(ព្រះសីហនុ)៖ ជាថ្មីម្ដងទៀត ពីលើវេទិកាក្នុងពិធីសម្ពោធដាក់ឲ្យប្រើប្រាស់ហេដ្ឋារចនាសម្ព័ន្ធនៅមូលដ្ឋានទ័ពរាម ខេត្តព្រះសីហនុ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានប្រកាសថា រាជរដ្ឋាភិបាលកម្ពុជា ដឹកនាំដោយគណបក្សប្រជាជនកម្ពុជា មិនអនុញ្ញាតឲ្យកងទ័ពប្រទេសណា មកដាក់មូលដ្ឋាននៅប្រទេសកម្ពុជាដាច់ខាត។
ក្នុងពិធីនាព្រឹកថ្ងៃទី៥ ខែមេសា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត បានលើកឡើងថា ប្រជាពលរដ្ឋកម្ពុជាដែលស្នេហាជាតិយ៉ាងពិតប្រាកដ គួរតែអបអរសាទរចំពោះសមិទ្ធផល និងការធ្វើទំនើបកម្មវិស័យការពាររបស់កម្ពុជា ដែលបាននិងកំពុងធ្វើឡើងនៅពេលនេះ។ តែសម្ដេចជឿថា ជាមួយសមិទ្ធផលនេះ ច្បាស់ជាមានការវាយប្រហារមកលើរាជរដ្ឋាភិបាលបន្ដទៀតមិនខានឡើយ។
សម្ដេចមហាបវរធិបតី ហ៊ុន ម៉ាណែត បានមានប្រសាសន៍យ៉ាងដូច្នេះថា «បើបងប្អូនជាអ្នកស្នេហាជាតិពិតប្រាកដ គួរអបអរសាទរសមិទ្ធផលរបស់យើង ចាប់ពីថ្ងៃនេះទៅនឹងមានការបកស្រាយវាយប្រហារផ្សេងៗ ខ្ញុំសូមយកឱកាសនេះបញ្ជាក់ឲ្យច្បាស់ កម្ពុជារដ្ឋាភិបាលដឹកនាំដោយ គណបក្សប្រជាជនគ្មានគោលបំណង ថ្ងៃមុនអតីតកាល ថ្ងៃនេះ ឬថ្ងៃមុខ នៅក្នុងការរំលោភរដ្ឋធម្មនុញ្ញរបស់ខ្លួនតាមរយៈការឲ្យប្រទេសណាកងទ័ពណា មកដាក់មូលដ្ឋានផ្ដាច់មុខនៅលើទឹកដីកម្ពុជានោះទេ។ នេះគឺជាការពិត»។
ជាមួយគ្នានេះ សម្ដេចមហាបវរធិបតី នាយករដ្ឋមន្ដ្រីនៃកម្ពុជា បានអះអាងដែរថា រដ្ឋធម្មនុញ្ញរបស់កម្ពុជា មាត្រា៥៣ បានចែងច្បាស់ហើយថា ព្រះរាជាណាចក្រកម្ពុជា មិនអនុញ្ញាតឲ្យមានមូលដ្ឋានយោធាបរទេស នៅលើទឹកដីរបស់ខ្លួន ហើយក៏មិនអនុញ្ញាតឲ្យមានមូលដ្ឋានរបស់ខ្លួននៅឯបរទេស លើកលែងតែក្នុងក្របខណ្ឌសំណូមពររបស់អង្គការសហប្រជាជាតិ។
បើតាមប្រសាសន៍របស់សម្ដេចមហាបវរធិបតី ហ៊ុន ម៉ាណែត, នៅក្នុងអាស៊ាននេះប្រទេសប៉ុន្មានដែលឲ្យមូលដ្ឋានបរទេសមានកងទ័ព ប្រទេសមិនតិចទេនៅក្នុងអាស៊ាន១០ប្រទេសយើងនេះ។ គេបើកជាចំហតែម្ដង តើខុសគ្រាន់តែកម្ពុជាទំនើបកម្មកងទ័ពរបស់ខ្លួន កសាងមូលដ្ឋានហ្វឹកហ្វឺន ដៃគូអភិវឌ្ឍនេះជាមួយចិន។
សម្ដេចបវរធិបតី ហ៊ុន ម៉ាណែត ក៏បានចោទសួរដែរថា តើកម្ពុជានេះប្រទេសដែលរងសម្ពាធដោយសារសង្គ្រាម សមត្ថភាពកងទ័ព ជាពិសេសកងទ័ពជើងទឹកយើងដើរក្រោយគេ ចង់ពន្លឿនសមត្ថភាពក្នុងការកសាងសមត្ថភាព ឲ្យកងទ័ពយើង មានសម្ភារៈប្រើប្រាស់ មានឧបករណ៍ប្រមូលព័ត៌មាន មានកងទ័ពដែលអាចហ្វឹកហ្វឺនសម្ភារៈទំនើប តើខុសអី?។
សម្ដេចមហាបវរធិបតី ហ៊ុន ម៉ាណែត បានគូសបញ្ជាក់ថា ការសម្ពោធសមិទ្ធផលទំនើបកម្ម និងមជ្ឈមណ្ឌលភស្តុភារ និងហ្វឹកហ្វឺនរួមគ្នាកម្ពុជា-ចិន ផែរាម នាព្រឹកថ្ងៃនេះ បានបង្ហាញការអភិវឌ្ឍនៅមូលដ្ឋានសមុទ្ររាម មិនមានអាថ៌កំបាំង នោះឡើយ។
សម្តេចមហាបវរធិបតី ហ៊ុន ម៉ាណែត ណែនាំឱ្យឲ្យពង្រឹង និង អភិវឌ្ឍវិស័យការពារជាតិរបស់ព្រះរាជាណាចក្រកម្ពុជា ដោយឈរលើមូលដ្ឋាននៃការ គោរពរដ្ឋធម្មនុញ្ញ, ច្បាប់ជាតិ និង អន្តរជាតិ ។ ការពាររឹងមាំដាច់ខាតនូវឯករាជ្យ, អធិបតេយ្យ និងបូរណភាពទឹកដី នៃព្រះរាជាណាចក្រកម្ពុជា។ បន្តពង្រឹង ខឿនការពារជាតិកម្ពុជា ដោយយកចិត្តទុកដាក់ធ្វើការអភិវឌ្ឍកងកម្លាំង ឲ្យក្លាយជាកងទ័ព ដែលមានវិជ្ជាជីវៈខ្ពស់ មានស្មារតី ឆន្ទៈដាច់ខាតស្មោះត្រង់ ចំពោះជាតិមាតុភូមិ និងប្រជាជន៕
