(ស្ទឹងត្រែង)៖ រដ្ឋបាលស្រុកសេសាន នៅថ្ងៃទី៣ ខែមីនា ឆ្នាំ២០២៥ បានរៀបចំពិធីសម្ពោធឱ្យប្រើប្រាស់ជាផ្លូវការប្រព័ន្ធផ្គត់ផ្គង់ទឹកទុយោ និងបានជំរុញឱ្យប្រជាពលរដ្ឋរស់នៅភូមិស្រែគរ១ ឃុំស្រែគរ តភ្ជាប់បណ្តាញទឹកស្អាតប្រើប្រាស់ ឱ្យបានគ្រប់ក្រុមគ្រួសារ។
លោក សរ សុពុត្រា អភិបាលខេត្តស្ទឹងត្រែង បានថ្លែងអំពាវនាវដល់ប្រជាពលរដ្ឋរស់នៅតំបន់នោះ ឱ្យថែរក្សាសមិទ្ធិផលនេះឱ្យដូចជាសមិទ្ធិផលរបស់យើង ដែលពុកម៉ែបងប្អូនមានភារកិច្ចការពារថែរក្សា ហើយនិងធ្វើឱ្យកាន់តែប្រសើរឡើង។
លោកអភិបាលខេត្ត បានជឿជាក់ថា ការជួយទំនុកបម្រុង តាមរយៈជួយពិនិត្យមើលជាប្រចាំ និងតាមរយៈស្មារតីទទួលខុសត្រូវខ្ពស់ ពីអាជ្ញាធរស្រុក ឃុំ គឺសមិទ្ធិផលនេះ នឹងត្រូវបានថែទាំបានយូរអង្វែង ហើយនឹងបង្កើនផលិតភាព និងការផ្គត់ផ្គង់ដល់ប្រជាពលរដ្ឋដែលមិនទាន់មានទឹកស្អាតប្រើប្រាស់ ដើម្បីឱ្យប្រជាជនទាំងអស់ទទួលបានសុខុមាភាព អនាម័យ តាមរយៈការប្រើប្រាស់ទឹកស្អាត។
អភិបាលខេត្ត បានបន្តថ្លែងថា ដើម្បីឱ្យសមិទ្ធិផល បន្តកើតមាននៅលើទឹកដីក្នុងមូលដ្ឋាននេះ គឺសូមឱ្យពុក ម៉ែបងប្អូនទាំងអស់បន្ត គាំទ្រចំពោះការដឹកនាំរបស់រាជរដ្ឋាភិបាល ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា តាមរយៈការគាំទ្ររបស់បងប្អូនប្រជាពលរដ្ឋ ទៅឃុំ ស្រុក និងការដឹកនាំរបស់រដ្ឋបាលខេត្ត ដើម្បីទុកលទ្ធភាពបាននូវបន្តបំរើឱ្យអស់ពីសមត្ថភា ។
លោក សុវណ្ណ ពិសេដ្ឋ អភិបាលស្រុកសេសាន បានថ្លែងថា ប្រព័ន្ធផ្គត់ផ្គងទឹកទុយោនេះ សាងសង់ដោយ អង្គការភ្នែន អន្តរជាតិកម្ពុជា សហការជាមួយ រដ្ឋបាលឃុំ ស្រែគរ និង មន្ទីរអភិវឌ្ឍន៍ជនបទខេត្តស្ទឹងត្រែង ចំណាយថវិកាជាង៥ម៉ឺនដុល្លារ។ សហគមន៍ចូលរួម បដិភាគ ដី របង និងការថែទាំ។ ប្រជាពលរដ្ឋ បានប្រើប្រាស់ ចំនួន ១៤៦ ខ្នងផ្ទះ ក្នុងនោះភូមិស្រែគរ១ ចំនួន ៧៦ ខ្នងផ្ទះ និង ភូមិស្រែគរ ២ ចំនួន ៧០ ខ្នងផ្ទះ។
ដោយភាពជាដៃគូជាមួយរដ្ឋបាលខេត្ត និងស្រុកសេសាន និងសហគមន៍មូលដ្ឋាន អង្គការភ្លែនអន្តរជាតិ មានមោទនភាពក្នុងការសម្ពោធប្រព័ន្ធទឹកស្អាតថ្មីនៅឃុំស្រែគរ ស្រុកសេសាន។
លោក យី គឹម ថាន នាយករងអង្គការភ្លែនអន្តរជាតិ កម្ពុជា បានថ្លែងថា ជាច្រើនជំនាន់មកហើយ គ្រួសារនៅទីនេះ ភាគច្រើនមកពីសហគមន៍ជនជាតិដើមភាគតិច នៅតំបន់ដាច់ស្រយាល ត្រូវទិញទឹកដែលមានតម្លៃថ្លៃ ឬធ្វើដំណើរឆ្ងាយទៅកាន់ទន្លេ។ ស្ត្រី និងក្មងស្រី ត្រូវចំណាយពេលនិងដើរ ផ្លូវ ឆ្ងាយ ទៅដងទឹក ឬត្រូវ ចំណាយ ជិត ១០ម៉ឺនរៀលក្នុងមួយខែ ក្នុងមួយគ្រួសារ ដើម្បីទិញទឹកសម្រាប់ប្រើប្រាស់ក្នុងគ្រួសារ។
ថ្ងៃនេះការលំបាក និងការប្រឈមទាំងនោះបានបញ្ចប់។ ទឹកស្អាតមកដល់មាត់ទ្វារផ្ទះរបស់ពួកគេ ដោយធានាឱ្យកុមារមានសុខភាពល្អ និងសហគមន៍កាន់តែមានសុខមាលភាព៕
