(ភ្នំពេញ)៖ លោក អ៊ុច បូររិទ្ធ ប្រធានស្តីទីព្រឹទ្ធសភានៃកម្ពុជា រួមដំណើរដោយសមាជិក សមាជិកា ព្រឹទ្ធសភា នាព្រឹកថ្ងៃអង្គារ ទី១ ខែមេសា ឆ្នាំ២០២៥ បានអញ្ជើញពិនិត្យការដ្ឋានស្ថាបនាស្ពានបេតុងអាម៉េ ឆ្លងកាត់ព្រែកប្រាសាទ ដែលសាងសង់ដោយកងកម្លាំងប្រតិបត្តិការរបស់មជ្ឈមណ្ឌលជាតិគ្រប់គ្រងកងកម្លាំង រក្សាសន្តិភាព បោសសម្អាតមីន និងកាកសំណល់សង្រ្គាម និងបានអញ្ជើញសំណេះសំណាលជាមួយបងប្អូនប្រជាពលរដ្ឋចំនួន ៥៤៦គ្រួសារ ស្ថិតនៅក្នុងឃុំប្រាសាទ ស្រុកស្អាង ខេត្តកណ្តាល។

យោងតាមរបាយការណ៍របស់លោកឧត្តមសេនីយ៍ទោ សែម រតនា អគ្គនាយកស្តីទី នៃមជ្ឈមណ្ឌលជាតិ រក្សាសន្តិភាព ការស្ថាបនាស្ពានបេតុងអាម៉េត្រូវបានចែកចេញជាពីរដំណាក់កាល ដោយអនុវត្តតាមបទដ្ឋានបច្ចេកទេសរបស់ក្រសួងសាធារណការ និងដឹកជញ្ជូន ដែលមានប្រវែង ១០៨ម៉ែត្រ ទទឹង១០ម៉ែត្រ (ដំណាក់កាលទី១)។

ស្ពាននេះមានសារៈសំខាន់ជាចម្បង ក្នុងការសម្រួលដល់ការធ្វើដំណើរឆ្លងកាត់របស់បងប្អូនប្រជាជន ដោយតភ្ជាប់ពីភូមិទាំង៥ នៃឃុំប្រាសាទ ទៅឃុំត្រើយស្លារ និងទៅផ្លូវជាតិលេខ១ និងជាការរួមចំណែកក្នុងការលើកស្ទួយហេដ្ឋារចនាសម្ព័ន្ធប្រទេសជាតិ ស្របតាមគោលនយោបាយយុទ្ធសាស្រ្តបញ្ចកោណ ដំណាក់កាលទី១ របស់រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយ គតិបណ្ឌិតនិងថាមពលរបស់សម្តេចមហាបវរធិបតី ហ៊ុន ម៉ាណែត ដែលមានអាទិភាពគន្លឹះ៥ គឺ «មនុស្ស ផ្លូវ ទឹក ភ្លើង និងបច្ចេកវិទ្យា»។  

