(ភ្នំពេញ)៖ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានទទួលយកសំណើរបស់ប្រធានាធិបតី និងប្រធានសភាអ៊ុយក្រែន អញ្ជើញទៅបំពេញទស្សនកិច្ចនៅអ៊ុយក្រែន ក្នុងពេលវេលាសមស្របណាមួយនាពេលខាងមុខ។ សម្តេចតេជោ ធ្លាប់បានទស្សនកិច្ចនៅទីក្រុងគៀវរួចម្តងមកហើយកាលពីឆ្នាំ១៩៨១។
នៅព្រឹកថ្ងៃអង្គារ ទី១៧ ខែធ្នូ ឆ្នាំ២០២៤នេះ សម្ដេចតេជោ ហ៊ុន សែន បានអនុញ្ញាតឱ្យលោក អូឡេកសាន់ឌឺ ហ្កាម៉ាន ឯកអគ្គរដ្ឋទូតប្រទេសអ៊ុយក្រែន ចូលជួបសម្ដែងការគួរសមនៅវិមានព្រឹទ្ធសភា រាជធានីភ្នំពេញ។
ក្នុងជំនួបនេះ សម្តេចតេជោប្រធានព្រឹទ្ធសភាកម្ពុជា បានសម្តែងការសោកស្តាយចំពោះសោកនាដកម្ម និងការបំផ្លិចបំផ្លាញដោយសារសង្គ្រាមនៅអ៊ុយក្រែន រយៈពេល៣ឆ្នាំកន្លងទៅនេះ។
សម្តេចតេជោ ហ៊ុន សែន បានគូសបញ្ជាក់ថា កម្ពុជាស្គាល់ច្បាស់ពីផលលំបាក ទុក្ខវេទនា និងរសជាតិសង្គ្រាម ហើយសម្តេច ដឹងយ៉ាងប្រាកដថា «មិនអាចយកសង្គ្រាមបញ្ចប់សង្គ្រាមបានទេ»។
សម្តេចតេជោ ក៏បានលើកឡើងពីការសម្រេចចិត្តចុះចេញពីអំណាចជានាយករដ្ឋមន្ត្រី។ សម្តេចតេជោ បានបញ្ជាក់ថា ការចុះចេញពីអំណាច ពេលនៅមានកម្លាំង និងមានប្រជាប្រិយភាពខ្ពស់បំផុត ដើម្បីប្តូរនឹងសុខសន្តិភាព និងស្ថិរភាពរយៈពេលវែងសម្រាប់កម្ពុជា។
លោក អូឡេកសាន់ឌឺ ហ្កាម៉ាន បានថ្លែងអំណរគុណ សម្តេចតេជោ និងសម្តែងនូវក្តីរីករាយដែលបានជួបសម្តេចតេជោជាថ្មី បន្ទាប់ពីជំនួបនៅក្នុងអំឡុងកិច្ចប្រជុំកំពូលអាស៊ាននៅឆ្នាំ២០២២។
លោកឯកអគ្គរដ្ឋទូតអ៊ុយក្រែន បានថ្លែងអំណរគុណសម្តេចតេជោ ដែលកន្លងមក មានគោលជំហរជ្រើសយកច្បាប់អន្តរជាតិប្រឆាំងការឈ្លានពានរបស់រុស្ស៊ី និងសមានចិត្តចំពោះប្រទេសអ៊ុយក្រែន តាមរយៈការគាំទ្រនានាជាបន្តបន្ទាប់។ លោកឯកអគ្គរដ្ឋទូត ក៏បានជម្រាបសម្តេចតេជោ អំពីកិច្ចប្រជុំកំពូលលើកទី១ស្តីពីសន្តិភាពនៅអ៊ុយក្រែន នៅប្រទេសស្វីស កាលពីខែមិថុនា ឆ្នាំ២០២៤ និងបច្ចុប្បន្នភាពនៃស្ថានភាពដ៏លំបាកលំបិន ដែលអ៊ុយក្រែនកំពុងជួបប្រទះផងដែរ។
លោក អូឡេកសាន់ឌឺ ហ្កាម៉ាន បានសម្តែងការដឹងគុណយ៉ាងជ្រាលជ្រៅចំពោះកម្ពុជា ដែលបានជួយបណ្តុះបណ្តាលអ្នកដោះមីនអ៊ុយក្រែនជាច្រើនលើក។ លោក បានបញ្ជាក់ថា អ៊ុយក្រែនអាចនឹងប្រើពេលប្រមាណ ១០០ឆ្នាំ ក្នុងការបោសសម្អាតមីនទូទាំងប្រទេស ប្រសិនបើគ្មានការចូលរួមគាំទ្រពីសហគមន៍អន្តរជាតិ រួមទាំងកម្ពុជា។
