(ភ្នំពេញ)៖ លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា(ក.អ.ក.) នារសៀលថ្ងៃទី២ ខែមេសា ឆ្នាំ២០២៥ បានអនុញ្ញាតជូនលោក TAKAHASHI Fumiaki ប្រធានសមាគមជប៉ុន-កម្ពុជា ( Japan-Cambodia Association - JCA) និងសហការី ចូលជួបសម្តែងការគួរសម និងពិភាក្សាការងារ។

នាឱកាសនោះលោកឧបនាយករដ្ឋមន្ត្រី បានសម្តែងនូវការស្វាគមន៍យ៉ាងរាក់ទាក់ចំពោះវត្តមានលោក TAKAHASHI Fumiaki ចំពោះការត្រឡប់មកបំពេញការងារនៅប្រទេសកម្ពុជា ក្នុងនាមជាប្រធាន​សមាគមជប៉ុន-កម្ពុជា ដែលកាលពីមុនលោកធ្លាប់បានបំពេញតួនាទីជាឯកអគ្គរាជទូតវិសាមញ្ញនិងពេញសមត្ថភាពនៃប្រទេសជប៉ុន ប្រចាំនៅកម្ពុជា។

ទន្ទឹមនឹងនេះ លោកឧបនាយករដ្ឋមន្ត្រី ក៏បានសម្តែងនូវអំណរគុណចំពោះរដ្ឋាភិបាល និងប្រជាជនជប៉ុន ដែលជានិច្ចកាលតែងតែផ្តល់នូវជំនួយគាំទ្រកម្ពុជាក្នុងគ្រប់រូបភាព ទាំងផ្នែករឹង និងផ្នែកទន់។

ជាការឆ្លើយតបលោកប្រធានសមាគមជប៉ុន-កម្ពុជា បានសម្តែងនូវសេចក្តីសោមនស្សរីករាយ និងអំណរគុណចំពោះបដិសណ្ឋារកិច្ចដ៏កក់ក្តៅពីសំណាក់លោកឧបនាយករដ្ឋមន្ត្រី ក៏ដូចជា​ថ្នាក់ដឹកនាំ ក.អ.ក.ផ្សេងទៀត។
ក្នុងការត្រឡប់មកកម្ពុជានាឱកាសនេះ លោកក៏បានកត់សម្គាល់ឃើញនូវភាពរីកចម្រើនថ្មីៗ ដែលគួរជាទីកោតសរសើរចំពោះកិច្ចខិតខំប្រឹងប្រែងរបស់ប្រមុខដឹកនាំ និងអ្នកពាក់ព័ន្ធគ្រប់វិស័យ។
ជាមួយគ្នានេះអ្នកតំណាងក្រុមហ៊ុនជប៉ុន ដែលមានវត្តមានអមដំណើរលោក TAKAHASHI Fumiaki ក៏បានធ្វើបទបង្ហាញអំពីក្រុមហ៊ុនរបស់ខ្លួន ដោយលើកយកជំនាញឯកទេស, ព័ត៌មានផលិតផល, និងបច្ចេកវិទ្យាថ្មីៗ មកគោរពជម្រាបជូនលោកឧបនាយករដ្ឋមន្ត្រី ស៊ុន ចាន់ថុល ព្រមទាំងថ្នាក់ដឹកនាំ ក.អ.ក. ផងដែរ។

តាមរយៈជំនួបពិភាក្សានារសៀលនេះលោកឧបនាយករដ្ឋមន្ត្រី ស៊ុន ចាន់ថុល ក៏បានស្នើឱ្យលោក TAKAHASHI Fumiaki ជំរុញការផ្សព្វផ្សាយអំពីបច្ចុប្បន្នភាពវឌ្ឍនភាពថ្មីៗ និងបរិយាកាសវិនិយោគ​របស់កម្ពុជា​ទៅកាន់សហគមន៍ធុរកិច្ចនៃប្រទេសជប៉ុន ដើម្បីជាការទាក់ទាញ និងជំរុញកំណើនការបោះទុនវិនិយោគដោយផ្ទាល់ពីជប៉ុន នៅក្នុងប្រទេសកម្ពុជាមួយកម្រិតបន្ថែមទៀត។

ជាកិច្ចបញ្ចប់នៃជំនួបសម្តែងការគួរសម និងពិភាក្សាការងារនារសៀលនេះលោកឧបនាយករដ្ឋមន្ត្រី បានអញ្ជើញលោកប្រធានJCA ព្រមទាំងប្រតិភូអមដំណើរ ធ្វើទស្សនកិច្ចហេដ្ឋារចនាសម្ព័ន្ធនានា​នៅក្នុងក្រុមប្រឹក្សាអភិវឌ្ឍន៍កម្ពុជា ដែលបានធ្វើការរៀបចំកែលម្អឱ្យមានភាពស្រស់បំព្រង ប្រកបដោយផាសុកភាព ពិសេសគឺការបំពាក់នូវឧបករណ៍បច្ចេកវិទ្យា ដើម្បីលើកកម្ពស់ប្រសិទ្ធភាពការងារប្រចាំថ្ងៃផងដែរ៕