ជាកិច្ចចាប់ផ្តើមមតិសំណេះសំណាលនាឱកាសនោះ លោក អ៊ុច បូររិទ្ធ ប្រធានស្តីទី ព្រឹទ្ធសភា បានពាំនាំនូវការផ្តាំផ្ញើការសួរសុខទុក្ខពីសម្តេចតេជោ ហ៊ុន សែន ប្រមុខរដ្ឋស្តីទីនៃកម្ពុជា និងសម្តេចកិត្តិព្រឹទ្ធបណ្ឌិត ជូនដល់ថ្នាក់ដឹកនាំខេត្ត ស្រុក សមាជិកក្រុមប្រឹក្សា ឃុំ អាជ្ញាធរ មូលដ្ឋាន និងប្រជាពលរដ្ឋទាំងអស់។ ការស្ថាបនាស្ពាននេះជាការអនុវត្តតាមការសម្រេចដ៏ខ្ពង់ខ្ពស់របស់សម្តេចតេជោ យោងតាមសំណូមពររបស់បងប្អូនប្រជាពលរដ្ឋ តាមរយៈក្រុមការងារចុះជួយមូលដ្ឋានឃុំប្រាសាទ ដើម្បីជួយសម្រាលដល់ការលំបាករបស់បងប្អូនក្នុងការធ្វើដំណើរ និងដឹកជញ្ជូនផលិតផលកសិកម្មដែលជាការរួមចំណែកដល់ការលើកកម្ពស់កម្រិតជីវភាពរបស់បងប្អូនប្រជាពលរដ្ឋ នៅមូលដ្ឋាន និងការអភិវឌ្ឍប្រទេសជាតិ។ តាងនាមឱ្យបងប្អូនប្រជាពលរដ្ឋនៅឃុំប្រាសាទ ឯកឧត្តមប្រធានស្តីទី ព្រឹទ្ធសភាបានថ្លែងអំណរគុណយ៉ាងជ្រាលជ្រៅចំពោះ សម្តេចតេជោ ដែលជានិច្ចកាលសម្តេចតែងផ្សារភ្ជាប់សុខទុក្ខជាមួយបងប្អូនប្រជាពលរដ្ឋនៅគ្រប់កាលៈទេសៈ និងបានគូសបញ្ជាក់ពីការរួមសហការកាងារយ៉ាងជិតស្និទ្ឋរវាងក្រុមការងារ ចុះជួយមូលដ្ឋានឃុំប្រាសាទ ជាមួយអតីតអគ្គនាយកមជ្ឈមណ្ឌលជាតិរក្សាសន្តិភាព លោកនាយឧត្តមសេនីយ៍ សែម សុវណ្ណនី និងបច្ចុប្បន្នជាមួយឯកឧត្តមឧត្តមសេនីយ៍ទោ សែម រតនា អគ្គនាយកស្តីទី នៃមជ្ឈមណ្ឌល និងក្រសួងសាធារណការនិងដឹកជញ្ជូនដែលបានអនុវត្តប្រកបដោយប្រសិទ្ឋភាពនូវអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ដើម្បីជាគុណប្រយោជន៍ដល់ជាតិមាតុភូមិ និងប្រជាជន។

ឆ្លៀតក្នុងឱកាសនោះផងដែរ លោកប្រធានស្តីទី ព្រឹទ្ធសភាបានរំឮកពីការណែនាំដ៏ខ្ពង់ខ្ពស់របស់ សម្តេចតេជោ ដល់សមាជិក-សមាជិកាព្រឹទ្ធសភា ចុះជួបប្រាស្រ័យឱ្យបានជាប់ជាប្រចាំ ដូចភ្លៀងរលឹម ជាមួយ អង្គបោះឆ្នោត និងប្រជាជន នៅតាមមូលដ្ឋាន ដើម្បីឈ្វេងយល់ពីសុខទុក្ខ និងស្តាប់មតិយោបល់ សំណូមពរ បញ្ហាប្រឈមទាំងឡាយ ក៏ដូចជាចូលរួមមតិជួយពង្រឹងការអនុវត្តតួនាទីរបស់ក្រុមប្រឹក្សាឃុំ សង្កាត់ ការផ្តល់សេវាសាធារណៈ និងការងារអភិវឌ្ឍន៍មូលដ្ឋាន ជូនប្រជាពលរដ្ឋ ដោយគ្មានការរើសអើង ឬការប្រកាន់បក្សពួក និន្នាការនយោបាយ និងសាសនា។ ជាមួយគ្នានិងការចែករំលែកនូវពត៌មានស្តីពីការវិវឌ្ឍសភាពការណ៍ថ្មីៗនៅក្នុងតំបន់ និងពិភពលោក លោកប្រធានស្តីទីព្រឹទ្ធសភា បានលើកឡើងពីការភាពរីកចម្រើនសេដ្ឋកិច្ចរបស់ប្រទេសជាតិមុននិងក្រោយដំណាក់កាលនៃការរីករាលដាលជំងឺកូវីដ-១៩ ដែលតាមការព្យាករកំណើនសេដ្ឋកិច្ចកម្ពុជានៅក្នុងឆ្នាំ២០២៤ មានក្នុងរង្វង់៦% និងអាចសម្រេចបានអត្រាកំណើន ៦,៣% ក្នុងឆ្នាំ ២០២៥ និងបន្តសម្រេចបានកំណើនក្នុងចន្លោះពី ៦% ទៅ ៧% ក្នុងរយៈពេលមធ្យម។ កំណើនសេដ្ឋកិច្ចដ៏ គួរឱ្យកត់សម្គាល់នេះបានរួមចំណែកដល់ការធ្វើឱ្យសម្រេចបាននូវគោលដៅជាយុទ្ឋសាស្ត្ររបស់រាជរដ្ឋាភិបាល ក្នុងការប្រែក្លាយកម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។

