(ភ្នំពេញ)៖ ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានអំពាវនាវដល់អ្នកអភិវឌ្ឍលំនៅស្ថានទាំងអស់ រួមគ្នាអនុវត្តអនុសាសន៍សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ដែលចង់ឃើញប្រជាជនខ្មែរគ្រប់រូប មានផ្ទះសម្បែងរស់នៅសមរម្យ។

លោកឧបនាយករដ្ឋមន្ត្រី បានថ្លែងបែបនេះ ក្នុងឱកាសអញ្ជើញក្នុងពិធីបិទសន្និបាតសមាគមអ្នកវិនិយោគ អ្នកសាងសង់ និងស្ថាបត្យករកម្ពុជា (សវសសក) និងការចុះអនុស្សារណៈ និងជំនួបធុរកិច្ច នៅថ្ងៃទី១៧ ខែកុម្ភៈ ឆ្នាំ២០២៥ នៅសណ្ឋាគារ ហ៉ីម៉ាវ៉ារី។

លោកបានអបអរសាទរ ដែលសមាគម សវសសក បានប្តូរអនុស្សារណៈនៃការយោគយល់គ្នា ជាមួយសមាគមអតីតនិស្សិតខ្មែរផ្នែកវិស្វកម្មនិងស្ថាបត្យកម្មពីប្រទេសចិន, សមាគមអតីតនិស្សិតខ្មែរមកពីប្រទេសសឹង្ហបុរី, សភាមុខរបរនិងមីក្រូសហគ្រាសកម្ពុជា, សមាគមអភិវឌ្ឍឧស្សាហកម្មរ៉ូបូតកម្ពុជា និងសហគមន៍ INNEX ។

ឧបនាយករដ្ឋមន្ត្រី សាយ សំអាល់ បានបញ្ជាក់យ៉ាងដូច្នេះថា «អីចឹងបើយើង ៣ ឬ៤នាក់ យើងជាដៃគូយុទ្ធសាស្ត្រគ្រប់ជ្រុងជ្រោយ ជួយគ្នាទៅវិញទៅមក ហើយជួយ Formulate policy (បង្កើតគោលនយោបាយ)។ ខ្ញុំអនុវត្តគោលនយោបាយរបស់សម្តេចធិបតី។ សម្តេចធិបតី មានប្រសាសន៍ថា ឥលូវធ្វើម៉េចឲ្យប្រជាជនខ្មែរគ្រប់រូប មានផ្ទះសម្បែងនៅស្រួលបួល ជីវភាពសមរម្យ [...]»។

អនុស្សារណៈនៃការយោគយល់គ្នា ទាំង ៦ស្ថាប័ន ត្រូវបានបង្កើតឡើងក្នុងគោលបំណង៖

* ១៖ សហការ និងគាំទ្រគ្នាលើការរៀបចំវគ្គបណ្តុះបណ្តាល សិក្ខាសាលាអប់រំ កម្មវិធីពិព័រណ៍ ការប្រកួតប្រជែងស្នាដៃ ការងារសង្គម មនុស្សធម៌ និងសប្បុរសធម៌
* ២៖ គាំទ្រគ្នាលើការផ្សារភ្ជាប់អ្នកវិនិយោគ និងអ្នកអភិវឌ្ឍទាំងក្នុងនិងក្រៅប្រទេស ដោយធ្វើការជាមួយគ្នា
* ៣៖ ការទទួលសិស្សនិស្សិតចុះកម្មសិក្សាផ្ទាល់ដល់រោងចក្រ សហគ្រាស ក្រុមហ៊ុន ព្រមទាំងផ្តល់ឱកាសហាត់ការ និងការងារ
* ៤៖ ការផ្តល់ឱកាសអាជីវកម្ម និងគម្រោងពាក់ព័ន្ធឱ្យគ្នាទៅវិញទៅមក
* ៥៖ ការជួយប្រឹក្សាយោបល់គ្នាទៅវិញទៅមក លើជំនាញវិជ្ជាជីវៈរបស់សមាគម។

លោក សេង ប៊ុនវីរៈ ប្រធានគណៈកម្មការប្រតិបត្តិ សមាគម សវសសក បានឲ្យដឹងថា សមាគមបង្កើតឡើងក្នុងគោលបំណងសំខាន់ៗចំនួន ០៥ ដូចខាងក្រោម៖

* ១៖ ការប្រមូលផ្តុំធនធានមនុស្ស៖ ប្រមូលផ្តុំអ្នកបច្ចេកទេស វិស្វករ ស្ថាបត្យករ អ្នកសាងសង់ អ្នកវិនិយោគ អ្នកមានចំណេះដឹងពាក់ព័ន្ធ ដើម្បីចូលរួមបំពេញទិសដៅអភិវឌ្ឍក្នុងវិស័យសំណង់កម្ពុជា ប្រកបដោយស្មារតីសាមគ្គីភាព
* ២៖ ការកៀរគរអ្នកវិនិយោគ៖ ពង្រឹងយន្តការសម្របសម្រួលទំនាក់ទំនង និងកៀរគរអ្នកវិនិយោគជាតិ និងអន្តរជាតិ លើវិស័យសំណង់ ស្ថាបត្យកម្ម និងការវិនិយោគអចលនទ្រព្យ ដើម្បីពង្រីកវិសាលភាពវិស័យសំណង់ និងស្ថាបត្យកម្មកម្ពុជា
* ៣៖ ការពារផលប្រយោជន៍ និងពង្រឹងសមត្ថភាពរបស់សមាជិកសមាគម
* ៤៖ ការផ្តល់ឱកាសអាជីវកម្ម៖ ជួយស្វែងរកប្រភពចំណូលជូនសមាជិក និងសម្របសម្រួលភាពជាដៃគូក្នុងការអនុវត្តគម្រោង
* ៥៖ ការបណ្តុះបណ្តាល៖ ចូលរួមបណ្តុះបណ្តាលយុវជនជំនាន់ក្រោយ លើជំនាញ និងបច្ចេកវិទ្យាពាក់ព័ន្ធ វិស័យសំណង់ ស្ថាបត្យកម្ម និងវិនិយោគ៕