(កណ្ដាល)៖ តាមរបាយការណ៍ដែលបណ្តាញសារព័ត៌មាន Fresh News ទទួលបានគិតត្រឹមព្រឹកថ្ងៃទី១៥ ខែវិច្ឆិកា ឆ្នាំ២០១៧នេះ មានសមាជិកក្រុមប្រឹក្សាឃុំ និងស្រុកចំនួន៥នាក់ នៅខេត្តកណ្ដាល បានសម្រេចចិត្តដើរចេញពី គណបក្សសង្គ្រោះជាតិ មកសុំចូលរួមរស់ជាមួយ គណបក្សប្រជាជនកម្ពុជា ពីព្រោះពួកគាត់មិនចង់គាំទ្រលោក កឹម សុខា មេបក្សក្បត់ជាតិតទៅទៀត។
ថ្នាក់ដឹកនាំក្នុងមូលដ្ឋានខេត្តកណ្ដាលទាំង៥នាក់នោះ រួមមាន៖ លោក សុខ ស្រេង អាយុ៦៦ឆ្នាំ សមាជិកក្រុមប្រឹក្សាស្រុកលើកដែក, លោក ទេព ចាន់ធឿន អាយុ៥៣ឆ្នាំ សមាជិកក្រុមប្រឹក្សាឃុំព្រែកស្ពឺ ស្រុកកោះធំ, លោក វ៉ា ចំរើន អាយុ៦៤ឆ្នាំ សមាជិកក្រុមប្រឹក្សាឃុំព្រែកដំបង ស្រុកមុខកំពូល, លោក វ៉ែន សាវុន អាយុ៤៣ឆ្នាំ សមាជិកក្រុមប្រឹក្សាឃុំគគីរធំ ស្រុកកៀនស្វាយ និងលោកស្រី ប៉ែន ចន្ថា អាយុ៥៥ឆ្នាំ សមាជិកក្រុមប្រឹក្សាំឃុំដីឥដ្ឋ ស្រុកកៀនស្វាយ។
នៅក្នុងលិខិតសុំចូលរួមជីវភាពនយោបាយ ដែលបណ្តាញព័ត៌មាន Fresh News ទទួលបានជាបន្តបន្ទាប់នោ សមាជិកក្រុមប្រឹក្សាឃុំស្រុកទាំងនោះ បានអះអាងដូចៗគ្នាថា បានមើលឃើញលោក កឹម សុខា ប្រធានគណបក្សសង្រ្គោះជាតិ ជាជនក្បត់ជាតិ មានគោលបំណងផ្តួលរំលំរាជរដ្ឋាភិបាល ស្របច្បាប់បច្ចុប្បន្ន ដែលដឹកនាំដោយសម្តេចតេជោ ហ៊ុន សែន នាយករដ្ឋមន្រ្តី ព្រមទាំងមើលឃើញការបែកបាក់ផ្ទៃក្នុង ជួរសមាជិកគណបក្សសង្រ្គោះជាតិ ពីមួយថ្ងៃទៅមួយថ្ងៃ ពុំមានគោលជំហរ និងឆន្ទៈច្បាស់លាស់ មានតែភាពចុះខ្សោយទៅៗ ព្រមទាំងធ្វើឲ្យមានការញុះញង់ បំបែកបំបាក់ជាតិទៀតផង។
នៅព្រឹកថ្ងៃទី០៤ ខែវិច្ឆិកា ឆ្នាំ២០១៧ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្សប្រជាជន កម្ពុជា បានប្រកាសអំពាវនាវតាមរយៈ វិដេអូចំនួន២៦នាទី នៅលើបណ្តាញទំនាក់ទំនង Facebook របស់សម្តេចដោយ មានប្រសាសន៍ អំពីការផ្តល់ឱកាសដល់បងប្អូនសមាជិក គណបក្សសង្គ្រោះជាតិ បានបន្តអាជីពនយោបាយជាមួយ គណបក្សប្រជាជនកម្ពុជា ក្រោយពេលដែលគណបក្សសង្រ្គោះជាតិ ត្រូវបានកាត់រំលាយដោយតុលាការកំពូលនៅគឺថ្ងៃទី១៦ ខែវិច្ឆិកា ឆ្នាំ២០១៧ខាងមុខនេះ៕ (សូមទស្សនាវិដេអូ ប្រសាសន៍សម្តេចតេជោ)៖
