(ពោធិ៍សាត់)៖ លោក កែវ រតនៈ រដ្ឋមន្ត្រីក្រសួងរ៉ែ និងថាមពល នាថ្ងៃ២ ខែមេសា ឆ្នាំ២០២៥ នៅបញ្ជាការដ្ឋានកងពលតូចអន្តរាគមន៍លេខ១៤ ស្ថិតក្នុងឃុំត្នោតជុំ ស្រុកក្រគរ ខេត្តពោធិ៍សាត់ បានក្រើនរំលឹកដល់បងប្អូនកងទ័ព ត្រូវចូលរួមថែរក្សាការពារធនធានធម្មជាតិ និងអនុវត្តគោលនយោបាយរបស់ប្រមុខរាជរដ្ឋាភិបាល លើវិស័យការពារជាតិ ឱ្យបានរឹងមាំ និងទទួលបានជោគជ័យ ជូនជាតិមាតុភូមិ និងប្រជាជន។

លោក កែវ រតនៈ បានថ្លែងបែបនេះ ក្នុងពិធីជួបសំណេះសំណាល និងសួរសុខទុក្ខនាយទាហាន នាយទាហានរង និងពលទាហាន នៃកងពលតូចអន្តរាគមន៍លេខ១៤ ដើម្បីអបអរសាទរ ពីធីបុណ្យចូលឆ្នាំថ្មី ប្រពៃណីជាតិខ្មែរ ដែលនឹងខិតជិតមកដល់នាពេលខាងមុខ ដោយមានការចូលរួមពី លោក យឹម វិសិដ្ឋ ប្រធានអាជ្ញាធរអគ្គិសនីកម្ពុជា, លោក អូន ហេមរិទ្ធ អគ្គនាយករងអគ្គិសនីកម្ពុជា, លោក ងួន ប៉ោសេង អភិបាលរងខេត្ត ព្រមទាំងប្រតិភូមអមដំណើរ និងអាជ្ញាធរមូលដ្ឋានមួយចំនួនទៀត។

លោកឧត្តមសេនីយ៍ទោ គឹម សេងងន មេបញ្ជាការ នៃបញ្ជាការដ្ឋានកងពលតូចអន្តរាគមន៍លេខ១៤ បានថ្លែងអំណរគុណចំពោះ លោករដ្ឋមន្ត្រីក្រសួងរ៉ែ និងថាមពល និងប្រតិភូរួមដំណើរ ដែលតែងតែយកចិត្តទុកដាក់ លើកទឹកចិត្តដល់កងទ័ព និងគ្រួសារ សបញ្ជាក់ឱ្យឃើញច្បាស់ អំពីការគិតគូរ និងជួយសម្រួលដល់ជីវភាពរបស់កងទ័ព។ លោកបានជម្រាបជូន អំពីសកម្មភាពការងារអភិវឌ្ឍន៍នៅក្នុងអង្គភាព ការងារជួយសង្គម និងប្តេជ្ញាចិត្តរក្សាការពារអធិបតេយ្យភាព បូរណភាពទឹកដី ការពាររដ្ឋធម្មនុញ្ញ ព្រះមហាក្សត្រ និងរាជរដ្ឋាភិបាលស្របច្បាប់ ព្រមទាំងចូលរួមសហការជាមួយអាជ្ញាធរដែនដី ក្នុងការបង្កា និងទប់ស្កាត់បទល្មើសធនធានធម្មជាតិ យ៉ាងម៉ឺងម៉ាត់។

លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានពាំនាំនូវប្រសាសន៍ផ្តាំផ្ញើសាកសួរសុខទុក្ខ ពីសំណាក់សម្តេចតេជោ ហ៊ុន សែន ប្រធានព្រឹទ្ធសភា, សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងសម្តេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ជូនចំពោះបងប្អូនកងកម្លាំងទាំងអស់ នៃកងពលតូចអន្តរាគមន៍លេខ១៤ ក្នុងឱកាសអបអរសាទរ ពិធីបុណ្យចូលឆ្នាំថ្មី ប្រពៃណីជាតិខ្មែរនាពេលខាងមុខ។

