(កណ្ដាល)៖ លោក នូ សុវណ្ណរិទ្ធ អភិបាលស្រុកអង្គស្នួល និងជាប្រធានអនុសាខាកាកបាទក្រហមកម្ពុជាស្រុក(ស្ដីទី) នៅថ្ងៃទី២៩ ខែធ្នូ ឆ្នាំ២០២៤នេះ បានដឹកនាំក្រុមការងារនាំយកអំណោយចុះចែកជូនដល់គ្រួសារក្រីក្រចំនួន ១០គ្រួសារ នៅសាលាឃុំក្រាំងម្កាក់។
លោកអភិបាលស្រុកបានថ្លែងថា ក្នុងករណីមានបញ្ហាខ្វះខាតសូមរាយការណ៍ជាបន្ទាន់ទៅក្រុមការងារនៅថ្នាក់ឃុំក្នុងការសម្របសម្រួល ប៉ុន្តែប្រសិនបើថ្នាក់ឃុំមិនមានលទ្ធភាព ថ្នាក់ឃុំសូមធ្វើការរាយការណ៍មកកាន់ក្រុមការងារថ្នាក់ស្រុកដើម្បីដោះស្រាយជូន ។
លោកបន្តថា បើបងប្អូនមានប័ណ្ណសមធម៌ និងប័ណ្ណ ប ស ស គាត់អាចប្រើប្រាស់សម្រាប់ពិនិត្យសុខភាព ដោយមិនមានបង់ថវិកានោះទេ។ សម្រាប់រដូវធ្លាក់ខ្យល់នេះ សូមថែរក្សាសុខភាពឱ្យបានល្អ។
សូមបញ្ជាក់ថា អំណោយក្នុងមួយគ្រួសារទទួលបាន៖ អង្ករ ២០គីឡូ , មី ០១កេស, ត្រីខ ០៥កំប៉ុង, ទឹកត្រី ០១យួ, មុង ០១, ភួយ ០១, កន្ទេល ០១, ក្រមា ០១, អាវ ០១, សាប៊ូ ០៣ដុំ, ចានកាធុនធំ ០១, បំពងទឹកក្តៅ ០១, ធុងទឹកតូច ០១, កំសៀវទឹកនិងតែកញ្ចប់ ០១, ចង្រ្កានហ្គាល និងចានស្រាក់ ០១, ឆ្នាំង ០២, ខ្ទះឆា វែក ផ្តិល ០១, កាំបិត កញ្ចែ្រងជ័រ ជ្រុញ ០១, អំបិល ស្ករ ០១ កញ្ចប់ , ម៉ាស់ ០១ដុំ និងថវិកា ៣០,០០០រៀល៕
