(កំពង់ធំ)៖ នៅឃុំផាត់សណ្ដាយ ខេត្តកំពង់ធំ កាលពីរសៀលថ្ងៃទី៣១ ខែមីនា ឆ្នាំ២០២៥ បានរៀបចំសិក្ខាសាលាស្ដីពីការចែករំលែកបទពិសោធន៍ក្នុងការរៀបចំសហគមន៍ទេសចរណ៍ស្របតាមស្តង់ដារសហគមន៍ទេសចរណ៍អា ស៊ានក្របខណ្ឌបណ្តាញអេកូទេសចរណ៍បឹងទន្លេសាប។

ពិធីនេះប្រព្រឹត្តទៅក្រោមអធិបតីភាពលោកបណ្ឌិត ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ និងជាប្រធានលេខាធិការដ្ឋាន (គ.ជ.អ.អ) លោក យុក សេងឡុង នាយកប្រតិបត្តិអង្គការសម្ព័ន្ធភាព ដើម្បីអភិរក្សធនធានជលផល (FACT) និងជាអនុប្រធានអចិន្ត្រៃយ៍ក្រុមប្រឹក្សាភិបាលបណ្ដាញអេកូទេសចរណ៍បឹងទន្លេសាប បានដឹកនាំគណៈប្រតិភូ មានប្រធាន អនុប្រធានមន្ទីរទេសចរណ៍ទូទាំង២៥ រាជធានី-ខេត្ត មេឃុំផាត់សណ្ដាយ, មន្ត្រីខណ្ឌរដ្ឋបាលជលផលកំពង់ធំ សហគមន៍នេសាទអេកូទេសចរណ៍ ផាត់សណ្ដាយ និងអាជ្ញាធរពាក់ព័ន្ធ ចូលរួមសិក្សារៀនសូត្រទទួលយកបទពិសោធន៍ល្អៗរយៈពេល១ថ្ងៃស្ថិតនៅក្នុងតំបន់ឃុំផាត់សណ្ដាយ ក្នុងខេត្តកំពង់ធំ។

ក្នុងសិក្ខាសាលាខាងលើនេះ លោកប្រធានមន្ទីរទេសចរណ៍ខេត្តកំពង់ធំ បានលើកឡើងឲ្យដឹងថា បច្ចុប្បន្នមន្ទីរទេសចរណ៍ខេត្តកំពង់ធំ បានធ្វើកិច្ចបានធ្វើការងារនេះជាមួយរដ្ឋបាលខេត្ត ដោយបានចាប់ផ្ដើមស្រង់ស្ថិតិចំ នួនភ្ញៀវទេសចរណ៍ពីសហគមន៍ទេសចរណ៍ ព្រោះកន្លងមកសហគមន៍នេសាទអេកូទេសចរណ៍ពុំសូវមានភ្ញៀវស្គាល់ច្រើននោះទេ តែបច្ចុប្បន្ននេះដោយមានការរៀបចំ និងបង្កើតជាសហគមន៍នេសាទអេកូទេសចរណ៍ដោយអង្គ ការ(FACT) ជួយទំនុកបម្រុង ធ្វើឱ្យភ្ញៀវទេសចរណ៍ស្គាល់កាន់តែច្រើននិងបានចូលមកលេងកំសាន្តទស្សនាព្រៃលិចទឹកធម្មជាតិ មេពូជត្រីធំៗដែលត្រូវបានអភិរក្ស និងតំបន់កំសាន្តនានាជាច្រើនទៀតនៅក្នុងសហគមន៍ នេសាទអេកូទេសចរណ៍ ក្នុងឃុំផាត់សណ្តាយពីមួយថ្ងៃទៅមួយថ្ងៃសហគមន៍ទទួលបានភ្ញៀវចូលមកទស្សនាពីគ្រប់មជ្ឈដ្ឋាន។

ម្យ៉ាងនៅទីនេះ គឺមានការអភិរក្សពូជត្រីធំៗបានច្រើនដែលទទួលបានការចាប់អារម្មណ៍ពីសំណាក់ភ្ញៀវជាតិ និងភ្ញៀវបរទេស មិនថាវិស័យឯកជន ឬវិស័យរដ្ឋនោះទេ គឺគេចង់មកលេងកម្សាន្តនៅទីនេះ ព្រោះនៅសហគមន៍នេសាទ អេកូទេសចរណ៍ក្នុងតំបន់ផាត់សណ្តាយនេះ បានរៀបចំផ្ទះស្នាក់ នៅសេវាដឹកជញ្ជូនភ្ញៀវកំសាន្តតាមទូក សេវាម្ហូប អាហារ ពិសេសគឺរក្សាបាននៅសន្តិសុខ សុវត្ថិភាពនិងស ណ្ដាប់ធ្នាប់សាធារណៈបានយ៉ាងល្អប្រសើ។