លោកបានបន្តថា សម្តេចបវរធិបតី បានដាក់ចេញនូវកម្មវិធីនយោបាយជាច្រើន ដោយបានខិតខំកៀងគរអ្នកវិនិយោគចូលមកកម្ពុជា ជាពិសេសនៅក្នុងខេត្តពោធិ៍សាត់បន្ថែមទៀត ដើម្បីឱ្យប្រជាពលរដ្ឋ មានការងារធ្វើកាន់តែច្រើន ជីវភាពកាន់តែធូរធារ។ ហេតុនេះហើយបានជារាជរដ្ឋាភិបាល ក៏ដូចក្រសួងការពារជាតិ បានអនុវត្តកំណែទម្រង់កងកម្លាំងប្រដាប់អាវុធគ្រប់ប្រភេទ ដើម្បីធានាបាន នូវកិច្ចការពារជាតិប្រកបដោយប្រសិទ្ធភាព រក្សាបាននូវអធិបតេយ្យភាព បូរណភាពទឹកដី សន្តិសុខ សុវត្ថិភាព និងសណ្តាប់ធ្នាប់សាធារណៈ។

លោកបានគូសបញ្ជាក់ថា៖ «កងយោធពលខេមរភូមិន្ទ ប្តេជ្ញាយ៉ាងម៉ឺងម៉ាត់ ក្នុងការអនុវត្តគោលនយោបាយរបស់រាជរដ្ឋាភិបាល លើវិស័យការពារជាតិឱ្យបានជោគជ័យ ហើយនឹងបន្តដើរតួនាទីជាកម្លាំងស្នូល និងឈានមុខក្នុងការថែរក្សាការពារសន្តិភាព សន្តិសុខ ស្ថិរភាព និងផលប្រយោជន៍ជាតិ។ រាជរដ្ឋាភិបាលនីតិកាលទី៧ នៃរដ្ឋសភា បានបន្តកិច្ចខិតខំប្រឹងប្រែងយ៉ាងពេញទំហឹង ក្នុងគោលដៅជំរុញ និងពង្រឹងថែមទៀត នូវការអភិវឌ្ឍសង្គមជាតិមួយប្រកបដោយភាពរីកចម្រើនជឿនលឿនរុងរឿង ដោយធ្វើការកសាងជាជំហានៗ ទៅតាមដំណាក់កាល ដែលអំណោយផល ដល់សង្គមជាតិកម្ពុជា»។

លោករដ្ឋមន្ត្រី បានផ្តាំផ្ញើដល់នាយទាហានទាំងអស់ ត្រូវស្មោះត្រង់ដាច់ខាត ចំពោះជាតិ សាសនា ព្រះមហាក្សត្រ និងរាជរដ្ឋាភិបាលកម្ពុជា ដែលមានសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លើកកម្ពស់ស្មារតី គោរពបទបញ្ជា លក្ខន្តិកៈ វិន័យទូទៅរបស់កងយោធពលខេមរភូមិន្ទ ច្បាប់នានារបស់រាជរដ្ឋាភិបាល ប្រកាន់ខ្ជាប់នូវវិន័យ សីលធម៌ សេចក្តីថ្លៃថ្នូររបស់កងកម្លាំងប្រដាប់អាវុធ បំពេញភារកិច្ចនៅក្នុងសា្ថប័ន អង្គភាពរបស់ខ្លួន ក្នុងស្មារតីទទួលខុសត្រូវខ្ពស់ និងទទួលបានលទ្ធផលល្អប្រសើរ។ ត្រូវយកចិត្តទុកដាក់ចូលរួមរក្សាការពារធនធានធម្មជាតិ កាត់បន្ថយឱ្យបានជាអតិបរិមា នូវរាល់ភាពអសកម្ម និងកំហុសឆ្គងទាំងឡាយដោយចេតនាក្តី អចេតនាក្តី ដែលធ្វើឱ្យរាំងស្ទះ និងប៉ះពាល់ដល់សង្គមជាតិ កងទ័ពគ្រប់រូប ត្រូវទទួលយកនូវរាល់បទពិសោធន៍ និងគំនិតជាវិជ្ជមានថ្មីៗ មកធ្វើការត្រិះរិះពិចារណា ត្រូវមានគុណធម៌ សិលធម៌រស់នៅល្អ និងមានសាមគ្គីភាព ឯកភាពផ្ទៃក្នុងរឹងមាំ ដើម្បីឈានទៅសម្រេចជោគជ័យគ្រប់ភារកិច្ច ជូនជាតិ មាតុភូមិ និងការពារដាច់ខាតមិនឱ្យមានសកម្មភាព ដែលបង្កឱ្យមានអស្ថិរភាពនៅក្នុងសង្គមជាតិ និងរាល់ការប៉ុនប៉ងទាំងឡាយណា ដែលចង់ផ្តួលរំលំរាជរដ្ឋាភិបាលស្របច្បាប់ ត្រូវយកចិត្តទុកដាក់ ថែទាំសុខភាពឱ្យបានល្អ។

