(ភ្នំពេញ)៖ តបតាមបទបញ្ជារបស់នាយឧត្តមសេនីយ៍ ម៉ៅ សុផាន់ អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នៅថ្ងៃទី០៣ ខែមេសា ឆ្នាំ២០២៥នេះ, កងពលតូចលេខ៧០ បានត្រៀមកម្លាំង និងត្រួតពិនិត្យមធ្យោបាយ សម្ភារៈ និងឧបករណ៍ ដើម្បីជួយសង្រ្គោះ និងជម្លៀសប្រជាពលរដ្ឋ ក្នុងករណីមានគ្រោះធម្មជាតិកើតឡើង ជាយថាហេតុ ទៅទីកន្លែងមានសុវត្តិភាព។
ទន្ទឹមគ្នានេះ នាយឧត្តមសេនីយ៍ ម៉ៅ សុផាន់ បានណែនាំមេបញ្ជាការទាំង៦យោធភូមិភាគ ២កងពលធំ កងពលតូចលេខ៧០ និងបញ្ជាការដ្ឋានទ័ពពិសេស ចំណុះកងទ័ពជើងគោក ត្រូវត្រៀមកម្លាំង មធ្យោបាយ សម្ភារ ឧបករណ៍ក្នុងអង្គភាពរបស់ខ្លួន ដើម្បីជួយសង្គ្រោះប្រជាពលរដ្ឋ និងសហការជាមួយគណៈកម្មាធិការជាតិ គ្រប់គ្រងគ្រោះមហន្តរាយព្រមទាំង អាជ្ញាធរដែនដីនៅតំបន់ ដែលមានគ្រោះធម្មជាតិកើតឡើង ត្រូវជម្លៀសប្រជាពលរដ្ឋ ទៅកន្លែងមានសុវត្ថិភាព បញ្ចៀសឱ្យខានតែបាននូវផលប៉ះពាល់ ដល់អាយុជីវិតប្រជាពលរដ្ឋ និងការខូចខាតផ្សេងៗ ដែលកើតមានឡើងជាយថាហេតុទាំងក្នុងតំបន់ និងជុំវិញតំបន់ដែលកងឯកភាពខ្លួនទទួលខុសត្រូវ។
ក្រោយពីគ្រោះមហន្តរាយឆ្លងផុត ត្រូវបូកសរុបរបាយការណ៍ អំពីលទ្ធផលនៃការជួយសង្គ្រោះ និងផល ប៉ះពាល់នៃគ្រោះមហន្តរាយ ត្រូវចាត់តាំងកម្លាំងចូលរួម ក្នុងសកម្មភាពពុះពារ ដោះស្រាយនូវរាល់ផល វិបាកដែលបណ្តាល មកពីគ្រោះមហន្តរាយទាំងនោះ ដូចជា ស្តារឡើងវិញនូវហេដ្ឋារចនាសម្ព័ន្ធរូបវ័ន្ត មូលដ្ឋាន បង្ការទប់ស្កាត់រោគរាតត្បាតជំងឺឆ្លង ជួយសង្គ្រោះប្រជាពលរដ្ឋ និងការងារបង្ករបង្កើនផល។
ដើម្បីឱ្យដំណើរការ នៃប្រតិបត្តិការសង្គ្រោះប្រជាពលរដ្ឋ ជួបគ្រោះមហន្តរាយប្រព្រឹត្តទៅដោយភាព រលូនទាន់ពេលវេលា និងមានប្រសិទ្ធភាពខ្ពស់ មេបញ្ជាការទាំងអស់ ដូចមានចែងក្នុងចំណុច១ខាងលើ ជានិច្ចកាលត្រូវត្រៀមកម្លាំង ត្រួតពិនិត្យបច្ចេកទេស មធ្យោបាយ សម្ភារៈឯកទេស ប្រេងឥន្ធនៈ ឱ្យស្ថិត ក្នុងលក្ខណៈត្រៀម ដូចជាលក្ខណៈ ត្រៀមប្រយុទ្ធ និងកសាងផែនការស្តីពីការត្រៀមកម្លាំង មធ្យោបាយ សម្ភារ បរិក្ខារ សម្រាប់ប្រតិបត្តិការអន្តរាគមន៍សង្គ្រោះគ្រោះមហន្តរាយ រួចផ្ញើមកការិយាល័យទី៣ កងទ័ពជើងគោក។
ករណីមានគ្រោះមហន្តរាយកើតឡើង ត្រូវរាយការណ៍ជារៀងរាល់ថ្ងៃនៅម៉ោង១៦៖០០នាទីល្ងាច មក ការិយល័យទី៣ កងទ័ពជើងគោក អំពីសភាពការណ៍គ្រោះមហន្តរាយ ការប្រើប្រាស់កម្លាំង មធ្យោបាយ ជួយសង្គ្រោះ និងផលប៉ះពាល់នៃគ្រោះមហន្តរាយ ក្នុងករណីចាំបាច់ត្រូវរាយការណ៍ជាបន្ទាន់។ រយៈពេលអនុវត្តគិតចាប់ពីថ្ងៃទី១០ ខែឧសភា រហូតដល់ថ្ងៃទី៣១ ខែតុលា ឆ្នាំ២០២៥៕
