(ភ្នំពេញ)៖ សមាគមទីភ្នាក់ងារប្រព័ន្ធផ្សព្វផ្សាយពាណិជ្ជកម្មកម្ពុជា ដែលប្រមូលផ្តុំក្រុមហ៊ុនផ្តល់សេវាផ្សព្វផ្សាយពាណិជ្ជកម្មតាមអាល់ហ្វីស និងប៉ាណូចំនួន១៧ក្រុមហ៊ុន បានចូលរួមជាមួយក្រសួងព័ត៌មាន ក្នុងយុទ្ធនាការប្រឆាំងព័ត៌មានក្លែងក្លាយ ដោយមានបានប្រើប្រាស់ផ្ទាំងប៉ាណូ LED របស់ខ្លួននៅតាមទីតាំងសំខាន់ៗមួយចំនួនក្នុងរាជធានីភ្នំពេញ និងតាមបណ្តាខេត្តនៅទូទាំងប្រទេសកម្ពុជា ក្នុងការផ្សព្វផ្សាយសារអប់រំសំខាន់ៗ ដើម្បីចូលរួមបញ្រ្ជាបការយល់ដឹងសាធារណៈពីហានិភ័យនៃព័ត៌មានក្លែងក្លាយ និងលើកកម្ពស់ការប្រើប្រាស់បណ្តាញទំនាក់ទំនងសង្គមដោយមានការទទួលខុសត្រូវ។

ជាមួយគ្នានេះ លោក នេត្រ ភក្រ្តា រដ្ឋមន្រ្តីក្រសួងព័ត៌មាន បានថ្លែងអំណរគុណដល់សមាគមទីភ្នាក់ងារប្រព័ន្ធផ្សព្វផ្សាយពាណិជ្ជកម្មកម្ពុជា ដែលបានចូលរួមជាមួយក្រសួងព័ត៌មាន ព្រោះការចូលរួមពីវិស័យឯកជនពិតជាមានសារៈសំខាន់ក្នុងការអប់រំសាធារណជនឱ្យបានទូលំទូលាយពីប្រធានបទនេះ។

លោករដ្ឋមន្ត្រី នេត្រ ភក្ត្រា បានលើកឡើងថា តាមរយៈការផ្សព្វផ្សាយទាំងនោះសាធារណជននឹងបានស្វែងយល់ពីផលប៉ះពាល់នៃព័ត៌មានក្លែងក្លាយ វិធីបង្កាការសាយភាយព័ត៌មានក្លែងក្លាយ និងការការពារខ្លួននៅពេលប្រើប្រាស់បណ្តាញសង្គម។

គួរបញ្ជាក់ផងដែរថា យុទ្ធនាការ «និយាយថាទេចំពោះព័ត៌មានក្លែងក្លាយ» ត្រូវបានបើកជាផ្លូវការដោយក្រសួងព័ត៌មានកាលពីថ្ងៃទី១ ខែមេសា ឆ្នាំ២០២៥។

យុទ្ធនាការនេះ ត្រូវបានផ្តួចផ្តើមឡើងក្នុងគោលបំណងកាត់បន្ថយឱ្យមកនៅកម្រិតអប្បបរិមានូវព័ត៌មានក្លែងក្លាយពីលំហព័ត៌មានក្នុងសង្គមកម្ពុជា សំដៅធានាសន្តិសុខព័ត៌មាន៖ គឺការទទួលព័ត៌មានប្រកបដោយគុណភាព និងសុវត្ថិភាព ជូនប្រជាពលរដ្ឋកម្ពុជានៅទូទាំងប្រទេស ដោយយុទ្ធនាការនេះនឹងត្រូវអនុវត្តនៅទូទាំងប្រទេស ក្នុងរយៈពេល១២ខែ គឺចាប់ផ្តើមពីថ្ងៃទី១ ខែមេសា រហូតដល់ថ្ងៃទី៣១ ខែមីនា ឆ្នាំ២០២៦ ហើយអ្នកដែលចូលរួមអនុវត្តយុទ្ធនាការ គឺមន្ទីរព័ត៌មានរាជធានី-ខេត្ត ព្រមទាំងស្ថាប័ន និងអង្គភាពពាក់ព័ន្ធទាំងអស់៕