(ភ្នំពេញ)៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា នៅព្រឹកថ្ងៃទី១៩ ខែកុម្ភៈ ឆ្នាំ២០២៥នេះ បានផ្ដល់ការណែនាំដល់អាជ្ញាធរ និងអ្នកសាងសង់ផ្លូវ ឬកាយលូ ត្រូវគិតគូររៀបចំក្ដារដើម្បីសម្រួលឲ្យប្រជាពលរដ្ឋធ្វើដំណើរចេញចូលផ្ទះរបស់ពួកគាត់ មិនត្រូវកាយផ្លូវមុខផ្ទះរបស់ប្រជាពលរដ្ឋហើយទុកចោល នាំឲ្យមានការតិះតៀនដោយសារការលំបាកចេញចូលផ្ទះរបស់ពួកគាត់ឡើយ។
ក្នុងឱកាសអញ្ជើញជាអធិបតីចែកសញ្ញាបត្រជូននិស្សិតសាកលវិទ្យាល័យអាស៊ីអឺរ៉ុប ជាង២ពាន់នាក់, សម្ដេចមហាបវរធិបតី ហ៊ុន ម៉ាណែត ក៏បានក្រើនរំលឹកបន្ថែមផងដែរ ដល់អាជ្ញាធរមូលដ្ឋាននៅពេលរៀបចំបណ្ដាញលូមុនផែនការរបស់រដ្ឋទៅដល់ ហើយតម្រូវឲ្យប្រជាពលរដ្ឋជួយបដិភាគនោះ ត្រូវតែហៅប្រជាពលរដ្ឋមកពន្យល់ និងជជែកឲ្យបានច្បាស់លាស់អំពីក្របខណ្ឌ និងលក្ខខណ្ឌនៃការសាងសង់ ដើម្បីបញ្ចៀសការយល់ច្រឡំ។
សម្ដេចមហាបវរធិបតី ហ៊ុន ម៉ាណែត បានមានប្រសាសន៍យ៉ាងដូច្នេះថា «គ្រប់ក្រសួងស្ថាប័នទាំងអស់នៅពេលចុះទៅធ្វើផ្លូវឲ្យប្រជាជន ពេលខ្លះត្រូវកាយលូអមផ្លូវ ដើម្បីលើកដី ប៉ុន្ដែនៅពេលដែលកាយនេះមិនត្រូវទុកចោល ត្រូវជួសជុលដាក់ឈើឲ្យគាត់ភ្លាមផង កុំឲ្យមានបញ្ហា។ កាយដីភ្លាម ត្រូវដាក់ឈើ ឬក្ដាភ្លាម ខ្ញុំសូមឲ្យគិតគូរបែបនេះ មិនមែនដឹងតែធ្វើមួយមុខទេ ត្រូវគិតគូរពីវិធីសាស្ដ្រផងបន្ថែមផលប៉ះពាល់ដល់ជីវភាពរស់នៅរបស់ប្រជាពលរដ្ឋ»។
បើតាមប្រសាសន៍របស់សម្ដេចមហាបវរធិបតី នាយករដ្ឋមន្ដ្រីនៃកម្ពុជា, ក្រៅពីអាជ្ញាធរដែលត្រូវត្រួតពិនិត្យ និងគិតគូរហើយនោះ ក៏ត្រូវដាក់លក្ខខណ្ឌឲ្យបានច្បាស់លាស់ជាមួយក្រុមហ៊ុនឯកជន ដែលទទួលម៉ៅការបន្ដពីររដ្ឋផងដែរ ព្រោះក្នុងករណីមានការតិះតៀន ឬរិះគន់ប្រជាពលរដ្ឋតែងទម្លាក់ការចោទប្រកាន់នោះមកលើអាជ្ញាធរមានសមត្ថកិច្ច ឬរាជរដ្ឋាភិបាលតែម្ដង ថាមិនបានគិតគូរដល់ប្រជាពលរដ្ឋ។
ការណែនាំរបស់សម្ដេចប្រមុខនៃរាជរដ្ឋាភិបាលកម្ពុជា បន្ទាប់ពីកន្លងទៅថ្មីៗនេះ មានការជជែកគ្នាច្រើននៅលើបណ្ដាញសង្គម ពាក់ព័ន្ធករណីការដាក់លូមួយកង់តម្លៃ៤០ដុល្លារ នៅក្រុងប៉ោយប៉ែត ខេត្តបន្ទាយមានជ័យ។ ប៉ុន្ដែបញ្ហានេះ សម្ដេចមិនបានធ្វើការពន្យល់បន្ថែមទៀតឡើយ ដោយហេតុថា អាជ្ញាធរខេត្តបន្ទាយមានជ័យ បានពន្យល់គ្រប់គ្រាន់ហើយ ថារដ្ឋមិនបានទារលុយពីប្រជាពលរដ្ឋនោះ ពោលពលរដ្ឋមានលទ្ធភាពជាអ្នកទាក់ទងជាមួយក្រុមហ៊ុនឯកជន ដើម្បីសម្រួលដាក់លូមុខផ្ទះរបស់ពួកគាត់។
ក្នុងន័យនេះ សម្ដេចមហាបវរធិបតី ហ៊ុន ម៉ាណែត បានណែនាំដល់អាជ្ញាធរដែលត្រូវរៀបចំបណ្ដាញលូមុនផែនការរបស់រដ្ឋទៅដល់ ហើយតម្រូវឲ្យប្រជាពលរដ្ឋចូលរួមក្នុងកម្រិតណាមួយនោះ ទាមទារឲ្យមានការពន្យល់ឲ្យបានច្បាស់លាស់ដើម្បីកុំឲ្យមានបាតុភាពផ្សេងៗកើតឡើង។ ខណៈសម្ដេចបានអះអាងថា ក្នុងមួយឆ្នាំៗរាជរដ្ឋាភិបាលចំណាយលុយរាប់រយលានដុល្លារ ដើម្បីធ្វើផ្លូវទាំងផ្លូវជាតិ ផ្លូវខេត្ត និងផ្លូវលំជនបទជាដើម ក៏ប៉ុន្ដែតំបន់ខ្លះរីកចម្រើនលឿនជាងផែនការរបស់រដ្ឋ ដូច្នេះក៏មានការចូលរួមពីប្រជាពលរដ្ឋផងដែរ៕