ក្នុងឱកាសនោះ លោក កែវ រតនៈ ក៏បាននាំយកអំណោយ ដែលបានមកពីការចូលរួមឧបត្ថម្ភ របស់ក្រសួងរ៉ែ និងថាមពល, អគ្គិសនីកម្ពុជា, អ្នកស្ម័គ្រចិត្តនិយោជិតអគ្គិសនីកម្ពុជា និងអាជ្ញាធរអគ្គិសនីកម្ពុជា ផ្តល់ជូនអង្គភាពកងពលតូចអន្តរាគមន៍លេខ១៤រួមមាន៖ មី ចំនួន៧០០កេស, ទឹកត្រី និងទឹកស៊ីអ៉ីវ ចំនួន៧០០យួរ, ប៊ីចេង ចំនួន៤០កេសធំ, ត្រីខF4 ចំនួន៧០កេសធំ, ឆៃប៉ុវផ្អែម ចំនួន៧០០គីឡូក្រាម, ត្រីងៀត ចំនួន៨០គីឡូក្រាម, សាច់ក្រក ចំនួន៨០គីឡូក្រាម, ប្រហុក ចំនួន៨០គីឡូក្រាម និងថវិកា២ម៉ឺនដុល្លារ សម្រាប់ជួបជុំក្នុងឱកាសបុណ្យចូលឆ្នាំថ្មី ដែលឈានចូលមកដល់នាពេលខាងមុខនេះ។ ដោយឡែកបងប្អូនកងទ័ព ក្នុងម្នាក់ៗទទួលបាន គ្រឿងឧបភោគបរិភោគ និងថវិកាមួយចំនួន។

គួរជម្រាបជូនថា នាព្រឹកថ្ងៃដដែលនេះ លោករដ្ឋមន្ត្រី កែវ រតនៈ ក៏បានចុះសួរសុខទុក្ខ និងនាំយកអំណោយ ប្រគល់ជូនដល់កងវរសេនាតូចថ្មើរជើង លេខ៥៥៦ ចំណុះឱ្យទីបញ្ជាការដ្ឋានតំបន់ប្រតិបត្តិការសឹករងពោធិ៍សាត់ ឈរជេីងឃុំថ្មដា ស្រុកវាលវែង ដោយក្នុងនោះរួមមាន៖ មី ចំនួន១០០កេស, ទឹកត្រី និងទឹកស៊ីអ៉ីវ ចំនួន១០០យួរ, ប៊ីចេង ចំនួន២០កេសធំ, ត្រីខ ចំនួន២០កេសធំ, ឆៃប៉ុវផ្អែម ចំនួន១០០គីឡូក្រាម, ត្រីងៀត ចំនួន៥០គីឡូក្រាម, សាច់ក្រក ចំនួន៥០គីឡូក្រាម និងប្រហុក ចំនួន៥០គីឡូក្រាមផងដែរ៕