(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ បានអនុញ្ញាតជូនលោកស្រី Miranda Andruccioli អ្នកជំនាញការពីវេទិកាសេដ្ឋកិច្ចពិភពលោក ចូលជួបសម្តែងការគួរសម និងពិភាក្សាការងារ នាថ្ងៃទី៤ ខែមេសា ឆ្នាំ២០២៥ នៅទីស្ដីការក្រសួងទេសចរណ៍។

ជំនួបនេះ ដើម្បីបង្ហាញពីលទ្ធភាពបង្កើតកិច្ចសហប្រតិបត្តិទេសចរណ៍ រវាងវេទិកាសេដ្ឋកិច្ចពិភពលោក ដែលជាអង្គការអន្តរជាតិដ៏ធំមានទីស្នាក់ការ នៅប្រទេសស្វីស និងជាអ្នករៀបចំវេទិកាសេដ្ឋកិច្ចពិភពលោកប្រចាំឆ្នាំដ៏ល្បីដែលហៅថា Davos Summit។

លោក Børge Brende ប្រធានវេទិកាសេដ្ឋកិច្ចពិភពលោក បានអញ្ជើញលោករដ្ឋមន្រ្តី ហួត ហាក់ ចូលរួមកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក (16th Annual Meeting of the New Champions) នាខែមិថុនា នៅទីក្រុងធានជីន នៃសាធារណរដ្ឋប្រជាមានិតចិនផងដែរ។

កិច្ចប្រជុំកំពូលសេដ្ឋកិច្ចពិភពលោកនេះ នឹងមានការចូលរួមពី សំណាក់ថ្នាក់ដឹកនាំជាន់ខ្ពស់ក្នុងវិស័យធុរកិច្ច ពីផ្នែករដ្ឋាភិបាល សង្គមស៊ីវិល អង្គការអន្តរជាតិ សហគ្រិន បញ្ញវន្ត និងអ្នកច្នៃប្រឌិតថ្មីជាង១៥០០នាក់ពីជុំវិញពិភពលោក។

សូមបញ្ជាក់ថា វេទិកាសេដ្ឋកិច្ចពិភពលោកបានផ្តល់ ពិន្ទុល្អដល់កម្ពុជាលើការដាក់ចេញនូវគោលនយោបាយនិងផែនការសកម្មភាពត្រូវទិសដៅដែលជួយអភិវឌ្ឍវិស័យទេសចរណ៍របស់ខ្លួន ដោយទទួលបានពិន្ទុ៣,៥៧លើ៧ និងពិន្ទុ៦,១៤លើកត្តាសុវត្ថិភាពនិងសន្តិសុខ តាមតារាងសន្ទស្សន៍ Travel & Tourism Development Index ឆ្នាំ២០២៤ របស់វេទិកាសេដ្ឋកិច្ចពិភពលោក៕