(កំពង់ចាម)៖ លោកអភិសន្តិបណ្ឌិត ស សុខា ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ នៅព្រឹកថ្ងៃទី២ ខែមេសា ឆ្នាំ២០២៥នេះ បានអញ្ជើញសម្ពោធដោយប្រើប្រាស់អគារមួយខ្នង កំពស់២ជាន់ ទំហំ២៤ម៉ែត្រ គុណ១០ម៉ែត្រ ស្មើនិង១៤បន្ទប់ រួមជាមួយសមិទ្ធផលនានា ដែលជាអំណោយផ្តល់ជូនដោយក្រសួងមហាផ្ទៃ និងសប្បុរសជននានា នៅក្នុងស្នងការដ្ឋាននគរបាលខេត្តកំពង់ចាម។
លោកអភិសន្តិបណ្ឌិត ស សុខា បានថ្លែងថា នៅសល់ពេលមិនយូរទៀតនោះទេ ពិធីបុណ្យចូលឆ្នាំខ្មែរប្រពៃណីជាតិ នឹងខិតជិតមកដល់ ស្នើឲ្យអាជ្ញាធរខេត្ត អភិបាលក្រុង-ស្រុក ស្នងការរដ្ឋាននគរបាលខេត្តកំពង់ចាម និងអធិការក្រុង-ស្រុក ត្រូវយកចិត្តទុកដាក់ខ្ពស់ ចំពោះការងារថែរក្សា សន្តិសុខសណ្ដាប់ធ្នាប់ សុវត្ថិភាព ពិសេសជួយសម្រួលដល់ការធ្វើចរាចរណ៍របស់ប្រជាពលរដ្ឋ នៅពេលពួកគាត់ធ្វើដំណើរត្រលប់មកលេងស្រុកកំណើត ធ្វើយ៉ាងណា កុំឲ្យមានការកក់ស្ទះ ហើយរួមគ្នាទប់ស្កាត់កុំឲ្យភ្ញៀវទេសចរជាតិ និងអន្ដរជាតិ មានគ្រោះថ្នាក់ក្នុងពិធីបុណ្យចូលឆ្នាំខ្មែរ។
លោកអភិសន្តិបណ្ឌិត បានបន្ថែមថា ចំពោះការការពារភូមិ-ឃុំ-សង្កាត់ មានសុវត្ថិភាពកងកម្លាំងនគរបាល ខេត្ត-ក្រុង-ស្រុក ត្រូវបង្កើនកិច្ចសហការក្នុងការថែរក្សាសន្ដិសុខសណ្ដាប់ធ្នាប់សាធារណៈ និងសុវត្ថិភាពក្នុងសង្គម តាមរយៈការលើកកម្ពស់វិធានការជំនាញ ដើរទន្ទឹមនឹងការខិតខំជំរុញឲ្យមានការចូលរួមពីសំណាក់ប្រជាពលរដ្ឋ ក្នុងការអនុវត្តគោលនយោបាយ «ភូមិ-ឃុំសង្កាត់ មានសុវត្ថិភាព» ព្រោះការងារថែរក្សាភូមិ ឃុំមានសុវត្ថិភាព មិនអាចខ្វះការចូលរួមពីសំណាក់ប្រជាពលរដ្ឋបានទេ ដោយសារកម្លាំងនគរបាលប៉ុស្ដិ៍មានចំនួនតិច ហើយប្រៀបជាមួយចំនួនប្រជាពលរដ្ឋក្នុងឃុំ-សង្កាត់ មានចំនួនច្រើន អាចត្រួតពិនិត្យបានគ្រប់ជ្រុងជ្រោយ។
ក្នុងឱកាសនោះ លោក អ៊ុន ចាន់ដា អភិបាលខេត្តកំពង់ចាម បានលើកឡើងថា កន្លងមកតាមរយៈការគាំទ្រ និងជំរុញការផ្សព្វផ្សាយការអនុវត្តគោលនយោបាយ «ភូមិ-ឃុំ-សង្កាត់ មានសុវត្ថិភាព» បានចំនួន២១,០៦៧លើក មានប្រជាពលរដ្ឋចូលរួម១,១៨៤,៧២០ដងនាក់។
ជាមួយគ្នានេះ វេទិកាសាធារណៈផ្សាភ្ជាប់រវាងនគរបាល ជាមួយប្រជាពលរដ្ឋដើម្បីទទួល យកសំណូមពរ និងដំណោះស្រាយ ទុក្ខកង្វល់របស់ប្រជាពលរដ្ឋ បានចំនួន១៣,៣៩៤លើក មានប្រជាពលរដ្ឋចូលរួម៤៣០,៥៦១នាក់។ ជាមួយនឹងកិច្ចខិតខំប្រឹងប្រែងរបស់កងកម្លាំង សមត្ថកិច្ចបានចូលរួមទប់ស្កាត់ និងបង្ក្រាបបទល្មើសទទួលបានលទ្ធផលគួរឲ្យកត់សម្គាល់៕