លោក យុក សេងឡុង បានលើកឡើងឲ្យដឹងថា «នេះជាមោទនភាពថ្មីមួយទៀតដែលអង្គការ (FACT) បានចូលមកជួយនៅក្នុងឃុំផាត់សណ្ដាយនេះ គឺមានរយៈពេល៧ឆ្នាំមកហើយតាំង ពីដើមឆ្នាំ២០១៩មក រយៈពេល៧ឆ្នាំ កន្លងមកនេះក៏មាន ការចូលរួមជ្រោមជ្រែងពីក្រសួងទេសចរណ៍ពិសេសគឺលោកបណ្ឌិត ជុក ជំនោរ ដែលជាអ្នកដឹកនាំក្រុមការងារបច្ចេកទេសនៅក្នុងមូលដ្ឋាន និងរួមសហការជាមួយមន្ទីរទេសចរណ៍ខេត្តកំពង់ធំ ដែលបានចូលរួមជួយជំរុញលើជំនាញបច្ចេកទេសសេវាកម្មអេកូទេសចរណ៍នៅក្នុងឃុំផាត់សណ្ដាយនេះ»។

លោកបានបន្តឲ្យដឹងទៀតថា ដោយឡែកដំណើរទស្សនកិច្ចសិក្សារៀនសូត្ររបស់ប្រធាន អនុប្រធានមន្ទីរជុំវិញរាជធានី-ខេត្ត នៅទូទាំងប្រទេសនេះ ក៏ជាសកម្មភាពការងារមួយស្ថិតនៅក្រោមក្របខណ្ឌបណ្ដាញ អេកូទេសចរណ៍ បឹងទន្លេសាប ដែលហៅកាត់ថា (TEN) ដែលគណៈកម្មការជាតិរួមជាមួយនឹងក្រសួងទេសចរណ៍ សហការជាមួយអង្គការ (FACT) ដោយបានសហការគ្នាបង្កើតឡើងនៅចុងឆ្នាំ២០២២ ក៏បានទទួលនូវសេចក្តីសម្រេច ក៏ដូចជាសេចក្តីប្រកាសនៅក្នុងការបង្កើតបណ្ដាញនេះជាផ្លូវការពីលោករដ្ឋមន្ត្រីក្រសួងទេសចរណ៍ ក៏ដូចជាប្រធានគណៈកម្មការជាតិ។

ទាំងអស់គ្នាមានសង្ឃឹមនិងជឿជាក់ថា តាមរយៈដំណើរទស្សនកិច្ចនេះ៖

*ទី១៖ ចែករំលែកនូវបទពិសោធន៍
*ទី២៖ បានទទួលនូវបទពិសោធន៍និងការណែនាំល្អៗពីគណៈប្រតិភូ ដូច្នេះសង្ឃឹមយ៉ាងមុតមាំថា សហគមន៍នេសាទអេកូទេសចរណ៍ផាត់សណ្ដាយនេះ នឹងទទួលបាននូវមតិយោបល់ល្អៗ និងធ្វើការអភិវឌ្ឍន៍បន្ថែមទៀត ទៅលើសេវាកម្មទទួល ភ្ញៀវទេសចរណ៍ ដើម្បីទាក់ទាញភ្ញៀវពីគ្រ ប់មជ្ឈដ្ឋានអោយចូលមកទស្សនាកម្សាន្តនៅក្នុងតំបន់ស ហគមន៍ទេសចរណ៍ ក្នុងឃុំផាត់សណ្ដាយនេះ។

