(ឧត្តរមានជ័យ)៖ លោក មាន ចាន់យ៉ាដា អភិបាលខេត្តឧត្តរមានជ័យ បានណែនាំមន្ត្រីសុខាភិបាលដែលត្រូវប្រកាសចូលកាន់តំណែងនាពេលនេះ ក៏ដូចជាមន្ត្រីសុខាភិបាលទាំងអស់ នៃមន្ទីរសុខាភិបាលខេត្តត្រូវបង្កើនការយកចិត្តទុក ដាក់ខ្ពស់ ក្នុងការផ្តល់សេវាពិនិត្យសុខភាពជូនប្រជាពលរដ្ឋ ប្រកបដោយវិជ្ជាជីវៈ និងក្រមសីលធម៌ខ្ពស់។
ការថ្លែងណែនាំរបស់លោកអភិបាលខេត្តឧត្តរមានជ័យបែបនេះ ក្នុងឱកាសដែលលោកអញ្ជើញជាអធិបតីភាព ក្នុងពិធីប្រកាសចូលកាន់មុខតំណែងមន្រ្តីរាជការ ក្នុងរចនាសម្ព័ន្ធមន្ទីរសុខាភិបាលខេត្ត នៃរដ្ឋបាលខេត្តឧត្តរមានជ័យ នារសៀលថ្ងៃទី២ ខែមេសា ឆ្នាំ២០២៥ ដោយមានការចូលរួមពីលោកវេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្ត ថ្នាក់ដឹកនាំខេត្ត មន្ត្រីរាជការ និងអង្គភាពពាក់ព័ន្ធជាច្រើនទៀត។
នៅក្នុងឱកាសនោះ លោក មាន ចាន់យ៉ាដា អភិបាលខេត្តឧត្តរមានជ័យ បានចូលរួមអបអរសាទរ ព្រមទាំងកោតសរសើរ និងវាយតម្លៃខ្ពស់ ចំពោះលោកគ្រូពេទ្យ អ្នកគ្រូពេទ្យទាំងអស់ ដែលត្រូវបានថ្នាក់ដឹកនាំផ្តល់សេចក្តី ទុកចិត្តខ្ពស់ ធ្វើការតែងតាំង និងប្រគល់នូវតួរនាទីមុខតំណែងថ្មីនាពេលនេះ។
អភិបាលខេត្តឧត្តរមានជ័យ បានថ្លែងឱ្យដឹងថា ការប្រគល់តួនាទី ភារកិច្ច និងការតែងតាំងមុខតំណែងថ្មីជូនបងប្អូននាពេលនេះ សូមធ្វើយ៉ាងណាត្រូវបំពេញកាតព្វកិច្ចការងារស្នូលរបស់ខ្លួននៅតាមអង្គភាពឱ្យកាន់តែមានប្រសិទ្ធ និងកម្លាភាពខ្ពស់ ក្នុងការផ្តល់សេវាសាធារណៈ ពិនិត្យព្យាបាលជំងឺនានាជូនដល់បងប្អូនប្រជាពលរដ្ឋនៅតាមមូលដ្ឋានប្រកបដោយក្រមសីលធម៌និងវិជ្ជាជីវៈរបស់ខ្លួនឱ្យសមជាគ្រូពេទ្យផងដែរ។
លោក មាន ចាន់យ៉ាដា បានថ្លែងណែនាំផងដែរដល់មន្ទីរសុខាភិបាលខេត្ត សូមបន្តរក្សាសាមគ្គីផ្ទៃក្នុង បង្កើនកិច្ចសហការ និងកិច្ចប្រតិបត្តិការល្អជាមួយអង្គភាព ស្ថាប័ន និងដៃគូរអភិវឌ្ឍន៍នានា,រួមគ្នាលើកកម្ពស់គុណភាព សុវត្ថិភាព និងប្រសិទ្ធភាព នៃសេវាសុខាភិបាល ជាពិសេសសេវាសុខភាពបឋម សេវាសង្គ្រោះបន្ទាន់ បង្កើនការអភិវឌ្ឍន៏នូវហេដ្ឋារចនាសម្ព័ន្ធសុខាភិបាល និងបច្ចេកវិទ្យាវេជ្ជសាស្ត្រ រៀបចំសោភ័ណ្ណភាព បរិស្ថានរបស់អង្គភាព និងត្រៀមសម្ភារ មធ្យោបាយ បុគ្គលិក ធនធាន បរិក្ខាផ្សេងៗ ដើម្បីត្រៀមអន្តរាគមន៍ការជួយសង្រ្គោះ នៅក្នុងពិធីអបអរសាទពិធីបុណ្យចូលឆ្នាំថ្មីខាងមុខ។
