(ភ្នំពេញ)៖ មន្រ្តី និងអ្នកជំនាញរំពឹងថា ការវិនិយោគនៅក្នុងទីផ្សារឧបករណ៍និស្សន៍នឹងកើនឡើងវិញនៅឆ្នាំនេះ ខណៈកាលពីឆ្នាំ២០២៤ ការវិនិយោគនៅក្នុងទីផ្សារនេះ បានធ្លាក់ចុះពីជាង៤០០លានដុល្លារ មកត្រឹមជាង២០០លានដុល្លារ។
លោក ស៊ូ សុជាតិ ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃនិយ័តករមូលបត្រកម្ពុជាបានឱ្យដឹងថា កម្ពុជាបានអនុញ្ញាតឱ្យមានការជួញដូរឧបករណ៍និស្សន្នដំបូងនៅក្នុងអំឡុងឆ្នាំ២០១៦។ នៅក្នុងឆ្នាំ២០១៧ ទំហំនៃការជួញ ដូរឧបករណ៍និស្សន្ទមានត្រឹមតែជិត៤ លានដុល្លារអាមេរិក តែប៉ុណ្ណោះ។ ការជួញដូរនេះ បានកើនឡើងជាបន្តបន្ទាប់ រហូតជាង៤០០លានដុល្លារអាមេរិក តែយ៉ាងនេះក្តី ក្នុងឆ្នាំ២០២៤កន្លងទៅនេះ ទំហំជួញដូរឧបករណ៍និស្សន្ទមានទំហំ ប្រហែល ២០០ លានដុល្លារអាមេរិកប៉ុណ្ណោះ។
កាលលើកឡើងរបស់ លោក ស៊ូ សុជាតិ បានធ្វើ ក្នុងកម្មវិធី «ចុះហត្ថលេខា និងសន្និសីទសារព័ត៌មាន ស្តីពីកិច្ចព្រមព្រៀងសហប្រតិបត្តិការ ផ្តល់នូវវិនិយោគិនបរទេសនូវសេវាឥណទានវិនិយោគរវាងក្រុមហ៊ុនមូលបត្រ ភីភី លីង និងធនាគារ អេស៊ីលីថា ភីអិលស៊ី» នាថ្ងៃទី៤ ខែមេសា ឆ្នាំ២០២៥។
លោក ជា សុធា អភិបាលនៃក្រុមហ៊ុនមូលត្រ ភីភី លីង បានលើកឡើងថា មានកត្តារួមផ្សំមួយចំនួន ដែលទាញទម្លាក់ការជួញដូរ ក្នុងទីផ្សារឧបករណ៍និស្សន្ទកាលពីឆ្នាំមុនឱ្យធ្លាក់ចុះ ក្នុងនោះកត្តាចម្បង គឺលេចឡើងនូវការវិនិយោគបោកប្រាស់តាមបណ្តាញសង្គមនានា ដូចជាតេឡេក្រាមជាដើម ដែលបានធ្វើឱ្យវិនិយោគិនក្នុងទីផ្សារបាត់ទំនុកចិត្ត។ ហេតុដូច្នេះហើយ ទើបក្រុមហ៊ុនរិះរកនូវយុទ្ធសាស្រ្តថ្មី ដើម្បីជំរុញឱ្យការជួញដូរក្នុងទីផ្សារនេះ កើនឡើងវិញ។
យ៉ាងនេះក្តី លោកសង្កេតឃើញថា ក្នុងរយៈពេល៣ខែនៃឆ្នាំ២០២៥នេះ ការជួញដូរក្នុងទីផ្សារប្រចាំបានបង្ហាញនិន្នាការកើនឡើងផងដែរ។
លោកបានលើកឡើងថា តាមរយៈកិច្ចសហការរវាង ក្រុមហ៊ុនមូលបត្រ ភីភី លីង និងធនាគារ អេស៊ីលីថា នឹងអាចទាក់ទាញបាននូវវិនិយោគិនពីបរទេស ចូលមកវិនិយោគក្នុងទីផ្សារឧបករណ៍និស្សន៍នៅកម្ពុជា ដើម្បីរួមចំណែកកៀរគរលុយពីក្រៅប្រទេសចូលមកកម្ពុជា។
