(ភ្នំពេញ)៖ លោក តាស៊ីឡូ ព្រីនសឺ (Tassilo Brinzer) ប្រធានសភាពាណិជ្ជកម្មអឺរ៉ុបនៅកម្ពុជា (EuroCham Cambodia) បានបង្ហាញក្តីពេញចិត្ត និងរីករាយជាខ្លាំង ចំពោះលទ្ធផលកើតចេញពីកិច្ចសម្របសម្រួលរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ធ្វើឱ្យការងារភស្តុភារ និងដឹកជញ្ជូនទំនិញ ត្រូវបានកាត់បន្ថយនីតិវិធីរដ្ឋបាល និងពេលវេលារហូតដល់ទៅ៥០ភាគរយ។
ការបញ្ជាក់របស់លោក តាស៊ីឡូ ព្រីនសឺ បានធ្វើឡើងតាមរយៈលិខិតមួយច្បាប់ផ្ញើជូនសម្តេចមហាបវរធិបតី ហ៊ុន ម៉ាណែត កាលពីថ្ងៃទី២៧ ខែមីនា ឆ្នាំ២០២៥។ លិខិតនេះជាកិច្ចថ្លែងអំណរគុណរបស់លោក តាស៊ីឡូ ព្រីនសឺ ចំពោះសម្តេចមហាបវរធិបតីលើកិច្ចអន្តរាគមន៍ពាក់ព័ន្ធនឹងភាពស្មុគស្មាញមួយចំនួនលើការងារភស្តុភារកម្ម និងដឹកជញ្ជូនទំនិញ។
ក្នុងលិខិតនេះ លោក តាស៊ីឡូ ព្រីនសឺ បានបង្ហើបពីសំណើសុំកិច្ចអន្តរាគមន៍ពីសំណាក់សម្តេចមហាបវរធិបតី ហ៊ុន ម៉ាណែត ពាក់ព័ន្ធបញ្ហាភស្តុភារកម្ម និងការដឹកជញ្ជូនទំនិញ កាលពីខែកញ្ញា ឆ្នាំ២០២៤កន្លងទៅ។
ការងារភស្តុភារកម្ម និងការដឹកជញ្ជូនទំនិញ ត្រូវបានរាយការណ៍ថា ជាឧបសគ្គមួយសម្រាប់ការធ្វើពាណិជ្ជកម្មរវាងកម្ពុជា និងសហគមន៍អឺរ៉ុប។
តាមរយៈលិខិតផ្ញើជូនសម្តេចមហាបវរធិបតី, ប្រធានសភាពាណិជ្ជកម្មអឺរ៉ុបនៅកម្ពុជា បានឱ្យដឹងថា រយៈពេល ៦ខែចុងក្រោយនេះ ថ្នាក់ដឹកនាំនៃគណៈកម្មាធិការ និងស្ថាប័ន-អាជ្ញាធរពាក់ព័ន្ធ បានអនុវត្តគំនិតផ្ដួចផ្ដើមជាច្រើន ដើម្បីដោះស្រាយស្ថានការណ៍ដ៏លំបាកនាពេលនោះ។
«ក្រោមការណែនាំផ្ទាល់របស់សម្តេចមហាបវរធិបតី និងចំណាត់ការដ៏ឆាប់រហ័ស គួបផ្សំការគាំទ្រ និងជំនាញបច្ចេកទេសផ្សេងៗបញ្ហាជាច្រើនដែលមាននៅក្នុងការស្នើសុំនាពេលនោះ ត្រូវបានដោះស្រាយរួចរាល់»។ នេះជាការគូសបញ្ជាក់របស់លោក តាស៊ីឡូ ព្រីនសឺ។
បើតាមលោក តាស៊ីឡូ ព្រីនសឺ បានឱ្យដឹងថា កាលពីថ្ងៃទី២៧ ខែមីនា កន្លងទៅនេះ លោក ក៏បានចុះហត្ថលេខាលើអនុស្សារណៈនៃការយោគយល់គ្នាមួយជាមូលដ្ឋានសម្រាប់កិច្ចសហការនេះ។
លោក តាស៊ីឡូ ព្រីនសឺ បានគូសរំលេចផងដែរថា ជាលទ្ធផលនៃកិច្ចសហប្រតិបត្តិការនានារវាងក្រសួង ស្ថាប័នរបស់កម្ពុជា ជាមួយសភាពាណិជ្ជកម្មអឺរ៉ុបនៅកម្ពុជា បានធ្វើឱ្យរយៈពេល និង នីតិវិធីរដ្ឋបាលលើការងារភស្តុភារកម្ម និងដឹកជញ្ជូននេះ ត្រូវបានកាត់បន្ថយរហូតដល់ទៅជាង៥០ភាគរយ។
លោក តាស៊ីឡូ ព្រីនសឺ បានគូសរំលេចយ៉ាងដូច្នេះ «ប្រសិនបើគ្មានការជួយជ្រោមជ្រែងពីសម្តេចមហាបវរធិបតីនោះទេ, យើងខ្ញុំក៏មិនអាចសម្រេច បាននូវសមិទ្ធផលដ៏ធំធេងដូចសព្វថ្ងៃនេះដែរ។ ក្នុងន័យនេះ យើងខ្ញុំសូមសម្តែងនូវការដឹងគុណចំពោះការប្តេជ្ញាចិត្ត, ការដឹកនាំ, និងការជឿទុកចិត្តដ៏ខ្ពង់ខ្ពស់របស់សម្តេចមហាបវរធិបតី»។
លោក តាស៊ីឡូ ព្រីនសឺ ក៏បានគូសរំលេចផងដែរថា ការយោគយល់ និងគំនិតផ្តួចផ្តើមរបស់សម្តេចមហាបវរធិបតី ជាថាមពលជំរុញឱ្យមានការសហការពីសំណាក់អ្នកជំនាញតាមវិស័យ ហើយបានចូលរួមចំណែកនាំឱ្យមានភាពរីកចម្រើនគួរឱ្យកត់សម្គាល់។
សម្តេចមហាបវរធិបតី ហ៊ុន ម៉ាណែត ចាត់ទុកលទ្ធផលខាងលើនេះ គឺបានមកពី «រួមគិត រួមធ្វើ រួមទទួលខុសត្រូវ» ដែលជាអភិក្រមនៃភាពជាដៃគូរវាងរដ្ឋ និងវិស័យឯកជន។
សម្តេចមហាបវរធិបតី បានថ្លែងអំណរគុណដល់បណ្ដាក្រសួង-ស្ថាប័នពាក់ព័ន្ធទាំងអស់ ដែលបានខិតខំយកចិត្តទុកដាក់ក្នុងការដោះស្រាយបញ្ហាប្រឈមនានារបស់វិស័យឯកជន ក៏ដូចជាការធ្វើកំណែទម្រង់ជាច្រើន ក្នុងគោលដៅបង្កើនប្រសិទ្ធភាពការងារ និងលើកកម្ពស់ទំនុកចិត្តពីវិស័យឯកជន រួមទាំងវិនិយោគិនពីបរទេស៕
