(ព្រះវិហារ)៖ លោក ផាន់ និមិត្ត សមាជិកក្រុមលេខាសម្តេចសម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា តំណាងលោក ហូ សិទ្ធី នាយកខុទ្ទកាល័យ នៅរសៀលថ្ងៃទី៥ ខែមេសា ឆ្នាំ២០២៥ បានដឹកនាំក្រុមការងារចុះសួរសុខទុក្ខ សំណេះសំណាល និងនាំអំណោយថវិការ សម្ភារ ចែកជូននាយទាហាន នាយទាហានរង និងពលទាហាន វរសេនាតូចលេខ៣៨៥ ដែលជាអង្គភាពសម្ព័ន្ធមេត្រីភាព នាឱកាសពិធីបុណ្យចូលឆ្នាំថ្មីប្រពៃណីជាតិខ្មែរ។
នៅក្នុងឱកាសនោះលោក ផាន់ និមិត្ត បានផ្តាំផ្ញើសាកសួរសុខទុក្ខដោយក្តីនឹករលឹកពីសម្តេចតេជោ ហ៊ុន សែន ប្រធានព្រឹទ្ធសភាជាតិ និងជាអតីតនាយករដ្ឋមន្ត្រីនៃកម្ពុជា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ព្រមទាំងលោក ហូ សិទ្ធី ដែលតែងតែគិតគូរយកចិត្តទុកដាក់ពីសុខទុក្ខ និងជីវភាពរស់នៅរបស់កងទ័ព និងក្រុមគ្រួសារកងទ័ពគ្រប់ក្រុមគ្រួសារ ពិសេសនាឱកាសបុណ្យចូលឆ្នាំថ្មី ប្រពៃណីជាតិខ្មែរខាងមុខនេះ លោកសូមជូនពរបងប្អូនកងទ័ពនិងក្រុមគ្រួសារទាំងអស់ មានសុខភាពល្អ និងទទួលជោគជ័យគ្រប់ភារកិច្ច។
លោក ផាន់ និមិត្ត បានកោតសរសើរបងប្អូនកងទ័ពទាំងអស់ ក្នុងអង្គភាពវរសេនាតូចលេខ៣៨៥ ដែលបានលះបង់កម្លាំងកាយចិត្ត បូជាសាច់ស្រស់ឈាមស្រស់ ក្នុងបុព្វហេតុការពារជាតិមាតុភូមិ ការពារតាមបន្ទាត់ព្រំដែន ពិសេសការពារបាននូវសុខសន្តិភាព អធិបតេយ្យភាពជាតិ លោកថ្លែងអំពាវនាវដល់បងប្អូនកងទ័ពទាំងអស់របស់យើង ត្រូវថែរក្សាសុខភាពឱ្យបានល្អ ពិសេសត្រូវជៀសឱ្យឆ្ងាយពីគ្រឿងញៀន។
ក្នុងនាមលោក ហូ សិទ្ធី, លោក ផាន់ និមិត្ត បានថ្លែងអំណរគុណលោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋក្រសួងសេដ្ឋកិច្ច និងហិរញ្ញវត្តុ, លោក ប៉ែន រដ្ឋា តំណាងលោកអ្នកឧកញ៉ា ពង់ ឃាវសែ ប្រធានក្រុមប្រឹក្សាភិបាល ធានាគារកាណាឌីយ៉ា និងភូមិវប្បធម៍សៀមរាប, លោក វ៉ាន់ឆារស៌ ជួន លោក អ៊ុន សាវន លោក អ៊ូច ឌីណា លោក ហាក់ ចាន់រឿន លោក ឡុញ ហ៊ាល និងលោក តាំង ស៊ុយជា ដែលបានចូលរួមជាមួយខុទ្ទកាល័យសម្តេចធិបតី ឧបត្ថម្ភថវិកា និងសម្ភារ ចែកជូនដល់កងទ័ពវរសេនាតូចលេ៣៨៥ ដែលជាអង្គភាពសម្ព័ន្ធមេត្រីភាព នាឱកាសពិធីបុណ្យចូលឆ្នាំថ្មីប្រពៃណីជាតិ ឆ្នាំម្សាញ់សប្ពស័កព.ស២៥៦៨ គ.ស២០២៥នេះ។
ថវិកា និងសម្ភារ ដែលខុទ្ធការល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី នាំមកចែកជូនដល់កងទ័ព អង្គភាពវរសេនាតូចលេខ៣៨៥នាពេលនេះរួមមាន៖ ទីបញ្ជាការថវិកាចំនួន ៥០០០ដុល្លារ ចែកជូននាយទាហាន នាយទាហានរង និងពលទាហាន ក្នុងម្នាក់ៗថវិកាចំនួន១៦ម៉ឺនរៀល ព្រមទាំងថ្នាំពេទ្យ និងភេសជ្ជៈមួយចំនួនទៀត៕