លោក នេត ពិសិដ្ឋ នាយកប្រតិបត្តិសេវាហិរញ្ញវត្ថុធនាគាអេស៊ីលីដា បានឱ្យដឹងផងដែរថា កិច្ចព្រមព្រៀងនេះ គឺជាឱកាសមួយដែលអាចទាក់ទាញវិនិយោគិនបរទេសមកវិនិយោគក្នុងទីផ្សារឧបករណ៍និស្សន្ទនៅកម្ពុជា ព្រោះពួកគេនឹងទទួលបាននូវការការពារសាច់ប្រាក់ដែលមាននៅក្នុងធនាគារអេស៊ីលីដា ដែលធ្វើឱ្យការរជួញដូរឧបករណ៍និស្សន្ទប្រកបដោយសុវត្ថិភាពខ្ពស់ និងទទួលបាននូវអត្រាការប្រាក់សមរម្យទៀតផង។
លោក ស៊ូ សុជាតិ មានប្រសាសន៍ថា ការបង្កើតទីផ្សារឧបករណ៍និស្សន្ទមួយ ប្រកបដោយប្រសិទ្ធភាព គឺពិតជាមានសារៈសំខាន់ណាស់ សម្រាប់ការពង្រឹងស្ថិរភាពហិរញ្ញវត្ថុ ការគ្រប់គ្រង ហានិភ័យ និងការជំរុញកំណើនសេដ្ឋកិច្ច។ ក្នុងគោលដៅជំរុញទីផ្សារនេះឱ្យឆ្ពោះទៅមុខ គឺទាមទារនូវកិច្ចខិតខំប្រឹងប្រែង កិច្ចសហការ និងការប្តេជ្ញាខ្ពស់ ដែលកន្លងមកនេះ ន.ម.ក. បានសហប្រតិបត្តិការជាមួយស្ថាប័នសាជីវកម្មហិរញ្ញវត្ថុអន្តរជាតិ (IFC) និងភាគីពាក់ព័ន្ធ ផ្សេងទៀត ដើម្បីអភិវឌ្ឍទីផ្សារឧបករណ៍និស្សន្ទនៅកម្ពុជាឱ្យដំណើរការកាន់តែរលូន និងមានប្រសិទ្ធភាព។
សូមជម្រាបថា បច្ចុប្បន្ននេះនិយ័តករមូលបត្រកម្ពុជាបានផ្តល់ការអនុញ្ញាតឱ្យជួញដូរ ឧបករណ៍និស្សន្ទសរុបចំនួន ២៤៩ ដែលបែងចែកជា ៦ ប្រភេទ គឺកិច្ចសន្យាលើគម្លាតថ្លៃ រូបិយប័ណ្ណចំនួន ៤២, កិច្ចសន្យាលើគម្លាតថ្លៃលោហធាតុមានតម្លៃចំនួន ៤, កិច្ចសន្យាលើ គម្លាតថ្លៃប្រេងឆៅចំនួន ៥, កិច្ចសន្យាលើគម្លាតថ្លៃខុម៉ុឌីធីចំនួន ៦, កិច្ចសន្យាលើគម្លាតថ្លៃ សន្ទស្សន៍ចំនួន ២២, កិច្ចសន្យាលើគម្លាតថ្លៃមូលបត្រកម្មសិទ្ធិចំនួន ១៧០។ បន្ថែមពីនេះ ក្រៅពីការជួញដូរឧបករណ៍និស្សន្ទ ន.ម.ក. បានផ្តល់ការអនុញ្ញាតឱ្យ ក្រុមហ៊ុនចំនួន ២៣ ធ្វើការបោះផ្សាយ និងចុះបញ្ជីលក់មូលបត្រនៅផ្សារមូលបត្រកម្ពុជា ដែលបានប្រមូលសាច់ប្រាក់ប្រមាណ ៤៧៥ លានដុល្លារអាមេរិក៕
