(ឧត្តរមានជ័យ)៖ លោក អ៊ុន ចាន់ដា អភិបាលខេត្តកំពង់ចាម បានបង្ហាញគម្រោងរៀបចំផែនការដាក់តាំងបង្ហាញលៀសហាល (កំពង់ចាម) ប្រវែង១០០០ម៉ែត្រ លើបរិមាណលៀសចំនួន៣តោន ដើម្បីងបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំម្សាញ់ សប្ពស័ក ព.ស២៥៦៨ ស២០២៥នេះ។
ការថ្លែងរបស់លោក អ៊ុន ចាន់ដា បែបនេះ ក្នុងឱកាសដែលលោកអញ្ជើញដឹកនាំប្រតិភូខេត្តកំពង់ចាម ចុះជួបសំណេះសំណាល សួរសុខទុក្ខ និងនាំអំណោយដ៍ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ចែកជូននាយទាហាន នាយទាហានរង និងពលទាហាន កងពលតូចអន្តរាគមន៍លេខ៦ ចំណុះកងពលធំអន្តរាគមន៍លេខ២ ដែលជាអង្គភាពសម្ព័ន្ធមេត្រីភាព នៅក្នុងឱកាសឆ្នាំថ្មីប្រពៃណីជាតិ នៅព្រឹកថ្ងៃទី០៥ ខែមេសា ឆ្នាំ២០២៥នេះ ស្ថិតក្នុងភូមិថ្នល់កែង ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។
លោកអភិបាលខេត្តកំពង់ចាម បានថ្លែងប្រាប់នាយទាហាន នាយទាហានរង និងពលទាហាន ទូទាំងកងពលតូចអន្តរាគមន៍លេខ៦ ពីការរៀបចំ «សង្ក្រានកំពង់ចាម» រយៈពេល៣ថ្ងៃ ហើយក៏កំពុងនឹកគិតរកវិធីសាស្ត្រផ្សេងៗដើម្បីរៀបចំឱ្យមានភាពទាក់ទាញ បង្កការសប្បាយរីករាយជូនប្រជាពលរដ្ឋ ពិសេសលោកអំពាវនាវកងទ័ពរបស់យើងនៅទីនេះ អាចទៅលេងក្នុងព្រឹត្តិការណ៍ «សង្ក្រានកំពង់ចាម» នេះឱ្យបានច្រើនកុះករ ប៉ុន្តែបើចេះក្បាច់រាំល្អៗទៅជួយរាំនៅកំពង់ចាម ដើម្បីលោកឱ្យក្រុមការងារថតបង្ហាញ តាមបណ្តាញសង្គមផ្សេងៗស្តីពីព្រឹត្តិការណ៍ដ៍សប្បាយរីករាយនេះ៕
