(ភ្នំពេញ)៖ ប្រធានគ្រប់គ្រងហាងលក់ទំនិញទំនើបមួយ មានឈ្មោះថា «Super Duper» បានធ្វើការទទូច ក៏ដូចជាអំពាវនាវ ដល់បងប្អូនប្រជាពលរដ្ឋខ្មែរ ផលិតទំនិញដែលមានវត្ថុធាតុដើម នៅក្នុងប្រទេសរបស់ខ្លួន ឲ្យមានគុណភាពល្អ ស្របតាមស្ដង់ដារអន្តរជាតិ ដើម្បីប្រកួតប្រជែង ក្នុងទីផ្សារនៅក្នុងប្រទេស ខណៈដែលទំនិញនាំចូល ពីប្រទេសជិតខាង មានលក្ខណៈច្រើនសន្ធឹកសន្ធាប់ ពីមួយថ្ងៃទៅមួយថ្ងៃ។
ការថ្លែងបែបនេះ ត្រូវបានធ្វើឡើងក្នុងពិធីបើកសម្ពោធ សាខាថ្មីមួយទៀត របស់ហាងលក់ទំនិញទំនើប «Super Duper» នៅព្រឹកថ្ងៃទី០៨ ខែកញ្ញា ឆ្នាំ២០១៧នេះ នៅតាមបណ្ដោយផ្លូវសុធារស ក្នុងសង្កាត់ទន្លេបាសាក់ ខណ្ឌចំកាមន ដោយក្នុងនោះមានការអញ្ជើញចូលរួម ពីសំណាក់អ្នកសារព័ត៌មាន ជាច្រើននាក់។
លោក ហ៊ាន សម្បត្តិ ប្រធានផ្នែកគ្រប់គ្រងហាង «Super Duper» បានថ្លែងថា ស្របពេលដែលទំនិញគ្រប់បែបយ៉ាង កំពុងតែនាំចូលមកកាន់ប្រទេសកម្ពុជា ពីសំណាក់ប្រទេសជិតខាង ក្នុងនោះក៏មានទំនិញខ្លះ មានផ្ទុះសារធាតុគីមី ប៉ះពាល់ដល់សុខភាពផងនោះ លោកសូមទទូចដល់បងប្អូន ប្រជាពលរដ្ឋខ្មែរជួយង្កើនការផលិត នូវទំនិញ គ្រឿងឧបភោគ-បរិភោគ និងផលិតផលជាច្រើនមុខទៀត ឲ្យមានលក្ខណៈល្អប្រសើរ មានគុណភាព គ្មានជាតិគីមី ដើម្បីប្រកួតប្រជែងជាមួយផលិតផល ក្រៅប្រទេស និងបំពេញសេចក្ដីត្រូវការ ដល់អ្នកប្រើប្រាស់ក្នុងស្រុក ឲ្យបានគ្រប់គ្រាន់។
លោកបន្តថា ហាង Super Duper គាំទ្ររាល់ទំនិញ ដែលជាផលិតផលរបស់ខ្មែរយើង ខណៈទំនិញដ៏សំបូរបែបរបស់យើងរួមមាន គ្រឿងទេស និងផលិតផលប្រើប្រាស់ក្នុងផ្ទះ សម្រាប់បម្រើដល់តម្រូវការប្រចាំថ្ងៃ របស់លោកអ្នក ក៏ដូចជាទំនិញជាច្រើនមុខ ដែលលោកអ្នក ពិបាកស្វែងរក នៅតាមហាងដទៃទៀត នៅក្នុងក្រុងភ្នំពេញ។ គោលដៅធំបំផុតរបស់ Super Duper គឺធ្វើយ៉ាងណាឲ្យអតិថិជនពេញចិត្ត។ ហាងរបស់យើងប្តេជ្ញានឹងធ្វើឲ្យការ ទិញទំនិញប្រចាំថ្ងៃរបស់លោក អ្នកប្រកបដោយភាព ងាយស្រួល រហ័ស និងសប្បាយរីករាយ ជាមួយនឹងសេវាកម្មរបស់យើង។ គោលដៅរបស់យើង គឺការផ្តល់ជូនអតិថិជនទាំងអស់ នូវសេវាកម្មនិងទំនិញដ៏ល្អបំផុត។
លោកបន្ថែមថា ពេលបច្ចុប្បន្ននេះ Super Duper បន្តរីកលូតលាស់ និងអភិវឌ្ឍន៍ទៅមុខជានិច្ច ក្នុងការកសាងទំនាក់ទំនងយូរអង្វែង ដើម្បីផលប្រយោជន៍ទៅវិញ ទៅមកជាមួយអតិថិជន និងដៃគូនៅក្នុងការលក់។ ជារៀងរាល់ថ្ងៃ ហាងនេះទទួលបានការផ្គត់ផ្គង់នូវស្តុកថ្មីៗ ដែលរួមមានបន្លែ ផ្លែឈើ ត្រីសាច់ ឈីស អាហារឆៅ និងផលិតផលទឹកដោះគោ។ ហាងលក់ទំនិញ Super Duper រំពឹងទុកថា នឹងទទួលបានកេរ្តិ៍ឈ្មោះ ជាដៃគូ ដ៏គួរឲ្យទុកចិត្ត និងប្រកបដោយស្ថេរភាព ហើយនឹងខិតខំពង្រឹងកេរ្ដិ៍ឈ្មោះ ទៅតាមតម្រូវការ នៃពេលវេលា និងការរីកចម្រើនឥតឈប់ឈរ៕
