(ភ្នំពេញ)៖ តាមរយៈបណ្តាញទំនាក់ទនងសង្គមផ្លូវការរបស់ខ្លួន សភាពាណិជ្ជកម្មអាមេរិកប្រចាំនៅកម្ពុជា នៅថ្ងៃទី៤ ខែមេសា ឆ្នាំ២០២៥ បានវាយតម្លៃខ្ពស់ ចំពោះរាជរដ្ឋាភិបាលកម្ពុជា ដែលមានឆន្ទៈខ្ពស់ក្នុងការទទួលយកក្តីកង្វល់ និងប្រមូលព័ត៌មានរបស់ធុរជន ដើម្បីរកដោះស្រាយ ជុំវិញការប្រកាសវិធានការពន្ធគយថ្មីរបស់អាមេរិក។
ការវាយតម្លៃរបស់សភាពាណិជ្ជកម្មអាមេរិកប្រចាំនៅកម្ពុជា ធ្វើឡើងបន្ទាប់ពីសភាពាណិជ្ជកម្មអាមេរិក ប្រចាំនៅកម្ពុជា ដឹកនាំដោយលោក Casey Barnett ប្រធាន នៅថ្ងៃទី៣ ខែមេសា ម្សិលមិញបានចូលជួបប្រជុំជាមួយលោក ផាន់ ផល្លា រដ្ឋលេខាធិការ និងជាអគ្គលេខាធិការនៃគណៈកម្មាធិការ គោលនយោបាយសេដ្ឋកិច្ច និងហិរញ្ញវត្ថុ ដើម្បីពិភាក្សាអំពីវិធានការពន្ធទៅមក ឬ Reciprocal Tariff របស់រដ្ឋាភិបាលអាមេរិក មកលើកម្ពុជា។
ប្រធានាធិបតីសហរដ្ឋអាមេរិក លោក ដូណាល់ ត្រាំ កាលពីព្រឹកថ្ងៃទី៣ ខែមេសា ឆ្នាំ២០២៥ ដែលត្រូវនឹងថ្ងៃទី២ ខែមេសានៅសហរដ្ឋអាមេរិក បានសម្រេចកំណត់ពន្ធគយលើទំនិញនាំចូលពីកម្ពុជា ប្រមាណ៤៩% ដែលកម្រិតដ៏ខ្ពស់មួយ ដើម្បីជាការសងសឹកលើកម្ពុជា ដែលចោទថាយកពន្ធនាំចូលទំនិញពីសហរដ្ឋអាមេរិក ក្នុងកម្រិត ៩៧%។
សភាពាណិជ្ជកម្មអាមរិកប្រចាំកម្ពុជា បានលើកឡើងថា «ពួកយើងវាយតម្លៃខ្ពស់ដោយស្មោះ ចំពោះរាជរដ្ឋាភិបាលកម្ពុជា ដែលមានឆន្ទៈស្តាប់ក្តីកង្វល់នៃសហគមន៍ធុរកិច្ចរបស់យើង ចំពោះមុខការប្រកាសវិធានការពន្ធគយថ្មីៗទាំងនេះ។ កម្ពុជាមានកាលានុវត្តភាពពិតប្រាកដមួយ ដើម្បីចាប់ផ្តើមចរចាឡើងវិញ នូវកិច្ចព្រមព្រៀងអនុគ្រោះពាណិជ្ជកម្ម ដែលកាន់តែប្រសើរជាងមុនខ្លាំងថែមទៀត ជាមួយសហរដ្ឋអាមេរិក ប៉ុន្តែចាំបាច់ត្រូវធ្វើសកម្មភាពឱ្យម៉ឺងម៉ាត់ និងឆាប់រហ័ស»។
នៅថ្ងៃទី៣ ខែមេសា សភាពាណិជ្ជកម្មអាមេរិកប្រចាំកម្ពុជា បានចេញសេចក្តីថ្លែងការណ៍ផ្លូវការមួយ ដោយទទូចឱ្យបញ្ចប់ពន្ធគយដែលអាមេរិកដាក់លើទំនិញកម្ពុជាវិញ និងអំពាវនាវឱ្យមានដំណោះស្រាយ សមហេតុផល និងមានតុល្យភាព ដែលដោះស្រាយទាំងក្តីកង្វល់សេដ្ឋកិច្ច និងសន្តិសុខរបស់អាមេរិក ហើយធានាការរក្សាកំណើនសេដ្ឋកិច្ចរបស់កម្ពុជា។
សភាពាណិជ្ជកម្មអាមេរិកប្រចាំកម្ពុជា បានត្រៀមលក្ខណៈជាស្រេច ដើម្បីគាំទ្ររាជរដ្ឋាភិបាលកម្ពុជា ក្នុងកិច្ចចរចាទាំងនេះ ដើម្បីរក្សាការពារភាពប្រកួតប្រជែងរបស់កម្ពុជា ទាក់ទាញការវិនិយោគ និងបង្កើតឱកាសការងារ។
រដ្ឋមន្ត្រីក្រសួងពាណិជ្ជកម្មកម្ពុជា បានប្រតិកម្មចំពោះការកំណត់ពន្ធរបស់អាមេរិករហូតដល់ ៤៩ភាគរយ ហើយថាកម្ពុជា មិនដែលបានកំណត់ ឬយកពន្ធពីអាមេរិកដល់ទៅ៩៧ភាគរយនោះទេ ពន្ធគយដែលកម្ពុជាយកពីទំនិញអាមេរិក គឺខ្ពស់បំផុតត្រឹមតែ ២៩.៤%ប៉ុណ្ណោះ។ កម្ពុជានឹងប្រើប្រាស់គ្រប់មធ្យោបាយ ដើម្បីចរចាជាមួយនឹងសហរដ្ឋអាមេរិក ក្នុងនាមជាប្រទេសសមាជិកអង្គការពាណិជ្ជកម្មពិភពលោកដូចគ្នា។
ជាមួយគ្នានេះ រាជរដ្ឋាភិបាលបានអំពាវនាដល់កម្មករនិយោជិត និងសាធារណជនមេត្តារក្សាភាពស្ងប់ស្ងាត់ រង់ចាំរាជរដ្ឋាភិបាលដោះស្រាយបញ្ហានេះជាមួយអាមេរិក។
តាមរបាយការណ៍អគ្គនាយកដ្ឋានគយ និងរដ្ឋាករកម្ពុជា បានបង្ហាញថា នៅឆ្នាំ២០២៤ កម្ពុជា-អាមេរិក សម្រេចបានទំហំពាណិជ្ជកម្ម ១០.១៨ពាន់លានដុល្លារ កើនឡើង១១.២% ក្នុងនោះ កម្ពុជានាំចេញទៅអាមេរិក ក្នុងតម្លៃ ៩.៩ពាន់លានដុល្លារ កើនឡើង ១១.៤% ខណៈអាមេរិកនាំចូលកម្ពុជាវិញ ក្នុងតម្លៃ ២៦៤.១៤លានដុល្លារ៕
