(តាកែវ)៖ នៅក្នុងកិច្ចប្រជុំជាមួយមន្រ្តីនគបាលយុត្តិធម៌នៅព្រឹកថ្ងៃពុធ ទី២ ខែមេសា ឆ្នាំ២០២៥ លោក ឯក ឆេងហ៊ួត ព្រះរាជអាជ្ញាអមសាលាដំបូងខេត្តតាកែវ បានណែនាំមន្រ្តីនគបាលយុត្តិធម៌ទាំងអស់ ត្រូវធ្វើការប្រកបដោយការទទួលខុសត្រូវខ្ពស់ និងត្រូវចាត់ទុកការទទួលខុសត្រូវប្រៀបដូចជាភារកិច្ចរបស់ខ្លួនផងដែរ។
ព្រះរាជអាជ្ញា បានថ្លែងថា មន្រ្តីនគបាលយុត្តិធម៌ជាសេនាធិការជួយដល់អយ្យការ ក្នុងការកសាងសំណុំរឿងហើយសំណុំរឿងដែលមានភាពរឹងមាំ គឺវាអាស្រ័យទៅចំលើយរបស់ជនសង្ស័យ អ្នកពាក់ព័ន្ធ និងភ័ស្តុតាងជាដើម។
លោកថា «ការងារទាំងអស់នេះ មិនត្រូវធ្វើឲ្យតែរួចពីដៃនោះទេ ហើយក៏មិនត្រូវគឹតថារឿងទាំងអស់នេះជាផលប្រយោជន៍របស់តុលាការនោះដែរ។ ព្រោះនៅពេលដែលតុលាការដោះលែងជនសង្ស័យថា អត់មានភ័ស្តុតាងគ្រប់គ្រាន់ មន្រ្តីនគបាលយុត្តិធម៌ក៏អាចធ្វើការតវ៉ាបានដែរ»។
លោក ឯក ឆេងហ៊ួត បានថ្លែងបន្តថា «រាល់សំណុំរឿងដែលចៅក្រម ព្រះរាជអាជ្ញា ចាត់ការមានភាពប្រក្រតី ឬមិនប្រក្រតីវាអាស្រ័យទៅលើការត្រួតពិនិត្យរបស់ក្រសួងយុត្តិធម៌ និងអធិការកិច្ចរបស់ឧត្តមក្រុមប្រឹក្សាអង្គចៅក្រម ដើម្បីដាក់ពិន័យចៅក្រម ព្រះរាជអាជ្ញា ដែលអនុវត្តន៍មិនត្រឹមត្រូវតាមច្បាប់។ នេះជារឿងរបស់ចៅក្រមព្រះរាជអាជ្ញា ចំណែករឿងមន្រ្តីនគបាលយុត្តិធម៌ ត្រូវតែអនុវត្តន៍តួនាទីភារកិច្ចរបស់ខ្លួនឲ្យបានត្រឹមត្រូវផងដែរ ហើយបើមានការអនុវត្តន៍មិនត្រឹមត្រូវទេ ត្រូវទទួលខុសត្រូវចំពោះមុខច្បាប់ព្រោះវាដល់ពេលវេលាវះកាត់ហើយ»។
បើតាមលោកព្រះរាជអាជ្ញាខេត្តតាកែវ ក្នុងឆ្នាំ២០២៤-២០២៥ តុលាការខេត្តតាកែវ ទទួលបានសំណុំរឿងជាង១ពាន់សំណុំរឿង ហើយបានចាត់ការអស់ជាច្រើនរឿង ដោយនៅសល់តែសំណុំរឿងប៉ុន្មាន៨០រឿងប៉ុណ្ណោះ៕
