(អាមេរិក)៖ យោងតាមការចុះផ្សាយរបស់គេហទំព័រជំនួញ Business Insider បានឲ្យដឹងថា iPhone បានធ្វើឲ្យក្រុមហ៊ុន Apple ទទួលបានប្រាក់ចំណូលខ្ពស់ជាងក្រុមហ៊ុនបច្ចេកវិទ្យាផ្សេងៗ នៅក្នុងត្រីមាសចុងក្រោយ។
នៅក្នុងស្ថិតិដែលបានចេញផ្សាយដោយស្ថាប័នវិភាគ Statista បានឲ្យដឹងថា ក្រុមហ៊ុន Apple បានឈរនៅលេខរៀងទី១ ជាក្រុមហ៊ុនបច្ចេកវិទ្យាដែលទទួលបានប្រាក់ចំណូលខ្ពស់ជាងគេបំផុត ខណៈដែល Facebook ឈរនៅលេខរៀងទី១០។
នៅក្នុងតារាងបានបង្ហាញថា Apple ទទួលបានប្រាក់ចំណូលជាង ៣១ពាន់លានដុល្លារអាមេរិក នៅក្នុងត្រីមាសកន្លងទៅនេះ ខណៈដែលក្រុមហ៊ុនផលិតកុំព្យូទ័រ HP ទទួលបានប្រាក់ចំណូល ២៥,៣ពាន់លានដុល្លារអាមេរិក និង Microsoft ឈរនៅលេខរៀងទី៣ ទទួលប្រាក់ចំណូល ២២,២ពាន់លានដុល្លារអាមេរិក។
គួរបញ្ជាក់ផងដែរថា នៅយប់ថ្ងៃទី០៩ ខែកញ្ញាកន្លងទៅនេះ ក្រុមហ៊ុន Apple បានប្រកាសបង្ហាញ iPhone 6S និង 6S Plus ដោយបំពាក់នូវកាមេរ៉ាក្រោយរហូតដល់ ១២មេហ្គាភិចសែល និងកាមេរ៉ាមុខ ៥មេហ្គាភិចសែល៕
