(ភ្នំពេញ)៖ កាលពីសប្តាហ៍កន្លងទៅនេះ សាកលវិទ្យាល័យ ឯកទេស នៃកម្ពុជា (CUS) ទីតាំងគោលរាជធានីភ្នំពេញ បានដឹកនាំនិស្សិត និងបុគ្គលិកចំនួន ១០០នាក់ ចូលរួមក្នុងយុទ្ធនាការសំអាតបរិស្ថានក្រោមប្រធានបទ៖ «យុវជនដើម្បីបរិស្ថានស្អាត» បរិស្ថានស្អាតផ្ដើមចេញពីយើងទាំងអស់គ្នា!! ដើម្បីចូលរួមចំណែកថែរក្សាបរិស្ថានឱ្យមានសោភ័ណ្ឌភាពស្រស់ស្អាតក្នុងទីក្រុង និងចូលមរួមអបអរសាទរសង្ក្រាន្តឆ្នាំថ្មី។
សាកលវិទ្យាល័យឯកទេសនៃកម្ពុជាតែងតែយកចិត្តទុកដាក់ក្នុងការចូលរួមចំណែកក្នុងការងារសង្គម និងបរិស្ថានក្នុងការបំផុសគំនិតយុវជនឱ្យស្រលាញ់បរិស្ថាន និងការពារបរិស្ថានស្អាត ដើម្បីប្រែក្លាយទៅជាទីក្រុងបៃតង ដែលពុំមានសំរាមនឹងឈានទៅសុខភាពល្អដល់ប្រជាពលរដ្ឋ។ យុទ្ធនាការចូលរួមនេះ បានសំអាតនៅតំបន់ជុំវិញសាលារៀន ផ្លូវសាធារណៈ ដោយប្រើឧបករណ៍រួមមាន៖ ដង្កៀប ស្រោមដៃ និងថង់ដាក់សំរាម ដើម្បីរក្សានូវអនាម័យផ្ទាល់ខ្លួន ដែលធ្វើឡើងនៅក្នុងតំបន់ខណ្ឌសែនសុខ រាជធានីភ្នំពេញ។ ការចូលរួមសម្អាតនេះ មិនត្រឹមតែជួយឱ្យបរិស្ថានស្អាតប៉ុណ្ណោះទេ ព្រមទាំងផ្តល់ឱកាសដល់និស្សិតក្នុងការអភិវឌ្ឍស្មារតីទៅលើ អភិបាលកិច្ចល្អ ភាពទទួលខុសត្រូវ និងការចូលរួម។
លោកបណ្ឌិត កែវ ជា សាកលវិទ្យាធិការរងសាកលវិទ្យាល័យឯកទេស នៃកម្ពុជា បានបញ្ជាក់ថា បច្ចុប្បន្ន CUS មាន ៩ទីតាំង គឺ៣ទីតាំងនៅរាជធានីភ្នំពេញ និង៦ទីតាំងនៅតាមបណ្តាខេត្តមាន ខេត្តកំពង់ចាម កំពង់ធំ សៀមរាប បន្ទាយមានជ័យ បាត់ដំបង និងខេត្តកំពត។ សាកលវិទ្យាល័យបាននឹងកំពុងធ្វើការបណ្តុះបណ្តាលនៅក្នុងមហាវិទ្យាល័យចំនួន៥ គឺទី១៖ មហាវិទ្យាល័យគ្រប់គ្រងពាណិជ្ជកម្ម និងសេដ្ឋកិច្ច, ២៖ មហាវិទ្យាល័យវិទ្យាសាស្ត្រសង្គម និងនីតិសាស្ត្រ, ៣៖ មហាវិទ្យាល័យ សិល្បៈ មនុស្សសាស្ត្រ និងភាសា, ៤៖ មហាវិទ្យាល័យវិទ្យាសាស្ត្រ និងបច្ចេកវិទ្យា, ៥៖ មហាវិទ្យាល័យវិស្វកម្ម ហើយក្នុងការបង្កើនទាំងសមត្ថភាព ធនធានហិរញ្ញវត្ថុ និងធនធានសម្ភាររួមមាន អាគារសិក្សាសរុបចំនួន ៩អគារ បន្ទប់សិក្សាចំនួន ២៤៥ សាលសន្និសីទចំនួន៩ បណ្ណាល័យចំនួន៨ បន្ទប់អនុវត្តភាសាចំនួន៩ បន្ទប់បណ្តុះបណ្តាលព័ត៌មានវិទ្យាចំនួន៩ មានកុំព្យូទ័រ ចំនួន៥៣០គ្រឿង LCD Projectors ចំនួនជាង ២០០គ្រឿង ដើម្បីជំរុញឱ្យហេដ្ខារចនាសម្ព័ន្ធរូបវ័ន្តរបស់ខ្លួនកាន់តែល្អ និងមានប្រសិទ្ធភាពថែមទៀត។
សាកលវិទ្យាល័យបានបណ្តុះបណ្តាលផ្តោតទៅលើ គុណភាព (បង្រៀន រៀនអនុវត្ត ស្រាវជ្រាវ សេវាកម្ម សមត្ថភាពវិជ្ជាជីវៈ), ចំណេះដឹង ចំណេះធ្វើ, បុគ្គលិកលក្ខណៈសម្បត្តិល្អ ចរិយាសម្បត្តិ រូបសម្បត្តិ ភាពសកម្មការងារ និងសិល្បៈនៃការរស់នៅ។
និស្សិតដែលបានបញ្ចប់ការសិក្សាមានចំនួនជិត ៥០,០០០នាក់ ដែលនិសិ្សតចំនួននេះមានការកើនឡើងជារៀងរាល់ឆ្នាំ ហើយមាននិស្សិតបានចេញទៅបម្រើការងារ ក្រសួង ស្ថាប័ន និងតាមក្រុមហ៊ុនដៃគូជាច្រើនពាន់នាក់ ក្នុងនោះមាននិស្សិតមួយចំនួនក្លាយជាពាណិជ្ជករ ឬជាម្ចាស់សហគ្រាសធុនតូច និងមធ្យម (SME) ឬធំ និងជាមន្ត្រីរបស់រដ្ឋដែលមានឋានៈរហូតដល់សមាជិកសភាជាតិ រដ្ឋលេខាធិការ អនុរដ្ឋលេខាធិការ អគ្គនាយក អភិបាលរងខេត្ត អភិបាលស្រុក មេឃុំ និង ជាមន្ត្រី នៅតាមស្ថាប័នក្រុមហ៊ុនរដ្ឋ ឬឯកជន ជាតិ និងអន្តរជាតិ។
ក្នុងរយៈពេលជាង ២០ឆ្នាំនេះ សាកលវិទ្យាល័យ ឯកទេស នៃកម្ពុជា មាននិស្សិត បានបញ្ចប់ និងទទួលជ័យលាភីចំនួន ១០លើក ក្រោមអធិបតីភាពសម្តេចតេជោ ហ៊ុន សែន អតីតនាយករដ្ឋមន្រ្តី ចំនួន ៨លើក នៅរាជធានីភ្នំពេញ និងក្រោមអធិបតីភាពសម្តេចក្រឡាហោម ស ខេង ១លើកនៅក្រុងបាត់ដំបង និងក្រោមអធិបតីភាពលោកបណ្ឌិត ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា តំណាងលោកបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា ១លើកទៀតនៅក្រុងសៀមរាប៕