ត្រូវលើកកម្ពស់សមត្ថភាពនិយ័តកម្ម ទាំងនូវមូលដ្ឋានសុខាភិបាលសាធារណៈ និងឯកជន ហើយត្រូវទទួលខុសត្រូវក្នុងការផ្តល់សេវាសុខាភិបាល ការស្រាវជ្រាវសុខាភិបាល រួមមានជម្ងឺឆ្លង និងជម្ងឺមិនឆ្លង ពង្រឹងប្រព័ន្ធអង្កេតតាមដាន ដើម្បីឆ្លើយតបគ្រោះអាសន្នផ្នែកសុខភាពសាធារណៈឱ្យស្របតាមច្បាប់លក្ខ័ណសុខភាព រួមគ្នារៀបចំអនុវត្តឱ្យបាន នូវសុវត្ថិភាពយុទ្ធសាស្ត្រអភិវឌ្ឍធនធានមនុស្សក្នុងវិស័យសុខាភិបាល ពង្រឹងសមត្ថភាពជំនាញ វិជ្ជាជីវៈ ក្រមសីលធ៌វិជ្ជាជីវៈ និងឥរិយាបថនៃការផ្តល់សេវា ជាពិសេសរៀបចំផែនការធនធានមនុស្សសុខាភិបាល ការពង្រាយបុគ្គិលសុខាភិបាល មានជំនាញច្បាស់លាស់ទៅកាន់ទីជនបទ តាមដានត្រួតពិន្យវាយតម្លៃគុណភាពសេវាឱ្យ បានទៀងទាត់ទាំងសេវាឯកជន ត្រួតពិនិត្យលុបបំបាត់សេវាឯកជនខុសច្បាប់ និងការផ្សព្វផ្សាយអាហារបំប៉នគ្មានច្បាប់អនុញ្ញាតិពីក្រសួងសុខាភិបាល។
លោកវេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្តឧត្តរមានជ័យ បានថ្លែងអំណរគុណយ៉ាងជ្រាលជ្រៅដល់លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ដែលតែងតែបង្ហាត់បង្រៀន និងផ្តល់អនុសាសន៍ល្អៗ ក្នុងនាមភាពជាអ្នកដឹកនាំ ប្រកបដោយភាពជាម្ចាស់ និងនវានុវត្តន៍ដល់រូបលោក និងមន្ត្រីសុខាភិបាលទាំងអស់ ដើម្បីឱ្យការបម្រើសេវាជូនប្រជាពលរដ្ឋឱ្យកាន់តែល្អប្រសើរ។
លោកក៏ថ្លែងអំណរគុណដល់ថ្នាក់ដឹកនាំខេត្ត ដែលតែតែយកចិត្តទុកដាក់លើវិស័យសុខាភិបាលក្នុងខេត្តដើម្បីធ្វើយ៉ាងណាឱ្យការងារដឹកនាំវិស័យសុខាភិបាលខេត្តឧត្តរមានជ័យ កាន់តែមានវឌ្ឍនភាព កាន់តែប្រសើរឡើង ធ្វើយ៉ាងណាឱ្យប្រជាពលរដ្ឋទទួលបាននូវសេវាមួយប្រកបដោយគុណភាព ប្រសិទ្ធភាព ប្រសិទ្ធផល សុវត្ថិភាព និងសមធម៌។
លោកវេជ្ជបណ្ឌិត ឃ្លោក ហួត បានថ្លែងឱ្យដឹងថា ការកែសម្រួលសមាសភាពតែងតាំងមុខតំណែងមន្រ្តីរាជការ ក្នុងរចនាសម្ព័ន្ធរបស់មន្ទីរសុខាភិបាលខេត្តនាពេលនេះ មានចំនួន២០នាក់រួមមាន៖ ប្រធានការិយាល័យរដ្ឋបាល និងបុគ្គលិកចំនួន១នាក់ ប្រធានមណ្ឌលសុខភាពចំនួន៧នាក់ និងអនុប្រធានមណ្ឌលសុខភាពចំនួន១២នាក់ផងដែរ៕