លោកឯកអគ្គរដ្ឋទូត ក៏បានសង្កត់ធ្ងន់ថា ជំនួបថ្នាក់ដឹកនាំរបស់អ៊ុយក្រែន និងថ្នាក់ដឹកនាំកម្ពុជា ជាពិសេសជាមួយសម្តេចតេជោនាពេលកន្លងមក សបញ្ជាក់ឱ្យឃើញអំពីទំនាក់ទំនងល្អនៃប្រទេសទាំងពីរ។
ឆ្លៀតក្នុងជំនួបនោះ លោកឯកអគ្គរដ្ឋទូត បានពាំនាំការអញ្ជើញសម្តេចតេជោ ទៅបំពេញទស្សនកិច្ចនៅអ៊ុយក្រែន ពីសំណាក់ប្រធានាធិបតី និងប្រធានរដ្ឋសភាអ៊ុយក្រែន។
សម្តេចតេជោ បានអរគុណឯកអគ្គរដ្ឋទូតអ៊ុយក្រែន ចំពោះការវាយតម្លៃអំពីស្ថានការណ៍បច្ចុប្បន្ននៅអ៊ុយក្រែន។ សម្តេចតេជោ បានមានប្រសាសន៍ថា កម្ពុជាយល់ច្បាស់ពីសង្គ្រាម ហើយវាមិនមែនជាការចៃដន្យនោះទេ ដែលកម្ពុជាជ្រើសយកការគោរពតាមច្បាប់អន្តរជាតិ ដើម្បីរក្សាបានសុខសន្តិភាព ហើយជំហរនេះកម្ពុជានឹងមិនផ្លាស់ប្តូរនោះឡើយ។
សម្តេចតេជោ បានបញ្ជាក់ផងដែរថា កម្ពុជានឹងបន្តយន្តការគាំទ្រ និងបណ្តុះបណ្តាលអ្នកដោះមីន ដោយសហការជាមួយប្រទេសជប៉ុន។ សម្តេចតេជោ បានរំលឹកថា សម្តេច បានឆ្លើយតបទៅនឹង ប្រធានសភាអ៊ុយក្រែនថា កម្ពុជាអាចបញ្ជូនកងកម្លាំងថែរក្សាសន្តិភាព (រួមទាំងអ្នកដោះមីន) ទៅក្រៅប្រទេស តែក្រោមឆ័ត្រអង្គការសហប្រជាជាតិប៉ុណ្ណោះ។
សម្តេចតេជោ បានរំលឹកផងដែរថា ក្នុងឋានៈជាមេដឹកនាំកម្ពុជា និងប្រធានអាស៊ាននាពេលកន្លងមក សម្តេច បានបន្តចែករំលែកនូវបទពិសោធន៍ និងទស្សនៈរបស់សម្តេចតេជោ លើអភិក្រមយុទ្ធសាស្ត្រគ្រប់គ្រងស្ថានការណ៍សង្គ្រាម និងយុទ្ធសាស្ត្រនៃកិច្ចការចរចាស្វែងរកសន្តិភាពជូនកម្ពុជា ដោយគូសបញ្ជាក់ថា រាល់ការចរចាសន្តិភាព ដែលទទួលបានជោគជ័យ ត្រូវតែមានការចូលរួមពីភាគីជម្លោះពាក់ព័ន្ធ ហើយត្រូវចាប់ពីតូចទៅធំ។
សម្តេចតេជោ ហ៊ុន សែន បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់អ៊ុយក្រែន ក្នុងការពង្រឹងទំនាក់ទំនងជាមួយកម្ពុជា។ សម្តេចតេជោ ក៏បានទទួលយកការអញ្ជើញទៅទស្សនកិច្ចនៅអ៊ុយក្រែន នាពេលវេលាសមស្របខាងមុខ បន្ទាប់ពីទស្សនកិច្ចរបស់សម្តេច នៅទីក្រុងគៀវ នៅឆ្នាំ១៩៨១។
ជាថ្មីម្តងទៀត លោកឯកអគ្គរដ្ឋទូតអ៊ុយក្រែន បានថ្លែងអំណរគុណសម្តេចតេជោ និងកម្ពុជា ចំពោះជំហរជាពេលកន្លងមក និងរង់ចាំទទួលទស្សនកិច្ច សម្តេចតេជោ នាពេលខាងមុខនៅអ៊ុយក្រែន៕
