(ភ្នំពេញ)៖ កាលពីថ្ងៃទី២ ខែមេសា ឆ្នាំ២០២៥កន្លងទៅនេះ រូបភាពវីដេអូបង្ហាញពីទឹកកខ្វក់ ហូរចូលទន្លេមេគង្គ ត្រូវបានគេចែកចាយ និងមានការចាប់អារម្មណ៍ខ្ពស់ផងដែរនៅលើបណ្តាញសង្គម។ ក្រោយបានឃើញរូបភាពវីដេអូនោះ លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានចាត់ឱ្យមន្ត្រីជំនាញរកប្រភពទីតាំងនៃការបង្ហូរទឹកកខ្វក់នោះ និងចុះសិក្សាពីមូលហេតុបន្ទាន់ផងដែរ។
នៅព្រឹកថ្ងៃទី៣ ខែមេសា ឆ្នាំ២០២៥នេះ ក្រុមការងារនាយកដ្ឋានគ្រប់គ្រងគុណភាពទឹក នៃក្រសួងបរិស្ថាន បានចុះទៅដល់ទីតាំង ហើយបានពិនិត្យពីប្រភពនៃទឹកដែលបានបង្ហូរ និងសាកសួរប្រជាពលរដ្ឋដែលរស់នៅទីនោះផងដែរ។
មន្ត្រីជំនាញ បានរកឃើញថា ទឹកកខ្វក់នេះ មានប្រភពចេញពីលំនៅឋាន ភោជនីយដ្ឋាន និងអគារពាណិជ្ជកម្មក្នុងភូមិសាស្ត្រភូមិ៣ សង្កាត់ជ្រោយចង្វារ ខណ្ឌជ្រោយចង្វារ។ មន្ត្រីជំនាញ បានរកឃើញទៀតថា ប្រព័ន្ធលូនៅទីតាំងខាងលើជាប្រភេទលូរួមរវាងលូទឹកភ្លៀង និងទឹកកខ្វក់ ហើយមិនមានប្រព័ន្ធប្រព្រឹត្តិកម្មទឹកកខ្វក់ សម្រាប់ចម្រោះទឹកកខ្វក់នោះឡើយ។
ទឹកកខ្វក់ពីលំនៅដ្ឋាន អាហារដ្ឋាន អគារពាណិជ្ជកម្ម ក៏ដូចជារោងចក្រសហគ្រាសនានា ជាប្រភពដែលបង្កផលប៉ះពាល់ដល់ទឹកសាធារណៈ ប៉ះពាល់ការរស់នៅរបស់ប្រជាពលរដ្ឋ និងជីវៈចម្រុះនៅក្នុងទឹកថែមទៀតផង។
ការគ្រប់គ្រងទឹកកខ្វក់ ធានារក្សាឱ្យបានគុណភាពទឹកទន្លេ ស្ទឹង បឹងបួរ ត្រូវបានគិតគូរខ្ពស់ពីសំណាក់រាជរដ្ឋាភិបាល និងក្រសួងបរិស្ថាន ដែលជាសេនាធិការ។ ការរក្សាបានគុណភាពទឹក គឺទាមទារឱ្យមានការរៀបចំប្រព័ន្ធលូ ប្រព័ន្ធបង្ហូរទឹកកខ្វក់ចេញពីរោងចក្រ សហគ្រាស លំនៅឋាន អាហារដ្ឋាន និងអគារពាណិជ្ជកម្មនានាឱ្យបានត្រឹម បន្ទាប់មកសាងសង់អាងប្រព្រឹត្តិកម្មទឹកកខ្វក់ ដើម្បីចម្រោះទឹកកខ្វក់ទាំងនោះមុនបង្ហូរចេញទៅទីសាធារណៈ។
លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានបង្ហាញការប្តេជ្ញាចិត្តខ្ពស់ក្នុងការរក្សាបរិស្ថានកម្ពុជាឱ្យល្អស្អាត។ លោករដ្ឋមន្ត្រី បានដាក់ចេញនូវយុទ្ធនាការជាច្រើន ដើម្បីថែរក្សាការពារបរិស្ថាន និងការពារគុណភាពទឹកសាធារណៈតាមទន្លេ ស្ទឹង បឹងបួរ។
លោករដ្ឋមន្ត្រី បានអះអាងថា បច្ចុប្បន្ននេះ លោកកំពុងពង្រឹងការគ្រប់គ្រងទឹកកខ្វក់នៅតាមរោងចក្រសហគ្រាសនានា តាមរយៈការកសាងអាងប្រព្រឹត្តកម្មទឹកកខ្វក់ បន្ទាប់មកលោកនឹងបន្តការកសាងអាងប្រព្រឹត្តកម្មទឹកកខ្វក់ ដែលមានប្រភពចេញពីលំនៅឋាន អាហារដ្ឋាន និងអគារពាណិជ្ជកម្មផ្សេងនៅតាមទីប្រជុំជន និងតាមទីជនបទនានា៕