មុននឹងបញ្ចាប់ លោកប្រធានស្តីទី ព្រឹទ្ធសភា បានគូសបញ្ជាក់ពីសារៈសំខាន់នៃការពង្រឹងសាមគ្គីភាព ឯកភាពជាតិ ដើម្បីសន្តិភាព និងស្ថិរភាព ដែលជាកត្តាចាំបាច់មិនអាចខ្វះបានក្នុងការការពារទឹកដី ឯករាជ្យភាព អធិតេយ្យជាតិ វិបុលភាព និងការអភិវឌ្ឍប្រទេសជាតិរីកចម្រើនលើគ្រប់វិស័យ ដោយឯកឧត្តមបានសង្កត់ធ្ងន់ថា «គ្មានបរទេសណាស្រឡាញ់ខ្មែរជាងខ្មែរទេ គឺមានតែខ្មែរដែលស្រឡាញ់ខ្មែរពិតប្រាកដ»។

លោក បានអំពាវនាវដល់បងប្អូនប្រជាពលរដ្ឋទាំងអស់បន្តលើកកម្ពស់ស្មារតីសាមគ្គី ឯកភាពជាតិ រួមរស់ជាមួយគ្នាជាបងប្អូនជ្រោងខ្ពស់ផលប្រយោជន៍ជាតិជាងផលប្រយោជន៍អ្វីៗទាំងអស់ និងប្តេជ្ញាចូលរួមអនុវត្តតាមមាគ៌ា ត្រួសត្រាយប្រកបដោយគតិបណ្ឌិតរបស់សម្តេចតេជោ ហ៊ុន សែន ដែលជាបិតាស្ថាបនិកសន្តិភាពគ្មានពីរ និងជារដ្ឋបុរសរបស់ជាតិខ្មែរ។ ទន្ទឹមនឹងនេះ ឯកឧត្តមប្រធានស្តីទី ព្រឹទ្ធសភា បានកោតសរសើដល់ការខិតខំប្រឹងប្រែងរបស់អាជ្ញាធរមូលដ្ឋានគ្រប់ជាន់ថ្នាក់ ក្នុងការបម្រើប្រជាពលរដ្ឋ ជាពិសេសការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព និងបន្តលើកទឹកចិត្តដល់រដ្ឋបាលខេត្ត ស្រុក និងក្រុមប្រឹក្សាឃុំទាំងអស់ ឱ្យខិតខំបំពេញតួនាទី ភារកិច្ចរបស់ខ្លួន ប្រកបដោយការទទួលខុសត្រូវខ្ពស់ ដើម្បីផលប្រយោជន៍ប្រទេសជាតិនិងប្រជាជន ។

ជាកិច្ចបញ្ចប់ លោកប្រធានស្តីទី ព្រឹទ្ធសភា បាននាំយកអំណោយមានជាកញ្ចប់ឃីត (Kit) និងថវិកា ជូនដល់អាជ្ញាធរឃុំ ប្រជាការពារឃុំ កងកម្លាំងប្រតិបត្តិការ ព្រមទាំងប្រជាពលរដ្ឋចំនួន ៤៦គ្រួសារ ដែលធ្លាប់ទទួលបានផ្ទះជាអំណោយរបស់រដ្ឋាភិបាលតួកគីយេ តាមរយៈកិច្ចសម្របសម្រួលផ្ទាល់របស់ឯកឧត្តមប្រធានស្តីទី កន្លងមក និងប្រជាពលរដ្ឋចូលរួមចំនួន ៥០០នាក់ផ្សេងទៀត៕