(ឧត្តរមានជ័យ)៖ លោក វ៉ី សំណាង អភិបាលខេត្តតាកែវ នៅព្រឹកថ្ងៃទី៣ ខែមេសា ឆ្នាំ២០២៥ បានដឹកនាំប្រតិភូអញ្ជើញចុះជួបសំណេះសំណាលសួរសុខទុក្ខ ជាមួយនាយទាហាន នាយទាហានរង ពលទាហាន នាយនគរបាល ពលនគរបាល ដែលកំពុងឈរជើងតាមបន្ទាត់ព្រំដែនកម្ពុជា-ថៃ ទិសប្រាសាទតាមាន់ ក្នុងស្រុកបន្ទាយអំពិល ខេត្តឧត្តរមានជ័យ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។
នៅក្នុងឱកាសនោះ លោកឧត្តមសេនីយ៍ត្រី នាក់ វង្ស មេបញ្ជាការកងពលតូចថ្មើរជើងលេខ៤២ យោធភូមិភាគទី៤ បានថ្លែងស្វាគមន៍យ៉ាងកក់ក្តៅបំផុត ចំពោះវត្តមានលោក វី សំណាង និងប្រតិភូ ដែលបានឆ្លៀតពេលដ៏មមាញឹក ចុះសួរសុខទុក្ខ សំណេះសំណាល និងនាំមកនូវអំណោយយ៉ាងច្រើន មកចែកជូនដល់កងកម្លាំងដែលកំពុងឈរជើងនៅទិសប្រាសាទតាមាន់នាពេលនេះ។
លោកឧត្តមសេនីយ៍ត្រី នាក់ វង្ស បានថ្លែងគោរពរាយការណ៍ជូនលោកអភិបាលខេត្តតាកែវ និងប្រតិភូ ដោយសង្ខេបចំពោះសភាពការណ៍តាមបណ្តោយខ្សែបន្ទាត់ព្រុំដែន ដែលអង្គភាពទទួលខុសត្រូវ ហើយក៏បានគោរពដឹងគុណ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ដែលតែងតែយក ចិត្តទុកដាក់ដល់វិស័យការពារជាតិជាអាទិភាពខ្ពស់បំផុត។
លោក វ៉ី សំណាង បានសម្តែងនូវមនោសញ្ចេតនារីករាយអបអរសារទរជាមួយលោកមេបញ្ជាការ មេបញ្ជាការរង នាយទាហាន ពលទាហាន និងនាយនគរបាល ពលនគរបាលទាំងអស់ ដែលកំពុងឈរជើងនៅទិសប្រាសាទតាមាន់ ព្រំដែនកម្ពុជា-ថៃ នៃស្រុកបន្ទាយអំពិល ខេត្តឧត្តរមានជ័យ។
អភិបាលខេត្តតាកែវ សូមសម្តែងនូវការកោតសរសើរដោយស្មោះចំពោះសកម្មភាពដ៏រស់រវើក និងស្មោះត្រង់រួមចំណែកអភិវឌ្ឍន៍កម្ពុជា នាពេលកន្លងមកនេះ ប្រកបដោយស្មារតីទទួលខុសត្រូវខ្ពស់ អង់អាចក្លាហាន មោះមុត មានវិន័យ សណ្ដាប់ធ្នាប់ សេចក្តីថ្លៃថ្នូរ ហើយនូវគ្រប់កាលៈទេសៈតែងតែទ្រទ្រង់ការពារបានយ៉ាងរឹងមាំ នូវបូរណភាពទឹកដី និងចូលរួមចំណែកថែរក្សាសុខសន្តិភាព ស្ថិរភាពជាតិ និងសណ្តាប់ធ្នាប់សង្គម សាកសមជាទីពឹង របស់ប្រជាជន និងសង្គមជាតិទាំងមូល។
លោកថា កម្លាំងទិសប្រាសាទតាមាន់ ជាកម្លាំងស្នូលមួយក្នុងការការពារបូរណភាពទឹកដី នៅតាមបណ្តោយខ្សែបន្ទាត់ព្រំដែនកម្ពុជា-ថៃ និងជាកម្លាំងរក្សាសន្តិសុខសណ្តាប់ធ្នាប់សាធារណៈនៅក្នុងសង្គមដ៏ល្អដែលមិនអាចខ្វះបាន។
អភិបាលខេត្តតាកែវ ក៏បានផ្តាំផ្ញើរសាកសួរសុខទុក្ខដោយក្តីនឹករលឹកពីសំណាក់សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ជូនដល់នាយ និងពលទាហាន នាយ និងពលនគរបាល និងសូមជូនពរក្នុងឱកាសឆ្នាំថ្មីប្រពៃណីជាតិខ្មែរខាងមុខនេះ ជូនដល់មេបញ្ជាការ មញ្ជាការរង នាយ និងពលទាហាន នាយនិងពលនគរបាល។
អំណោយជាគ្រឿងឧបភោគ បរិភោគ សម្ភារ ថវិកា ដែលរដ្ឋបាលខេត្តតាកែវ នាំមកចែកជូននៅពេលនេះរួមមាន៖ អង្ករត្រីខ, ទឹកស៊ីអ៊ីវ, ទឹកបរិសុទ្ធ, និងភេសជ្ជៈផ្សេងៗ និងចែកថវិកាជូនផ្ទាល់ដល់នាយហាន ពលទាហាន និងនាយនគរបាល ពលនគរបាលក្នុងម្នាក់ៗទទួលបានថវិកា ចំនួន ៥០ ០០០រៀល និងបានអញ្ជើញដឹកនាំប្រត្តិភូ បន្តដំណើទៅទស្សនាប្រាសាទតាមាន់ ប្រាសាទដំរីទ្រោម អាងស្តុកទឹក ផងដែរ៕