លោកបណ្ឌិត ជុក ជំនោរ បានលើកឡើងថា ដោយទទួលបានការអនុញ្ញាតដ៏ខ្ពង់ខ្ពស់ពីលោក ហួត ហាក់ រដ្ឋមន្ត្រីក្រសួងទេសចរណ៍ គឺក្រុមការងារជំនាញ នៃអគ្គនាយកដ្ឋានអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ និងលេខាធិការដ្ឋាន នៃគណៈកម្មាធិការជាតិគ្រប់គ្រង អភិវឌ្ឍន៍សហគមន៍ទេសចរណ៍ និងអេកូទេសចរណ៍ សហការជាមួយនឹងអង្គការសម្ព័ន្ធភាព ដើម្បីអភិរក្សធនធានជលផល ហៅកាត់ថាអង្គការ (FACT) រួមជាមួយនឹងមន្ទីរ ទេសចរណ៍ខេត្តកំពង់ធំ ដោយបានរៀបចំជាសិក្ខាសាលា ស្ដីពីការចែករំលែកបទពិសោធន៍នៅក្នុងការរៀបចំសហគមន៍ស្របទៅតាមស្តង់ដាសហគមន៍ទេ សចរណ៍អាស៊ានដោយយកនូវបទពិសោធន៍ក្នុងការអភិវឌ្ឍន៍ល្អៗដូចជា ការជោគជ័យ នៃសហគមន៍នេសាទអេកូទេសចរណ៍ផាត់សណ្ដាយដើម្បី ជំរាបជូនទៅដល់ក្រុមការងារមន្ទីរទេសចរណ៍២៥រាជធានី-ខេត្ត។

លោកបណ្ឌិតបានបញ្ជាក់ឱ្យដឹងទៀតថា ដោយសារថ្ងៃនេះ ក្រសួងទេសចរណ៍បានអញ្ជើញអស់លោក-លោកស្រីដែល ជាប្រធានអនុប្រធានមន្ទីរទេសចរណ៍ និងក្រុមការងារមន្ទីរទេសចរណ៍ដែលទទួលការងារទេសចរណ៍ និងអេកូទេសចរណ៍ទាំង២៥រាជធានី-ខេត្ត មកចូលរួមសិក្ខាសាលានៅតំបន់សហគមន៍នេសាទអេកូទេសចរណ៍ផាត់សណ្ដាយ ក្នុងខេត្តកំពង់ធំ ក្នុងគោលបំណងរៀបចំសិក្ខាសាលាជាការចែករំលែកនៅអ្វីដែលការអនុវត្តល្អៗ អំពីបញ្ហាប្រឈមនានា ក៏ដូចជារាល់ដំណោះស្រាយដែលបានអនុវត្តកន្លងមក ក្នុងការបញ្ចូលសកម្មភាពអេកូទេសចរណ៍នៅក្នុងសហគមន៍នេសាទផាត់ស្ដាយនេះ។

ជាក់ស្ដែងសង្កេតឃើញថា សហគមន៍នេសាទអេកូទេសចរណ៍ផាត់សណ្ដាយនេះ ក៏បានអនុវត្តទៅតាមស្តង់ដារសហគមន៍ទេសចរណ៍អាស៊ាន ហើយរហូតឈានទៅទទួលបានជ័យលាភីរង្វាន់ទេសចរណ៍អាស៊ាន ដែលបានឡើងទៅទទួលជ័យលាភីកាលពីវេទិកាទេសចរណ៍អាស៊ានដែ លបានប្រព្រឹត្តទៅកាលពីអំឡុងខែមករា ឆ្នាំ២០២៥នៅប្រទេសម៉ាឡេស៊ី។

អ្វីដែលយើងបានឃើញនៅក្នុងសហគមន៍ទេសចរណ៍ផាត់សណ្ដាយការរៀបចំគឺរក្សាបាននៅតុល្យភាព និងមានការអភិរក្សនូវធនធានធម្មជាតិ ជាពិសេសធនធានជលផល និងធនធានធម្មជាតិព្រៃឈើ គឺមានការរីកចម្រើន ជាបន្តបន្ទាប់ ពិសេសចំពោះការផ្ដល់សេវាកម្មជូនភ្ញៀវទេសចរណ៍ ដូចជាសេវាកម្មផ្ទះស្នាក់ សេវាកម្មម្ហូបអាហារ សេវាកម្មដឹកជញ្ជូនភ្ញៀវតាមទូក ក៏ដូចជាសេវាកម្មផ្សេងៗជាច្រើនទៀត។

ឆ្លងតាមសិក្ខាសាលារយៈពេលមួយ ថ្ងៃឃើញថាអស់លោក-លោកស្រីប្រធាន-អនុប្រធានមន្ទីរទេសចរណ៍ទាំងអស់ដែលអញ្ជើញមកពីតាមបណ្ដារាជធានី-ខេត្តនៅកម្ពុជា មានការចាប់អារម្មណ៍ចំពោះការរៀបចំ និងការរីកចម្រើនរបស់សហគមន៍នេសាទអេកូទេសចរណ៍ផាត់សណ្តាយនេះផងដែរ៕