(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី៣ ខែមេសា ឆ្នាំ២០២៥នេះ បានអនុញ្ញាតជូន លោកស្រី Xu Xiaoxia អគ្គនាយិកាវិទ្យុមិត្តភាពកម្ពុជា-ចិននៃអគ្គស្ថានីយវិទ្យុ និងទូរទស្សន៍មជ្ឈិមចិន និងសហការី ចូលជួបសម្តែងការគួរសម និងពិភាក្សាការងារ។

ជំនួបនេះ បានពិភាក្សាលើវឌ្ឍនភាពនៃការរៀបចំកម្មវីធីថ្មីៗ ដើម្បីផ្សព្វផ្សាយពីសភាពការណ៍នយោបាយ សង្គម សន្តិសុខដែលមានសុខសន្តិភាពពេញបរិបូណ៍ និងល្អប្រសើរ ឱកាសវិនិយោគដ៏ល្អប្រពៃ និងគោលដៅទេសចរណ៍ដ៏សំបូរបែប នៅកម្ពុជាឲ្យបានទូលំទូលាយ និងផ្ទាល់ជូនដល់ប្រជាជន និងធុរជនចិន ដើម្បីទាក់ទាញឲ្យធ្វើដំណើរកម្សាន្ត និងមកបណ្តាក់ទុនក្នុងវិស័យទេសចរណ៍ឲ្យកាន់តែច្រើនឡើងក្នុងឆ្នាំថ្មីនេះ៕