(សៀមរាប)៖ លោក ហួត សូនី ប្រធានក្រុមការងារ «តស់ៗលេងទឹក» នៅតំបន់មាត់ស្ទឹងសៀមរាប បានលើកឡើងថា តំបន់តស់ៗលេងទឹកនៃព្រឹត្តិការណ៍អង្គរសង្ក្រាន្តឆ្នាំ២០២៥ បាននិងកំពុងដំណើរការសាងសង់ និងរៀបចំលម្អផ្សេងៗ និងរៀបចំតុបតែងលម្អទីតាំង កន្លែងសម្រាប់លេង ល្បែងកម្សាន្តទាំងនៅលើគោក ព្រមទាំងនៅលើទឹកផងដែរ។
ដោយឡែក ពាងទឹក ដែលលាបព័ណ៌អមជាមួយអក្សញញឹមសាទរយ៉ាងស្រស់ស្អាត ត្រូវបានដាក់ពង្រាយនៅតំបន់នេះ បានប្រមាណ ៣០%ហើយ។ ជាមួយគ្នានេះ ក្រុមការងារតស់ៗលេងទឹក កំពុងតែញាប់ដៃញាប់ជើង ដើម្បីរៀបចំឱ្យបានរួចទាន់ពេលវេលា។
ការលើកឡើងយ៉ាងដូច្នេះរបស់លោក ហួត សូនី ក្នុងកិច្ចសម្ភាសជាមួយអ្នកសារព័ត៌មាន នារសៀលថ្ងៃទី០១ ខែមេសា ឆ្នាំ២០២៥ នៅតំបន់តស់ៗលេងទឹកនៃព្រឹត្តិការណ៍អង្គរសង្ក្រាន្តឆ្នាំ២០២៥ ដោយមានការចូលរួមពីអនុប្រធាន និងសមាជិក សមាជិកា និងក្រុមការងារផងដែរ។
លោកបានបន្តថា នៅតំបន់តស់ៗលេងទឹកនេះ គឺជាកន្លែងមួយដែលមានការចាប់អារម្មណ៍ និងមានភាពទាក់ទាញភ្ញៀវទេសចរជាតិ និងអន្តរជាតិ ដែលមកកម្សាន្តនៅក្នុងព្រឹត្តិការណ៍នេះជារៀងរាល់ឆ្នាំ ហើយកម្រនឹងទៅហួសកន្លែងនេះណាស់ ព្រោះជាកន្លែងត្រជាក់ និងចូលចិត្តលេងកម្សាន្ត ជាពិសេសយុវជនតែងតែប្រមូលផ្តុំគ្នានៅតំបន់នេះ។
លោក ហួត សូនី បញ្ជាក់ថា នៅតំបន់តស់ៗលេងទឹកនេះ មានកម្មវិធីលេងកម្សាន្តជាច្រើន មានដូចជា៖ ស្ពានញញឹមសាទរនៅដងស្ទឹង, ជិះកង់ធ្លាក់ទឹក, ប្រដាល់ធ្លាក់ទឹក, លេងទឹកជាមួយពពុះសាប៊ូនៅលើតង់, កញ្ញាធ្លាក់ទឹក និងកម្មផ្សេងៗជាច្រើនទៀត ហើយកម្មវិធីទាំងនេះ នឹងចាប់ផ្តើមលេងចាប់ពីថ្ងៃទី១៤ ដល់១៦ ខែមេសា ក្នុងព្រឹត្តិការអង្គរសង្កាន្ត នៃពិធីបុណ្យចូលឆ្នាំប្រពៃណីជាតិខ្មែរ។
ក្រៅពីការលេងទឹក ដែលក្រុមការងារបានរៀបចំរួច ក៏នឹងមានការបានបាញ់ទឹកពីក្រុមរថយន្តរបស់សមត្ថកិច្ចផងដែរ ដែលនឹងធ្វើឱ្យកម្មវិធីនេះរឹតតែសប្បាយ៕
