(ក្រចេះ)៖ លោកឧត្តមសេនីយ៍ត្រី សាក់ សារ៉ាង មេបញ្ជាការកងរាជអាវុធហត្ថខេត្តក្រចេះ បានអះអាងថា កម្លាំងកងរាជអាវុធហត្ថខេត្ត ត្រៀមខ្លួនរួចរាល់ហើយដើម្បីការពារសន្ដិសុខ សណ្ដាប់ធ្នាប់ និងសុវត្ថិភាពសាធារណៈសង្គម ជូនប្រជាពលរដ្ឋក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់ក្នុងខ្លីឆាប់ៗខាងមុខនេះ។
លោកឧត្តមសេនីយ៍ត្រី មេបញ្ជាការ បានបញ្ជាក់ថា កម្លាំងបានត្រៀមការពារសន្តិសុខ សណ្ដាប់ធ្នាប់ ជូនប្រជាពលរដ្ឋក្នុងឱកាសពិធីបុណ្យចូលឆ្នាំខ្មែរ ជាពិសេសនៅតាមតំបន់រមណីយដ្ឋាននានា និងតាមទីប្រជុំជននៅក្នុងខេត្តដើម្បីធានាបានសុវត្ថិភាព និងសណ្ដាប់ធ្នាប់សាធារណៈឲ្យបានល្អប្រសើ។ ក្នុងនោះកម្លាំងអន្តរាគមន៍ ត្រៀមចុះការពារតាមបណ្តាគោលដៅសំខាន់ៗ និងល្បាតតាមដងផ្លូវសាធារណៈ ទីប្រជុំជន រមណីយដ្ឋាន និងកន្លែងសប្បាយផងដែរ។
ដោយឡែក លោកវរសេនីយ៍ទោ អុីវ ណារ៉ាត់ ប្រធានមន្ទីរមណ្ឌលប្រតិបត្តិការ បានឲ្យដឹងថា ការប្រើប្រាស់កម្លាំងបែងចែកភូមិសាស្រ្ត គោលដៅសំខាន់ចំនួន១០កន្លែងមានដូចជា រម្មណីយដ្ឋានប្រវត្តិសាស្ត្រ, វត្តព្រះវិហារធំសសរ១០០ និងឆ្នេរខ្សាច់មុខវត្តសសរ១០០, រមណីយដ្ឋានទឹកជួរព្រែកកាំពី, រម្មណីយដ្ឋានអន្លង់ផ្សោត, រមណីយដ្ឋានភ្នំសំបុក, រមណីយដ្ឋានកោះសុក្រម, រមណីយដ្ឋានឆ្នេរខ្សាច់កោះទ្រង់,រម្មណីយដ្ឋានភ្នំសុពណ៌កាឡី, រមណីយដ្ឋានភ្នំព្រះ និងវិមានអនុស្សាវីយ៍២ធ្នូ ស្រុកស្នួល។
យោងតាមបទបញ្ជារបស់លោកឧត្ដមសេនីយ៍ត្រី សាក់ សារ៉ាង មេបញ្ជារកាកងរាជអាវុធហត្ថខេត្តក្រចេះ នៅក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ កម្លាំងកងរាជអាវុធហត្ថគ្រប់រូប ត្រូវយកចិត្តទុកដាក់គ្រប់គោលដៅ ពិសេសកន្លែងមានថ្នាក់ដឹកនាំចូលរួម និងកន្លែងដែលមានប្រជាពលរដ្ឋចូលរួមច្រើនកុះករ និងបណ្តាទីប្រជុំជន រមណីយដ្ឋាន កន្លែងកម្សាន្ដ និងការរៀបចំសណ្តាប់ធ្នាប់ ការសម្រួលចរាចរណ៍តាមដងផ្លូវដែលមានការកកស្ទះ។
លើសពីនេះ ត្រូវទប់ស្កាត់ការបង្កបាតុភាពចលាចលផ្សេងៗ បណ្តាលឲ្យខូចរបៀបរៀបរយសន្តិសុខសាធារណៈ ករណីក្មេងទំនើង បង្ករបួសស្នាម លួច ឆក់ ប្លន់ ចាប់ជំរិតយកប្រាក់គ្រប់រូបភាព ការប្រើប្រាស់ និងជួញដូរគ្រឿងញៀន និងបង្កើតសកម្មភាពផ្សេងៗ ជួយសង្គ្រោះក្នុងករណីគ្រោះថ្នាក់ចរាចរណ៍ និងឧបទ្ទវហេតុផ្សេងៗ ពិសេសករណីអគ្គិភ័យផងដែរ។
តំណាងឲ្យមេបញ្ជាការកងរាជអាវុធហត្ថខេត្តក្រចេះ លោកវរសេនីយ៍ទោ អុីវ ណារ៉ាក់ បានអំពាវនាវដល់ប្រជាពលរដ្ឋទាំងអស់ក្នុងខេត្តក្រចេះ មុននឹងចាកចេញ ពីផ្ទះទៅដើរលេងតាមរមណីយដ្ឋាននាៗ សូមពិនិត្យភ្លើងធូប ទៀន ឬបិទអគ្គិសនីឲ្យបានត្រឹមត្រូវដើម្បីការពារ និងជៀសវាងការកើតមានគ្រោះអគ្គិភ័យជាដើម៕
