(ក្រចេះ)៖ លោកវេជ្ជបណ្ឌិត ងី ប៊ុនឡែន ប្រធានមន្ទីរសុខាភិបាលខេត្តក្រចេះ បានណែនាំដល់ប្រធានមន្ទីរពេទ្យបង្អែកស្រុកទាំងអស់ និងលោក លោកស្រីប្រធានមណ្ឌលសុខភាព-ប៉ុស្តិ៍សុខភាពនៅទូទាំងខេត្ត ត្រូវពង្រឹងក្រុមគ្រូពេទ្យប្រចាំការ ដើម្បីផ្តល់សេវាជូនប្រជាពលរដ្ឋក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ។
ក្នុងសេចក្ដីណែនាំរបស់មន្ទីរសុខាភិបាលខេត្តក្រចេះ នៅថ្ងៃទី៣ ខែមេសា ឆ្នាំ២០២៥ បានឲ្យដឹងថា ដើម្បីចូលរួមថែរក្សា និងផ្តល់សេវាសុខភាពជូនប្រជាពលរដ្ឋក្នុងឱកាសបុណ្យចូលឆ្នាំថ្មីខាងមុខ មន្ទីរសុខាភិបាល នៃរដ្ឋបាលខេត្ត សូមធ្វើការណែនាំដូចខាងក្រោម៖
*១៖ គ្រប់មន្ទីរពេទ្យទាំងអស់ត្រូវរៀបចំគ្រូពេទ្យ និងក្រុមឆ្លើយតបបន្ទាន់ ដើម្បីចូលរួមប្រចាំការនៅតាមទីកន្លែងសាធារណៈដែលរដ្ឋបាលខេត្ត ក្រុង ស្រុក រៀបចំឲ្យមានការកម្សាន្តសប្បាយ
*២៖ គ្រប់មន្ទីរពេទ្យ និងមណ្ឌលសុខភាពទាំងអស់ ត្រូវរៀបចំបែងចែកក្រុមប្រចាំការ និងរថយន្តគិលានសង្គ្រោះ ២៤ម៉ោង ដើម្បីត្រៀមអន្តរាគមន៍ក្នុងឧបទ្ទវហេតុដូចជា គ្រោះថ្នាក់ចរាចរណ៍ និងគ្រោះថ្នាក់ផ្សេងៗ
*៣៖ សហការជិតស្និទ្ធជាមួយ និងអាជ្ញាធរគ្រប់លំដាប់ថ្នាក់ និងអ្នកពាក់ព័ន្ធដើម្បីផ្តល់ទទួល និងតាមដានព័ត៌មាន ដើម្បីរួមគ្នាទប់ស្កាត់ និងដោះស្រាយបញ្ហាបានទាន់ពេលវេលា
*៤៖ ត្រូវរាយការណ៍នូវរាល់ករណីគ្រោះថ្នាក់ចរាចរណ៍ ឧបទ្ទវហេតុផ្សេងៗ ដែលកើតមានឡើងក្នុងដែនសមត្ថកិច្ចគ្របដណ្តប់របស់ខ្លួនមកមន្ទីរសុខាភិបាលជាបន្ទាន់
*៥៖ ត្រូវរៀបចំសំអាតបរិស្ថាន និងតុបតែងភ្លើងលម្អ ទង់ជាតិ ទង់សាសនា តាមបែបប្រពៃណីនៅតាមអង្គភាពឲ្យបានស្អាតទាំងពេលថ្ងៃ និងពេលយប់៕
ខាងក្រោមនេះ ជាសេចក្ដីណែនាំរបស់មន្ទីរសុខាភិបាល នៃរដ្ឋបាលខេត្តក្រចេះ៖
