(កំពង់ធំ)៖ លោក អោង ប៊ុនធឿន ត្រូវបានប្រកាសចូលកាន់ដំណែងជាប្រធានមន្ទីរបរិស្ថានខេត្តកំពង់ធំថ្មី ជំនួសលោក តុប កក្កដា ដែលបានទទួលភារកិច្ចថ្មី ក្រោមវត្តមានលោក សាន វណ្ណទី រដ្ឋលេខាធិការក្រសួងបរិស្ថាន និងលោក នួន ផារ័ត្ន អភិបាលខេត្តកំពង់ធំ នៅរសៀលថ្ងៃទី១៧ ខែកុម្ភៈ ឆ្នាំ២០២៥ នៅសាលាខេត្តដោយមានការអញ្ជើញចូលរួមពីមន្ត្រីពាក់ព័ន្ធប្រមាណ៣០០នាក់។
លោក នួន ផារ័ត្ន បានកោតសរសើរប្រធានមន្ទីរបរិស្ថាន ដែលបានត្រូវផ្លាស់ចេញនិងមន្ត្រីទាំងអស់ដែលបានខិតខំប្រឹងប្រែងទាំងកម្លាំងកាយចិត្តធ្វើការកន្លងមកដោយទទួលបាននូវផលិតផល។ លោកបន្តថា ការអភិរក្សគឺជារឿងសំខាន់ដែលត្រូវការពារឲ្យបានហ្មត់ចត់បំផុតដែលខេត្តកំពង់ធំ គឺជាខេត្តមួយសំបូរទៅដោយសម្បត្តិធនធានធម្មជាតិដែលមានតំបន់បឹងទន្លេសាបពិសេស មិនមែនមន្ទីរបរិស្ថានតែម្នាក់ឯង ពេលដែលត្រូវអនុវត្តសម្រាប់កិច្ចការពារធនធានធម្មជាតិ។
លោក សាន វណ្ណទី បានលើកឡើងថា ការប្រកាសចូលកាន់តំណែងថ្មីនេះត្រូវបញ្ជាក់ការទទួលខុសត្រូវរបស់អ្នកចាស់ផុតទទួលខុសត្រូវ ហើយអ្នកថ្មីត្រូវជំនួសដោយមានការទទួលត្រូវខ្ពស់ និងជាការចូលរួមរែកពន់របស់ រដ្ឋបាលថ្នាក់ក្រោមជាតិ ។
លោកបានណែនាំឱ្យថ្នាក់ដឹកនាំនិងមន្រ្តីទាំងអស់នៃមន្ទីរបរិស្ថានខេត្តកំពង់ធំបន្តពួតដៃគ្នា បន្តដំណើរលើផ្លូវតែមួយដើម្បីសម្រេចជោគជ័យថ្មីៗបន្ថែមទៀត ជូនប្រជាជន និងមាតុភូមិយើងទាំងអស់គ្នា ព្រមទាំងពង្រឹងការអនុវត្តច្បាប់ លិខិតបទដ្ឋានគតិយុត្តិនានា និងគោលការណ៍ណែនាំផ្សេងៗ របស់រាជរដ្ឋាភិបាល ក្រសួងបរិស្ថាន និងរដ្ឋបាលខេត្ត ដើម្បីបង្កើនប្រសិទ្ធភាពលើកិច្ចការពារ និងអភិរក្សធនធានធម្មជាតិ កិច្ចគាំពារបរិស្ថាន ការអប់រំផ្សព្វផ្សាយចំណេះដឹង និងព័ត៌មានបរិស្ថាន និងការលើកស្ទួយជីវភាពសហគមន៍មូលដ្ឋាន និងត្រូវមានសាមគ្គីភាព និងឯកភាពផ្ទៃក្នុងល្អ ពោលគឺសំដៅលុបបំបាត់ភាពអសកម្មទាំងឡាយនិងបង្កើនស្មារតីគោរព ក្រមសីលធម៌ វិជ្ជាជីវៈមន្ត្រីរាជការ ។
លោកបញ្ជាក់ថា ការបង្ក្រាបបទល្មើសនិងកិច្ចការពារធនធានបរិស្ថាននិងធម្មជាតិមិនមែនមន្ទីរបរិស្ថានតែម្នាក់ លុះត្រាតែមានការចូលរួមពីគ្រប់ភាគីពាក់ព័ន្ធនិងប្រជាពលរដ្ឋ។
លោក សាន វណ្ណទី បានបង្ហាញការជឿជាក់ថាលោកប្រធានមន្ទីរបរិស្ថានថ្មី នឹងបន្តកិច្ចខិតខំប្រឹងប្រែង កាន់តែខ្លាំងក្លាបន្ថែមទៀត ក្នុងការបំពេញតួនាទីភារកិច្ច ដើម្បីបុព្វហេតុបរិស្ថាន និងធនធានធម្មជាតិ សម្រាប់ខេត្តកំពង់ធំ។
លោក អោង ប៊ុនធឿន បានធ្វើការប្តេជ្ញាចិត្តខិតខំប្រឹងប្រែង និងយកចំណេះដឹង បទពិសោធន៍ កម្លាំងកាយ កម្លាំង ដើម្បីអនុវត្តន៍បំពេញតួនាទី និងភារកិច្ចថ្មីនេះ ឱ្យបានល្អប្រកបដោយ ភាពស្មោះត្រង់ ដោយផ្អែកលើច្បាប់ គោលនយោបាយ គោលការណ៍ណែនាំ លិខិត បទដ្ឋានគតិយុត្តជាធរមាន និងអនុសាសន៍ដឹកនាំឱ្យអស់ពីសមត្ថភាព អនុវត្តន៍តាមខ្លឹមសារនៃក្រមបរិស្ថាននិងធនធានធម្មជាតិ ជាពិសេស អនុវត្តន៍តាមយុទ្ធសាស្រ្តចក្រា ដែលមានសសរស្តម្ភចំនួនបី «ភាពស្អាត ភាពបៃតង និង ចីរភាព» ដែលសម្រាប់ចង្អុលបង្ហាញក្នុងការអនុវត្តលើវិស័យបរិស្ថាន និង ពង្រឹងការអនុវត្តច្បាប់មួយរយភាគរយលើរាល់បទល្មើស ដែលកើតមាន ឡើងក្នុងភូមិសាស្ត្រខេត្ត លើវិស័យបរិស្ថាន៕
