(កំពង់ធំ)៖ លោក នួន ផារ័ត្ន អភិបាលខេត្តកំពង់ធំ នៅថ្ងៃទី៤ ខែមេសា ឆ្នាំ២០២៥ បានអញ្ជើញបើកការដ្ឋានសាងសង់ផ្លូវកៅស៊ូ DBST មានប្រវែង១,៦៣៧ម៉ែត្រ ពីសង្កាត់កំពង់ក្របៅ ទៅសង្កាត់អាចារ្យលាក់ ក្រុងស្ទឹងសែន ខេត្តកំពង់ធំ។

ថ្លែងក្នុងឱកាសនោះលោក នួន ផារ័ត្ន បានបញ្ជាក់ថា ដើម្បីជាចំណងដៃដល់ប្រជាពលរដ្ឋ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ រដ្ឋបាលខេត្តកំពង់ធំ បានសាងសង់ផ្លូវមួយខ្សែ និងបំពាក់សូឡាបំភ្លឺតាមដងផ្លូវ ដើម្បីងាយស្រួលដល់ប្រជាពលរដ្ឋក្នុងការធ្វើដំណើរទាំងយប់ទាំងថ្ងៃប្រកបដោយសុវត្ថិភាព។

លោកបានបន្តថា ផ្លូវនេះពីមុនលំបាកធ្វើដំណើរ ហើយក៏ជាទំនប់សន្តិភាពសម្រាប់ទប់ទឹក ស្ទាក់ទឹកកុំឲ្យហូរចូលក្រុង ដើម្បីបញ្ជៀសទឹក ការពារមានសុវត្ថិភាពដល់ប្រជាពលរដ្ឋក្នុងសម័យសង្គ្រាម។ បច្ចុប្បន្នដោយសារប្រទេស មានសុខសន្តិភាព ក្រោមការដឹកនាំរបស់រាជរដ្ឋាភិបាល ដែលមានសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានកសាងឲ្យមានហេដ្ឋារចនាសម្ព័ន្ធផ្លូវ ថ្នល់ គ្រប់ទីកន្លែងសម្រាប់ការធ្វើដំណើរឆ្លងកាត់ ក៏ដូចជាដឹកជញ្ជូនកសិផលរបស់ពលរដ្ឋ។

លោកបានលើកទឹកចិត្តដល់អាជ្ញាធរមូលដ្ឋាន និងប្រជាពលរដ្ឋទាំងពីរសង្កាត់ សូមចូលរួមថែរក្សាផ្លូវកៅស៊ូនេះដើម្បីប្រើប្រាស់បានយូរអង្វែង និងមានសុវត្ថិភាពក្នុងការធ្វើដំណើរ។ អាជ្ញាធរ ប្រជាពលរដ្ឋ សម្ដែងនូវការអបអរសាទរ និងសប្បាយរីករាយដោយទទួលបាននូវសមិទ្ធផលថ្មី ហើយសូមគាំទ្រការដឹកនាំរបស់លោក នួន ផារ័ត្ន អភិបាលខេត្តកំពង់ធំ ពិសេសការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី។

សូមជម្រាបថា ផ្លូវកៅស៊ូ DBST ដែលមានប្រវែង១,៦៣៧ម៉ែត្រ ក្នុងនោះស្ថិតនៅភូមិកំពង់ក្របៅសង្កាត់ កំពង់ក្របៅ មានប្រវែង៨៦៥ម៉ែត្រ និងស្ថិតនៅភូមិក្រចាប់ សង្កាត់អាចារ្យលាក់ មានប្រវែង៧៧២ម៉ែត្រ (ផ្លូវទំនប់សន្តិភាព) និងបំពាក់ភ្លើងសូឡាឲ្យបានរួចរាល់៕