(សៀមរាប)៖ នៅថ្ងៃទី២៦ ខែវិច្ឆិកា ឆ្នាំ២០១៧នេះ មានអតីតបេក្ខជនបម្រុងនៅតាមឃុំ-សង្កាត់ ក្នុងក្រុងសៀមរាប ស្រុកបន្ទាយស្រី និងស្រុកពួក ខេត្តសៀមរាប របស់គណបក្សសង្គ្រោះជាតិ ដែលទើបរលាយ ចំនួន៥នាក់ទៀត បានប្រកាសចុះចូលជាមួយគណបក្ស ប្រជាជនកម្ពុជា ដោយសារតែពួកគាត់បានឃើញ នូវអំពើក្បត់ជាតិរបស់មេគណបក្សសង្គ្រោះជាតិ ដែលបម្រើបរទេស។ នេះបើតាមលិខិតដែលអង្គភាព Fresh News ទទួលបាននៅថ្ងៃទី២៦ ខែវិច្ឆិកានេះ។
អតីតសមាជិក CNRP ទាំង៥រូបរួមមាន៖
១-លោក ដែក វី អតីតបេក្ខជនបម្រុង សង្កាត់សៀមរាប ក្រុងសៀមរាប
២-លោកស្រី ប៉ាវ ឆើញ អតីតបេក្ខជនបម្រុង ឃុំរំចេក ស្រុកបន្ទាយស្រី
៣-លោកស្រី គង់ សុវី អតីតបេក្ខជនបម្រុង ឃុំខ្នារសណ្តាយ ស្រុកបន្ទាយស្រី
៤-លោក ភឹម តឿ អតីតបេក្ខជនបម្រុង ឃុំយាង ស្រុកពួក
៥-លោក ជា ស៊ុយ អតីតបេក្ខជនបម្រុង ឃុំពោធិទ្រាយ ស្រុកពួក។
ការសម្រេចដើរចេញរបស់ អតីតមន្រ្តីគណបក្សសង្រ្គោះជាតិទាំង៥រូបនេះ បានធ្វើឡើងបន្ទាប់ពីតុលាការកំពូល កាលពីថ្ងៃទី១៦ ខែវិច្ឆិកា ឆ្នាំ២០១៧ បានកាត់រំលាយគណបក្សសង្រ្គោះជាតិ ដែលពាក់ព័ន្ធនឹងការប្រព្រឹត្តអំពើក្បត់ជាតិ ព្រមទាំងបានហាមឃាត់សមាជិកជាន់ខ្ពស់របស់គណបក្សនេះ ចំនួន១១៨រូប មិនឱ្យធ្វើនយោបាយ រយៈពេល៥ឆ្នាំផងដែរ។
គណបក្សប្រជាជនកម្ពុជាខេត្តសៀមរាប បានប្រកាសស្វាគមន៍ និងទទួលសមាជិកសមាជិកាថ្មី មកពីអតីតគណបក្សសង្គ្រោះជាតិទាំង៥រូបនោះ ដែលសុំចូលរួមរស់ជីវភាពនយោបាយជាមួយ គណបក្សប្រជាជនកម្ពុជា បន្ទាប់ពីបានជ្រួតជ្រាបនូវអំពើក្បត់ជាតិរបស់មេបក្សខ្លួន។
សូមជម្រាបថា ដោយសារតែសន្ទុះនៃការសម្រុកចុះចូលបាននិងកំពុងកើនឡើងយ៉ាងខ្លាំង ហើយម្យ៉ាងទៀតថ្ងៃកំណត់ទី២៤ ខែវិច្ឆិកា អាចមានការរៀបចំមិនទាន់ ដូច្នេះសម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា បានប្រកាសផ្តល់ឱកាសបន្តជូនមន្រ្តីគណបក្សសង្គ្រោះជាតិ នៅថ្នាក់មូលដ្ឋានទាំងអស់ មកចូលរួមជីវភាពនយោបាយ ជាមួយគណបក្សប្រជាជន រហូតដល់ម៉ោង៩យប់ ថ្ងៃទី២៦ ខែវិច្ឆិកា ឆ្នាំ២០១៧។
សម្តេចតេជោ ហ៊ុន សែន បានអំពាវនាវឲ្យអតីតមន្រ្តីគណបក្សសង្រ្គោះជាតិ ដែលត្រូវបានតុលាការកំពូលកាត់រំលាយ សូមប្រញាប់ប្រញាល់ចុះចូលជាមួយ គណបក្សប្រជាជនកម្ពុជា ដើម្បីទទួលបាននូវតួនាទីឋានៈអ្វីៗដដែល ព្រោះការកំណត់ពេលវេលាត្រឹមយប់ថ្ងៃទី២៦ ធ្វើឡើងតាមលក្ខខណ្ឌរបស់គ.ជ.ប៕
ស្តីពីការសុំចូលរួមជាមួយយើង របស់ CNRP សរុប ៥ នាក់ ៖
