្នាប់របស់ពិភពលោកផងដែរ។ សណ្តាប់ធ្នាប់ពិភពលោក គឺត្រូវការឱ្យមានការចូលរួមពីគ្រប់ផ្នែក គ្រប់ទិដ្ឋភាព និងបណ្តាប្រទេសទាំងអស់។
សម្រាប់លោកបណ្ឌិត ដៀប សុផល អ្នកស្រាវជ្រាវប្រវត្តិសាស្ត្រ និងទំនាក់ទំនងអន្តរជាតិ បានមើលឃើញថា គោលនយោបាយការបរទេសរបស់កម្ពុជា គឺសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានប្រកាសឱឡារិកនៅអង្គការសហប្រជាជាតិថា «កម្ពុជា មានទំនាក់ទំនង ល្អជាមួយបណ្តាប្រទេសទាំងអស់លើសកលលោក មិនមានប្រកាន់បក្ខពួក ឬខាងណាមួយនោះទេ» ហេតុដូច្នេះ កម្ពុជា ពុំមានការរឹតត្បិតលើកិច្ចសហប្រតិបត្តិការជាមួយប្រណាមួយផ្តាច់មុខនោះទេ កម្ពុជា ធ្វើកិច្ចសហប្រតិបត្តិការមួយដើម្បីផលប្រយោជន៍ទាំងអស់គ្នា។
លោកបណ្ឌិត ដៀប សុផល បានគូសបញ្ជាក់ដូច្នេះ «ការចូលចតរបស់នាវាចម្បាំងកងទ័ពជើងទឹកសហរដ្ឋអាមេរិក នៅកំពង់ផែស្វយ័តក្រុងព្រះសីហនុ មិនមែនជាការចូលចតក្នុងទិសដៅយុទ្ធសាស្ត្រយោធានោះទេ តែក្នុងទិសដៅមួយ ដើម្បីបម្រើឱ្យផលប្រយោជន៍សង្គម ការងារសង្គ្រោះបន្ទាន់ ដែលដំណាក់កាលមុនៗនោះ។ កងទ័ពកម្ពុជា និងសហរដ្ឋអាមេរិក ក៏បានរៀបចំធ្វើលំហាត់សមយុទ្ធរួមគ្នា ដោយគ្រានោះកងទ័ពអាមេរិកក៏ធ្លាប់ជួយជួសជុលសាលារៀន និងការងារមនុស្សធម៌មួយចំនួនផងដែរ»។
អ្នកស្រាវជ្រាវប្រវត្តិសាស្ត្រ និងទំនាក់ទំនងអន្តរជាតិរូបនេះ បានបញ្ជាក់បន្ថែមថា នាវាចម្បាំងកងទ័ពជើងទឹកសហរដ្ឋអាមេរិក ដែលបានចូលចតនៅកម្ពុជាឡើងវិញ គឺគ្មានអ្វីប្លែកនោះទេ គ្រាន់តែទំនាក់ទំនងនៃប្រទេសទាំងពីរ គឺបន្តនិរន្តរភាពធ្លាប់មានពីមុនមកនៅថ្ងៃនេះ ឬថ្ងៃអនាគត។
សូមជម្រាបថា នាវាកងទ័ពជើងទឹករបស់អាមេរិកនេះ ដឹកនាំដោយលោកវរនាវីទោ Daniel A.sledz មេបញ្ជាការនាវា នឹងទស្សនកិច្ច នៅកម្ពុជារយៈពេល៥ថ្ងៃ ចាប់ពីថ្ងៃទី១៦ ដល់ថ្ងៃទី២០ ខែធ្នូ ឆ្នាំ២០២៤។ ការចូលមកដល់ផែរបស់កម្ពុជានាព្រឹកថ្ងៃនេះ កងទ័ពជើងទឹករបស់អាមេរិក ទទួលបានការស្វាគមន៍យ៉ាងកក់ក្តៅពីសំណាក់លោកវរនាវីឯក មាន សាវឿន មេបញ្ជាការ រងមូលដ្ឋាន សមុទ្ររាមកងទ័ពជើងទឹក ក៏ដូចជានាយនាវី មូលដ្ឋានសមុទ្ររាមជាច្រើនរូបទៀត។
ក្រសួងការពារជាតិ បានបញ្ជាក់ថា ការចូលសំចតនាវារបស់សហរដ្ឋអាមេរិកនេះ ក្នុងគោលបំណងពង្រឹង និងពង្រីកចំណងមិត្តភាព ក៏ដូចជាការលើកកម្ពស់នៃកិច្ចសហប្រតិបត្តិការទ្វេភាគីរវាងព្រះរាជាណាចក្រកម្ពុជា និងសហរដ្ឋអាមេរិក។
ក្រសួងការពារជាតិ បានឱ្យដឹងផងដែរថា ចាប់តាំងពីឆ្នាំ២០០៧ ការចូលសំចតនាវា ចម្បាំងកងទ័ពជើងទឹកសហរដ្ឋអាមេរិក មានចំនួន២៧គ្រឿង ដែលការចូលសំចតលើកនេះជាលើកដំបូងបន្ទាប់ពីខកខានអស់រយៈពេល០៨ឆ្នាំ។ ក្នុងអំឡុងពេលសំចតនៅក្នុងប្រទេសកម្ពុជា រយៈពេល ៥ថ្ងៃនេះ គណៈប្រតិភូនាវាបានរៀបចំផែនការសកម្មភាពជាបន្តបន្ទាប់ផងដែរ ដើម្បីជំរុញការផ្លាស់ប្តូរវប្បធម៌ និងកិច្ចសហប្រតិបត្តិការ។
ក្នុងផែនការសកម្មភាពដែលបានគ្រោងទុករួមមាន ជំនួបពិភាក្សាការងារជាមួយមេបញ្ជាការមូលដ្ឋានសមុទ្ររាម ជំនួបពិភាក្សាការងារជាមួយថ្នាក់ដឹកនាំរដ្ឋបាល ខេត្តព្រះសីហនុ កម្មវិធីប្រកួតកីឡាមិត្តភាពរវាងក្រុមនាវិករបស់នាវាចម្បាំងសហរដ្ឋអាមេរិក និងកងទ័ពជើងទឹកកម្ពុជា ក្នុងន័យលើកកម្ពស់ភាពស្និទ្ធស្នាល និងការសាមគ្គីគ្នាជាក្រុម និងរួមមានកម្មវិធីជាលក្ខណៈមិត្តភាពមួយចំនួនទៀតផងដែរ។ ដំណើរទស្សនកិច្ចខាងលើនេះ ជាព្រឹត្តិការណ៍សំខាន់មួយទៀត នៃភាពជាដៃគូកាន់តែប្រសើរ ឡើង រវាងព្រះរាជាណាចក្រកម្ពុជា និងសហរដ្ឋអាមេរិក៕
